ବାଲେଶ୍ୱର ଅଫିସ, ୩।୮: ବାଲେଶ୍ୱର ଜିଲା ରେମୁଣା ବ୍ଲକ ବଡ଼ପାଳ ପଞ୍ଚାୟତ ତୋଭାପାଳ ସାହିର ଲୋଧା ସିଂ (୪୬)ଙ୍କ ପରିବାରରେ ଏବେ ଦେଖାଦେଇଛି ଦୁଃଖର ଝଡ। ଠିକ୍ ୩ ବର୍ଷ ପୂର୍ବେ ପରିସ୍ଥିତି ପୂରା ଓଲଟା ଥିଲା। ହସ ଖୁସରେ ପରିବାର ଚଳୁଥିଲା। ହେଲେ ଦୁର୍ଘଟଣାରେ ଲୋଧାଙ୍କ ଶରୀରର ଅର୍ଦ୍ଧାଧିକ ଅଙ୍ଗ ଅକାମୀ ହୋଇଯିବା ପରେ ଏବେ ସେ ଶଯ୍ୟାଶାୟୀ। ଚିକିତ୍ସା ଖର୍ଚ୍ଚ ତୁଲାଇବାକୁ ପରିବାର ଲୋକେ ଅସମର୍ଥ ଥିବା ବେଳେ ସରକାରୀ କିମ୍ବା ବେସରକାରୀ ସ୍ତରରେ କୌଣସି ସହାୟତା ମିଳିନାହିଁ।
ଲୋଧାଙ୍କ ପରିବାର କହିଲେ ସ୍ତ୍ରୀ ଆଉ ୨ନାବାଳକ ପୁଅ। ସ୍ତ୍ରୀ ଘର ସମ୍ଭାଳିବା ସହ ପିଲାମାନଙ୍କ ପାଠପଢ଼ା ଦାୟିତ୍ୱ ବୁଝୁଥିଲେ। ଲୋଧା କାମକୁ ଯାଉଥିବା ବେଳେ କୌଣସି କାରଣରୁ ପୋଲ ତଳକୁ ଖସିପଡ଼ି ଦୁର୍ଘଟଣାଗ୍ରସ୍ତ ହୋଇଥିଲେ। ସେ ଗୁରୁତର ଆହତ ହୋଇ ଦୀର୍ଘଦିନ ଧରି ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହୋଇଥିଲେ। ଦୀର୍ଘଦିନ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ସମୟରେ ପରିବାରର ସନ୍ତୁଳନ ବିଗିଡିଯାଇଥିଲା। ପିଲାମାନଙ୍କ ପାଠପଢା ବନ୍ଦ ହେବା ସହ ସ୍ତ୍ରୀ ହସ୍ପିଟାଲ ଓ ଘର କାମରେ ସମୟ ବିତିଯାଇଥିଲା। ଏହାପରେ ମଧ୍ୟ ଲୋଧା ସମ୍ପୂର୍ଣ୍ଣ ଭଲ ହୋଇପାରିଲେ ନାହଁି। ଡାକ୍ତର କଟକ ସ୍ଥାନାନ୍ତରିତ କରିବାକୁ ବାଧ୍ୟ ହେଲେ। ଆର୍ଥିକ ଏବଂ ମଣିଷ ବଳ ନ ଥିବାରୁ ବାଧ୍ୟ ହୋଇ ତାଙ୍କୁ ପରିବାର ଲୋକେ ଘରକୁ ନେଇଆସିଥିଲେ। ଘର ଚଳାଇବା ପାଇଁ ସ୍ତ୍ରୀ ଦିନ ମଜୁରିଆ ଭାବେ କାମ କରୁଛନ୍ତି। କେତେବେଳେ କାମ ମିଳୁଛି, ତ ପୁଣି କେତେବେଳେ ନାହଁି। ସ୍ତ୍ରୀଙ୍କ ସ୍ବଳ୍ପ ରୋଜଗାରରେ ପରିବାରର ଭରଣପୋଷଣ ଯେନତେନ ପ୍ରକାର ହେଉଛି।
ଲୋଧା କହନ୍ତି, ସ୍ତ୍ରୀ କାମ କରି ଯାହା ଆଣୁଛନ୍ତି ସେଥିରେ ଦୁଖେକଷ୍ଟେ ଚଳୁଛୁ। ଆର୍ଥିକ ଅବସ୍ଥା ଖରାପ ଥିବାରୁ ପିଲାମାନେ ମଧ୍ୟ ପାଠ ପଢ଼ିପାରୁ ନାହାନ୍ତି। ପଞ୍ଚାୟତ ନିର୍ବାଚନ ସମୟର ସ୍ଥାନୀୟ ନେତାମାନେ ଭିନ୍ନକ୍ଷମ ପରିଚୟପତ୍ର ସହ ଇନ୍ଦିରା ଆବାସ, ଅନ୍ତ୍ୟୋଦୟ କାର୍ଡ଼ କରିଦେବାର ପ୍ରତିଶ୍ରୁତି ଦେଇଥିଲେ, ହେଲେ ଏଯାଏ ମିଳିନି। ଏପରିକି ଔଷଧ ଖାଇବା ପାଇଁ ଟଙ୍କା ମିଳୁ ନାହଁି। ଭଗବାନଙ୍କ ଭରସାରେ ପଡ଼ି ରହୁଛୁ। ସରକାରୀ ସହାୟତା ଯୋଗାଇଦେବାକୁ ସେ ନିବେଦନ କରିଛନ୍ତି।