ଖୋର୍ଦ୍ଧା ଅଫିସ,୧୯। ୭: ଖୋର୍ଦ୍ଧା ଜିଲା ବାଘମାରିସ୍ଥିତ ହଟକେଶ୍ୱର ମହାଦେବଙ୍କ ପ୍ରାଙ୍ଗଣରେ ରୁହନ୍ତି ଗଞ୍ଜାମ ଜିଲାର ରଘୁ ରାଉତ। ବୟସ ୭୦ ଟପିଲାଣି। ଦୃଷ୍ଟିବାଧିତ ହୋଇଥିଲେ ମଧ୍ୟ ସେ ଆଶା ହରାଇ ନାହାନ୍ତି। ଜୀବନ ଯୁଦ୍ଧରେ ଯୋଦ୍ଧାଟିଏ ସାଜି ଜାରି ରଖିଛନ୍ତି ସଂଘର୍ଷ। ଭିକ୍ଷା ମାଗି ରଘୁ ଶନି ମନ୍ଦିର ତୋଳିବା ପାଇଁ ୧ଲକ୍ଷ ଟଙ୍କା ଦାନ କରିଛନ୍ତି। ଯାହାକୁ ନେଇ ବାଘମାରି ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଦୃଢ ଇଚ୍ଛା ଶକ୍ତି ଆଗରେ ବୟସ ଓ ଅକ୍ଷମତା କିଭଳି ତୁଚ୍ଛ ହୋଇଯାଏ ତାହାର ଉଦାହରଣ ସାଜିଛନ୍ତି।
ସୂଚନାଥାଉ କି, ଗଞ୍ଜାମ ଜିଲାରେ ରଘୁଙ୍କ ଘର ହୋଇଥିବା ବେଳେ ପିଲାବେଳୁ ଦୃଷ୍ଟିହୀନର ଶିକାର ହୋଇ ପରିବାର ଦ୍ୱାରା ଲାଞ୍ଛିତ ହୋଇ ଗଁାରୁ ପଳାଇ ଆସିଥିଲେ। ପ୍ରାୟ ୧୦ବର୍ଷ ହେବ ସେ ହଟକେଶ୍ୱର ମନ୍ଦିର ପ୍ରାଙ୍ଗଣରେ ରହୁଛନ୍ତି। ଦୃଷ୍ଟିବାଧିତ ହୋଇଥିବାରୁ ସେ ଦିନରେ ବୁଲିବୁଲି ଭିକ୍ଷା କରିବା ପରେ ସନ୍ଧ୍ୟା ହେଲେ ମହାଦେବଙ୍କ ମନ୍ଦିର ନିକଟରେ ବିଶ୍ରାମ ନେଇଥାନ୍ତି। ଏକଦା ମନ୍ଦିର ନିକଟରେ ବିଶ୍ରାମ ନେବା ସମୟରେ ଶନି ମନ୍ଦିର ତୋଳିବା ନେଇ ତାଙ୍କ ମନରେ ଆସିଥିଲା। ଏହା ପରେ ଭିକ୍ଷାବୃତ୍ତିରୁ ମିଳୁଥିବା ଅର୍ଥ ସଞ୍ଚୟ କରିବା ସହ ସ୍ଥାନୀୟ ବାସିନ୍ଦାଙ୍କ ସହଯୋଗରେ ଶନି ମନ୍ଦିର ନିର୍ମାଣ ଆରମ୍ଭ କରିଛନ୍ତି। ରଘୁ ପ୍ରଥମ ପର୍ଯ୍ୟାୟରେ ୫୦ହଜାର, ପରବର୍ତ୍ତୀ ସମୟରେ ୫୦ହଜାର ଟଙ୍କା ମନ୍ଦିର ନିର୍ମାଣ ଲାଗି ଦାନ କରିଛନ୍ତି। କରୋନା କଟକଣା ପାଇଁ ଗତ ୪ମାସ ହେବ ଭିକ୍ଷାବୃତ୍ତି ବନ୍ଦ ରହିଥିବା ବେଳେ ମନ୍ଦିର ପ୍ରାଙ୍ଗଣରେ ମହାଦେବଙ୍କୁ ସ୍ମରଣ କରି ତାଙ୍କର ଦିନ କଟିଯାଉଛି। ମହାଦେବ ଓ ଶନିଦେବଙ୍କ କୃପାରୁ ମନ୍ଦିର କାର୍ଯ୍ୟ ସମ୍ପର୍ଣ୍ଣ ହେବ। ମହାପ୍ରଭୁଙ୍କୁ ସମର୍ପଣ ଭାବ ନେଇ ଭକ୍ତି କଲେ ସଫଳତା ନିଶ୍ଚିତ ମିଳିବ ବୋଲି ରଘୁ କହିଛନ୍ତି। ଏ ସମ୍ପର୍କରେ ହଟକେଶ୍ୱର ମନ୍ଦିର ଟ୍ରଷ୍ଟି ଅକ୍ରୁର ରଣା କହିଛନ୍ତି, ରଘୁଙ୍କ କାର୍ଯ୍ୟ ପ୍ରଶଂସନୀୟ, ସେ ଅନ୍ୟମାନଙ୍କ ଲାଗି ପ୍ରେରଣାର ଉତ୍ସ ପାଲଟିଛନ୍ତି। ଋଷି ପ୍ରତିମ ପରି ମଣିଷଟିଏ। କେହି ଭିକ୍ଷା ଦେଉ କି ନ ଦେଉ, କାହା ପ୍ରତି ତାଙ୍କ ମନରେ କୌଣସି ଦ୍ୱେଷ ନାହିଁ। ଏ ବୟସରେ ମଧ୍ୟ ଈକକଶ୍ୱରଙ୍କ ପ୍ରତି ତାଙ୍କ ନିଷ୍ଠା, ସମର୍ପଣ ଭାବ ଦେଖିଲେ ଗର୍ବ ଅନୁଭବ ହୁଏ। ତାଙ୍କୁ ଯେତେ ପ୍ରଂଶସା କଲେ ମଧ୍ୟ କମ୍ ହେବ ବୋଲି ସେ କହିଛନ୍ତି।