ସବୁ ଗୁଣ୍ଡ କରିବୁ, ମନ୍ତ୍ରୀ ଆସିବା ପୂର୍ବରୁ ବାଡେଇ ବାଡେଇ ଫଳକ ଭାଙ୍ଗିଦେଲେ ବ୍ଲକ୍ ଅଧ୍ୟକ୍ଷା
09 ପାଲଲହଡ଼ା,୨୮।୧୦ (ଦିବ୍ୟଜ୍ୟୋତି ଦାଶ): ଅନୁଗୋଳ ଜିଲା ପାଲଲହଡ଼ା ବ୍ଲକରେ ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାଏକଙ୍କ ଦ୍ୱାରା ରବିବାର ବିଭିନ୍ନ ଉନ୍ନୟନ ପ୍ରକଳ୍ପ ଉଦ୍ଘାଟନ ହେବାର କାର୍ଯ୍ୟକ୍ରମ ରହିଥିଲା। ତେବେ ଅନେକ ଉଦଘାଟନୀ ଫଳକରେ ବ୍ଲକ ଅଧ୍ୟକ୍ଷା ରୀନାରାଣୀ ନାୟକଙ୍କ ନାମ ନ ଥିଲା। ତେଣୁ ଏହିସବୁ ଫଳକକୁ ଅଧ୍ୟକ୍ଷା ଭାଙ୍ଗିଦେବା ସହିତା ମନ୍ତ୍ରୀଙ୍କ ଗସ୍ତକୁ ବିରୋଧ କରିଥିଲେ। ବ୍ଲକର ସମସ୍ତ ଜିଲାପରିଷଦ, ସରପଞ୍ଚ ଏବଂ ସମିତିସଭ୍ୟଙ୍କୁ ସାଙ୍ଗରେ ନେଇ ଅଧ୍ୟକ୍ଷା ନାଏକ ପ୍ରଥମେ ସ୍ଥାନୀୟ ଶିବମନ୍ଦିରରେ ପହଞ୍ଚିଥିଲେ। ସେଠାରେ ମନ୍ଦିର ଉନ୍ନତୀକରଣ କାର୍ଯ୍ୟ ଉଦଘାଟନ ପାଇଁ ନିର୍ମିତ ଫଳକକୁ ଭାଙ୍ଗିଥିଲେ ଏବଂ ମନ୍ତ୍ରୀଙ୍କ କାର୍ଯ୍ୟକ୍ରମକୁ ବିରୋଧ କରିଥିଲେ। ପରେ ଉପଖଣ୍ଡ ଡାକ୍ତରଖାନା ପରିସରରେ ଉଦ୍ଘାଟନୀ ଫଳକକୁ ଭାଙ୍ଗିଦେଇଥିଲେ। ଅଧ୍ୟକ୍ଷା ନାଏକ ଜିଲ୍ଲାପରିଷଦ ସଭ୍ୟା ସାବିତ୍ରୀ ମାଝୀ, ସଦସ୍ୟ ବୁଦ୍ଧୁରାମ ବୋଇପାଇ, ବିଭିନ୍ନ ପଞ୍ଚାୟତର ସରପଞ୍ଚ, ସମିତି ସଭ୍ୟ ଏବଂ ଦଳୀୟ କର୍ମୀମାନେ ପ୍ରକଳ୍ପ ଉଦଘାଟନ ସ୍ଥାନରେ ପହଞ୍ଚି ଫଳକଗୁଡିକୁ ଭାଙ୍ଗିଦେଇଥିଲେ। ପୂର୍ବ ସରକାର ଅମଳରେ ପାଲଲହଡ଼ା ଶିବ ମନ୍ଦିରର ଉନ୍ନତୀକରଣ ପାଇଁ ୧୦ ଲକ୍ଷ ଟଙ୍କା ଏବଂ ଗାୟତ୍ରୀ ମନ୍ଦିର ପାଇଁ ୪ ଲକ୍ଷ ଟଙ୍କା ‘ଆମ ଓଡ଼ିଶା ନବୀନ ଓଡିଶା’ ଯୋଜନାରେ ଦିଆଯାଇଥିଲା ଏବଂ ପାଲଲହଡ଼ା ପଞ୍ଚାୟତ ସମିତିର ସହଯୋଗରେ କାର୍ଯ୍ୟ ମଧ୍ୟ ସମ୍ପୂର୍ଣ୍ଣ ହୋଇସାରିଥିଲା। ମାତ୍ର ଟଙ୍କାଟିଏ ମଧ୍ୟ ଅନୁଦାନ ନଦେଇ ପଞ୍ଚାୟତ ସମିତିକୁ ଅପମାନିତ କରି ସ୍ଥାନୀୟ ବିଧାୟକ, ମନ୍ତ୍ରୀଙ୍କୁ ଡାକି ବିଭିନ୍ନ ପ୍ରକଳ୍ପ ଉଦଘାଟନ କରିବାକୁ ବିରୋଧ କରି ଫଳକକୁ ଭାଙ୍ଗି ଦେଇଛି ବୋଲି ଅଧ୍ୟକ୍ଷା ନାଏକ ପ୍ରକାଶ କରିଥିଲେ। ସେହିପରି ଉପଖଣ୍ଡ ଡାକ୍ତରଖାନା ପରିସରରେ ଉଦ୍ଘାଟନ ହେବାକୁ ଥିବା ଫଳକକୁ ପୋଲିସ ସୁରକ୍ଷା ଦେଇଥିଲା। ବ୍ଲକ ଅଧ୍ୟକ୍ଷା ସେଠାରେ ପହଞ୍ଚତ୍ବା ପୂର୍ବରୁ ଡାକ୍ତରଖାନାର ମୁଖ୍ୟ ଫାଟକକୁ ପୋଲିସ ବନ୍ଦ ରଖିଥିଲା, ଯାହାକୁ ନେଇ ପୋଲିସ ଏବଂ ଲୋକପ୍ରତିନିଧିଙ୍କ ମଧ୍ୟରେ କିଛି ସମୟ ଗଣ୍ଡଗୋଳ ଦେଖିବାକୁ ମିଳିଥିଲା। ପରେ ଅଧ୍ୟକ୍ଷା ନାୟକ ଏବଂ ବିଜୁ ଜନତା ଦଳ କର୍ମୀମାନେ ଜୋରଜବରଦସ୍ତ ଡାକ୍ତରଖାନା ପରିସରରେ ଧସେଇ ପଶି ଉକ୍ତ ଫଳକକୁ ମଧ୍ୟ ଭାଙ୍ଗିଦେଇଥିଲେ। ତେବେ ନିର୍ଦ୍ଧାରିତ ସମୟରେ ମନ୍ତ୍ରୀ ନାଏକ, ଏମପି ରୁଦ୍ରନାରାୟଣ ପାଣି, ବିଧାୟକ ଅଶୋକ ମହାନ୍ତି ଶିବ ମନ୍ଦିର ଏବଂ ଡାକ୍ତରଖାନା ପରିସରକୁ ଯାଇ ରିବନ କାଟି ପ୍ରକଳ୍ପ ଉଦଘାଟନ କରିଥିଲେ I