ମୁମ୍ବାଇ,୫।୧୨: ମହାରାଷ୍ଟ୍ରରେ ମହା ସସପେନ୍ସ ଶେଷ ହୋଇଛି। ଗୁରୁବାର ଦେବେନ୍ଦ୍ର ଫଡନଭିସ ଶପଥ ଗ୍ରହଣ କରିବାକୁ ଯାଉଛନ୍ତି। କକିନ୍ତୁ ଶପଥ ଗ୍ରହଣ ପୂର୍ବରୁ ଶିବସେନା ମୁଖ୍ୟ ଏକନାଥ ଶିନ୍ଦେ ପୁଣି ଚିନ୍ତା ବଢାଇଛନ୍ତି। ଶିନ୍ଦେ ଉପମୁଖ୍ୟମନ୍ତ୍ରୀ ହେବାକୁ ରାଜି ହୋଇଛନ୍ତି, ହେଲେ ଗୃହ ମନ୍ତ୍ରଣାଳୟର ଦାବି ଉପରେ ସେ ଏପର୍ଯ୍ୟନ୍ତ ଅଡି ବସିଛନ୍ତି। ଫଡନଭିସ ଉପମୁଖ୍ୟମନ୍ତ୍ରୀ ଥିବାବେଳେ ମଧ୍ୟ ତାଙ୍କର ଏହି ବିଭାଗ ଥିଲା।
ଗତକାଲି ଶିନ୍ଦେଙ୍କୁ ଉପମୁଖ୍ୟମନ୍ତ୍ରୀ କରିବାର ଘୋଷଣା କରାଯାଇଥିଲା, କିନ୍ତୁ ସରକାରରେ ତାଙ୍କର ଭୂମିକା କ’ଣ ହେବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ତେବେ ଶିବସେନା ଏକ ଚିଠି ଦେଇ ଫଡନଭିସ ସରକାରଙ୍କୁ ଆନୁଷ୍ଠାନିକ ଭାବେ ସମର୍ଥନ କରିଛି। ଦୀର୍ଘ ଦିନ ଧରି ଗୃହ ମନ୍ତ୍ରଣାଳୟର ଦାବି ଉପରେ ଏକନାଥ ଶିନ୍ଦେ ଜିଦ ଧରିଛନ୍ତି।
ଏକ ଜାତୀୟ ଗରମାଧ୍ୟମ ରିପୋର୍ଟ ଅନୁଯାୟୀ, ଗୃହ ମନ୍ତ୍ରଣାଳୟ ସହିତ ଶିବସେନାକୁ ୧୨ଟି ମନ୍ତ୍ରଣାଳୟ ଦେବାକୁ ସେ ଦାବି କରୁଛନ୍ତି। ଶିବସେନା ନେତାମାନେ କହିଛନ୍ତି ଯେ ସିଏମ ପଦବୀ ପାଇ ନ ଥିବାରୁ ବର୍ତ୍ତମାନ ଗୃହ ମନ୍ତ୍ରଣାଳୟ ହେଉଛି ଏକମାତ୍ର ଦାୟିତ୍ୱ ଯାହା ଶିନ୍ଦେଙ୍କ ପାଇଁ ଉପଯୁକ୍ତ ହେବ। ଯଦି ଫଡନଭିସ ଗୃହ ମନ୍ତ୍ରଣାଳୟ ଛାଡିବେ ନାହିଁ, ତେବେ ଶିନ୍ଦେଙ୍କୁ ସହରୀ ବିକାଶ, ରାଜସ୍ବ କିମ୍ବା ଶକ୍ତି ପୋର୍ଟଫୋଲିଓ ଦିଆଯାଇପାରେ। ଏହି କାରଣରୁ ଶିନ୍ଦେ ଗୃହ ବିଭାଗ ଚାହୁଁଛନ୍ତି।
ଜଣେ ଶିବସେନା ନେତା ଗଣମାଧ୍ୟମକୁ କହିଛନ୍ତି, ଶିନ୍ଦେ ପୂର୍ବରୁ ପୋଲିସ, ସିଭିଲ ଆଡମିନିଷ୍ଟ୍ରେସନ ଏବଂ ନଗର ଉନ୍ନୟନର ପୋର୍ଟଫୋଲିଓ ରଖିଥିଲେ, କିନ୍ତୁ ମୁଖ୍ୟମନ୍ତ୍ରୀ ହୋଇଥିବାରୁ ସେ ସରକାରଙ୍କ ଉପରେ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିଥିଲେ ଏବଂ ଫଡନଭିସ ଶକ୍ତିହୀନ ରହିଥିଲେ। ବର୍ତ୍ତମାନ ଫଡନଭିସ ମୁଖ୍ୟମନ୍ତ୍ରୀ ହୋଇ ସରକାରରେ ପ୍ରାଧାନ୍ୟ ବିସ୍ତାର କରିବେ। ତେଣୁ ଶିନ୍ଦେ ଗୃହ ମନ୍ତ୍ରଣାଳୟ ପରି ଏକ ବଡ ବିଭାଗ ଚାହୁଁଛନ୍ତି।