ଦାରିଙ୍ଗବାଡ଼ି,୩୧ା୩(ଅରୁଣ ସାହୁ)ଦାରିଙ୍ଗବାଡ଼ିର ଦୁର୍ଗମ ଅଞ୍ଚଳରେ ଜନନୀ ଯନ୍ତ୍ରଣାରୁ ମୁକ୍ତି ମିଳୁନି। ରାଜ୍ୟ ସରକାରଙ୍କ ମାଳ ମାଳ ଯୋଜନା ଦୁର୍ଗମ ଅଞ୍ଚଳବାସୀଙ୍କ ପାଇଁ ହାସ୍ୟାସ୍ପଦ ପାଲଟିଛି। ବାଇକ୍ ଆମ୍ବୁଲାନ୍ସ ଅନେକ ସମୟରେ ଲୋକଙ୍କୁ ସହାୟତା କରୁଥିବା ବେଳେ ଯେଉଁଠି ସମ୍ପୂର୍ଣ୍ଣ ରାସ୍ତାଟିଏ ନାହିଁ ସେଠି ଦୋଳା ଭରସା ହୋଇଥାଏ। ଏଭଳି ଘଟଣା ଦେଖିବାକୁ ମିଳିଛି ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା ବୁଡ଼ାଗୁଡା ପଞ୍ଚାୟତ ଅଞ୍ଚଳରେ। ରାସ୍ତା ନ ଥିବାରୁ ଶୁକ୍ରବାର ଜଣେ ଗର୍ଭବତୀଙ୍କୁ ସମ୍ପର୍କୀୟମାନେ ୪ କି.ମି ଦୋଳାରେ ବୁହାଇ ନେଇଥିଲେ। ଉକ୍ତ ଅଞ୍ଚଳର ମାଣ୍ଡେମାହା ଗ୍ରାମର ଅଜୟ ମଲିକଙ୍କ ସ୍ତ୍ରୀ ରିବିକାଙ୍କ ପ୍ରସବ ଯନ୍ତ୍ରଣା ହୋଇଥିଲା। ସେଠାରୁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଦୂରତା ପ୍ରାୟ ୧୫ କିଲୋମିଟର ହୋଇଥିବା ବେଳେ ୪ କିଲୋମିଟର ରାସ୍ତା ନଥିବାରୁ ଦୋଳାରେ ତାଙ୍କୁ ନିଜ ଗ୍ରାମରୁ ସରୁଲାଇ ଗ୍ରାମ ପର୍ଯ୍ୟନ୍ତ ପରିବାର ଓ ସମ୍ପର୍କୀୟମାନେ ବୋହି ଆଣିଥିଲେ। ଯେତେବେକେ ସେ ସରୁଲାଇରେ ପହଞ୍ଚିଲେ, ଖବର ପାଇ ଉକ୍ତ ଅଞ୍ଚଳରେ ଜାଗୃତି ସ୍ବେଚ୍ଛାସେବୀ ଅନୁଷ୍ଠାନ ଦ୍ୱାରା ପରିଚାଳିତ ବାଇକ୍ ଆମ୍ବୁଲାନ୍ସ ଆସି ପହଞ୍ଚିଲା ଓ ରିବିକାଙ୍କୁ ବୁଡ଼ାଗୁଡା ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଇଥିଲା। ରିବିକାଙ୍କ ସ୍ବାସ୍ଥ୍ୟ ଅବସ୍ଥା ଏବେ ସ୍ଥିର ରହିଥିବା ବେଳେ ସେ ଏକ କନ୍ୟା ସନ୍ତାନଟିଏ ଜନ୍ମ ଦେଇଛନ୍ତି। ସୂଚନାଯୋଗ୍ୟ, ଉକ୍ତ ଅଞ୍ଚଳରେ ଏହା ଦିନିକିଆ ଘଟଣା ନୁହଁ, ନିତିଦିନିଆ ଘଟଣା ପାଲଟିଛି। ବ୍ରାହ୍ମଣୀଗାଁ ଥାନା ଅଞ୍ଚଳ ସମେତ ବୁଡ଼ାଗୁଡା ଭଳି ଦୁର୍ଗମ ଅଞ୍ଚଳରେ ସବୁଦିନିଆ ଭଲ ରାସ୍ତାଟିଏ ନ ଥିବାରୁ ଏଭଳି ଅନେକ ରିବିକା କଷ୍ଟ ଭୋଗୁଛନ୍ତି। ତେବେ ଉକ୍ତ ବ୍ଲକ ଅଞ୍ଚଳରେ ୨୫ ପଞ୍ଚାୟତ ରହିଥିବା ବେଳେ ମାତ୍ର ଦୁଇଟି ବାଇକ୍ ଆମ୍ବୁଲାନ୍ସ ସ୍ବେଚ୍ଛାସେବୀ ଅନୁଷ୍ଠାନଗୁଡ଼ିକ ଦ୍ୱାରା ରହିଛି। ଏହି ସଂଖ୍ୟା ବୃଦ୍ଧି କରାଗଲେ ଅଞ୍ଚଳରେ ଅନେକ ଗର୍ଭବତୀବିପଦମୁକ୍ତ ଭାବେ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିପାରିବେ ବୋଲି କୁହାଯାଉଛି।