ଖୋର୍ଦ୍ଧା,୧୪।୪(ପ୍ରଭାତ ପାଣିଗ୍ରାହୀ)ଭୁବନେଶ୍ୱର ଲୋକ ସଭା ନିର୍ବାଚନ ପାଇଁ ମେ’୨୫ ତାରିଖରେ ମତଦାନ ହେବ। ନିର୍ବାଚନ ତାରିଖ ପାଖେଇ ଆସୁଥିବାବେଳେ ଟିକେଟ ଆଶାୟୀଙ୍କ ସଂଖ୍ୟା ବଢ଼ିଚାଲିଛି। ଏହି ସଂସଦୀୟ କ୍ଷେତ୍ର ଅନ୍ତର୍ଗତ ଭୁବନେଶ୍ୱର ଏକାମ୍ର, ମଧ୍ୟ, ଉତ୍ତର, ଜୟଦେବ ଏବଂ ଜଟଣୀ ନିର୍ବାଚନମଣ୍ଡଳୀ ପାଇଁ ବିଜେଡି ଏବଂ ଭାଜପା ପକ୍ଷରୁ ପ୍ରାର୍ଥୀ ଘୋଷଣା ସରିଛି। ତେବେ ଖୋର୍ଦ୍ଧା ଓ ବେଗୁନିଆରେ ପ୍ରାର୍ଥିତ୍ୱକୁ ନେଇ ୩ଦଳ ଆଶା ଆଶଙ୍କାରେ ରହିଛନ୍ତି। ପ୍ରାର୍ଥୀ ଘୋଷଣା ଅଙ୍କ ଛିଣ୍ଡୁ ନ ଥିବାବେଳେ ଆଶାୟୀ ପ୍ରାର୍ଥୀମାନେ ରାଜ୍ୟ କାର୍ଯ୍ୟାଳୟରେ ଡେରା ପକାଇଛନ୍ତି। ସେହିପରି ପୁରୀ ଲୋକ ସଭା ଅନ୍ତର୍ଗତ ଚିଲିକା ଆସନ ମଧ୍ୟ ଝୁଲାରେ ରହିଛି।
ଜିଲାର ଏକ ପ୍ରମୁଖ ଆସନ ହେଉଛି ଖୋର୍ଦ୍ଧା। ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର ଚଳିତ ନିର୍ବାଚନରେ ବିଧାୟକ ଦୌଡ଼ରେ ରହିଥିବାବେଳେ ବେଗୁନିଆ ବିଧାୟକ ରାଜେନ୍ଦ୍ର ସାହୁ ଏଠାରୁ ଲଢ଼ିବା ପାଇଁ ଆଶାୟୀ ରହିଛନ୍ତି। ସେହିପରି ଗତ ୨ବର୍ଷ ଧରି ସଙ୍ଗଠନ କରି ଆସିଥିବା ବାସନ୍ତୀ ମହାପାତ୍ର ମଧ୍ୟ ପ୍ରମୁଖ ଦାବିଦାର ରହିଛନ୍ତି। ଏପରି କି ନିକଟରେ ବାସନ୍ତୀ ନିଜ ସମର୍ଥକଙ୍କୁ ନେଇ ଶଙ୍ଖ ଭବନ ଆଗରେ ଶକ୍ତି ପ୍ରଦର୍ଶନ କରିଥିଲେ। ସେପଟେ ଭାଜପାରେ ଗୋଷ୍ଠୀ କନ୍ଦଳ ବିଜେଡିକୁ ସୁହାଇବ ବୋଲି ଚର୍ଚ୍ଚା ହେଉଛି। ଦଳରେ ଏମ୍ପି ଅପରାଜିତା ଷଡ଼ଙ୍ଗୀଙ୍କୁ ନେଇ ଗୋଷ୍ଠୀ କନ୍ଦଳ ବଢ଼ିବାରେ ଲାଗିଛି। ଅପରାଜିତାଙ୍କ ପ୍ରଶାନ୍ତ ପ୍ରୀତିକୁ ନେଇ ଆଶାୟୀ ପ୍ରାର୍ଥୀ ନିକଟରେ ସମର୍ଥକଙ୍କୁ ନେଇ ରାଜ୍ୟ କାର୍ଯ୍ୟାଳୟ ଆଗରେ ହୋହଲ୍ଲା କରିଥିବା ବେଳେ ଖୋର୍ଦ୍ଧାରେ ଅସନ୍ତୁଷ୍ଟ କର୍ମୀ ଜନସମ୍ପର୍କ ଯାତ୍ରା ଆଳରେ ଅପରାଜିତାଙ୍କ ବିରୋଧରେ ମେଳି ବାନ୍ଧିଥିବା ଚର୍ଚ୍ଚା ହେଉଛି। ସେହିପରି ଅନ୍ୟତମ ଆସନ ହେଉଛି ବେଗୁନିଆ। ଏଠାରୁ ରାଜେନ୍ଦ୍ର ସାହୁ ବିଧାୟକ ଅଛନ୍ତି। ଚଳିତ ନିର୍ବାଚନରେ ପ୍ରଦୀପ ସାହୁ ଟିକେଟ ଆଶାୟୀଙ୍କ ମଧ୍ୟରେ ଆଗରେ ରହିଥିବାବେଳେ ଏଠାରେ ମଧ୍ୟ ଆଶାୟୀଙ୍କ ଲମ୍ବାଧାଡ଼ି ରହିଛି। ଖୋର୍ଦ୍ଧାରୁ ଟିକେଟ ନ ପାଇଲେ ପୁଣି ଥରେ ବେଗୁନିଆରୁ ଲଢିପାରନ୍ତି ରାଜେନ୍ଦ୍ର। ନିକଟରେ ପ୍ରଦୀପ ଏବଂ ରାଜେନ୍ଦ୍ର ନିଜ ସମର୍ଥକଙ୍କ ସହ ଶଙ୍ଖ ଭବନ ଆଗରେ ଶକ୍ତି ପ୍ରଦର୍ଶନ କରିଥିଲେ। ସେପଟେ କଂଗ୍ରେସର ପୃଥ୍ବୀବଲ୍ଲଭ ପଟ୍ଟନାୟକ ଦୁଇ ବର୍ଷ ହେବ ତୃଣମୂଳସ୍ତରରେ କର୍ମୀଙ୍କୁ ଏକାଠି କରି ଗାଁ କୁ ଗାଁ ବୁଲୁଛନ୍ତି। ଅନ୍ୟପଟେ ଭାଜପାର ଯୁବନେତା ପ୍ରକାଶ ରଣବିଜୁଳି ଟିକେଟ ଆଶାୟୀ ରହିଥିବା ବେଳେ ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କୁ ଦଳ କୁଆଡେ ଠିଆ କରାଇବା ପାଇଁ ଯୋଜନା କରୁଥିବା ଜଣାପଡ଼ିଛି। ଏଠି ମଧ୍ୟ ଅପରାଜିତାଙ୍କୁ ନେଇ କୁହୁଳୁଥିବା ଅସନ୍ତୋଷରୁ ଦଳରେ ଫାଟ ସୃଷ୍ଟି ହୋଇଛି। ଅପରାଜିତାଙ୍କ କଳିରେ ବିଜେଡି ଗୋଳିଆ ପାଣିରୁ ଫାଇଦା ମାରିବା ସମ୍ଭାବନା ରହିଛି।
ଅନ୍ୟପଟେ ପୁରୀ ଲୋକ ସଭା ଅନ୍ତର୍ଗତ ଚିଲିକା। ଏଠାରେ ମଧ୍ୟ ବିଜେଡି କାହାକୁ ପ୍ରାର୍ଥୀ କରିବ ତାହାକୁ ନେଇ ପ୍ରଶ୍ନବାଚୀ ହୋଇ ରହିଛି। ଭାଜପା ପୃଥ୍ବୀରାଜ ହରିଚନ୍ଦନଙ୍କ ନାଁ ଘୋଷଣା କରିସାରିଥିବା ବେଳେ ବିଜେଡି କାହାକୁ ଏଥର ପ୍ରାର୍ଥୀ କରିବ, ସମସ୍ତଙ୍କ ନଜର ରହିଛି। ଏଠାରୁ ବିଜେଡି ମୁଖପାତ୍ର ମାନସ ମଙ୍ଗରାଜ ଏବଂ ଶ୍ରୀମୟୀ ମିଶ୍ରଙ୍କ ନାଁ ଚର୍ଚ୍ଚାରେ ରହିଛି। ପୂର୍ବତନ ଏମ୍ପି ପ୍ରସନ୍ନ ପାଟଶାଣୀଙ୍କ ନାଁ ଚର୍ଚ୍ଚାକୁ ଆସିବା ପରେ ଚିଲିକାରେ ଏନେଇ ଦଳରେ ପ୍ରବଳ ବିରୋଧ ସ୍ବର ଉଠିଥିଲା। ସେପଟେ ପୂର୍ବତନ ବିଧାୟକ ରଘୁନାଥ ସାହୁ ମଧ୍ୟ ଟିକେଟ ଆଶାୟୀ ରହିଛନ୍ତି। ପ୍ରସନ୍ନଙ୍କ ପ୍ରାର୍ଥତ୍ତ୍ୱକୁ ବିରୋଧ କରି ରଘୁଙ୍କ ସମର୍ଥକ ଶଙ୍ଖ ଭବନ ଆଗରେ ହୋହଲ୍ଲା କରିଥିଲେ। ତେବେ ଦଳ କାହାକୁ ପ୍ରାର୍ଥୀ କରିବ, ତାହାକୁ ନେଇ ଏବେ ସନ୍ଦେହରେ ରହିଛି।