ଓ୍ବାଶିଂଟନ, ୨୨।୫ : ରୁଷିଆ ୟୁକ୍ରେନ୍ ମଧ୍ୟରେ ଯୁଦ୍ଧ ୪ ମାସରେ ପହଞ୍ଚିଛି। ତେବେ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି ଯେ, ରୁଷିଆ ସହିତ ଆମେରିକା ଛାୟାଯୁଦ୍ଧ ଲଢୁଛି। ଆମେରିକା ୟୁକ୍ରେନ୍ ପଛରେ ରହି ଏଭଳି କରୁଛି। ୟୁକ୍ରେନ୍ କୁ ଅସ୍ତ୍ରଶସ୍ତ୍ର, ଟଙ୍କା ଯୋଗାଣ ବୃଦ୍ଧି ଏବଂ ଏପରିକି ଗୁପ୍ତରେ ୟୁକ୍ରେନକୁ ସୈନ୍ୟ ପଠାଇବା ସୂଚାଇ ଦେଉଛି ଯେ ଆମେରିକା ନାଟୋ ସହଯୋଗରେ ରୁଷିଆ ବିରୁଦ୍ଧରେ ଏକ ଛାୟା ଯୁଦ୍ଧ ଜାରି ରଖିଛି। ୟୁକ୍ରେନକୁ କେବଳ ବଳିର ଛେଳି ଭାବେ ବ୍ୟବହାର କରାଯାଉଛି।
ଫେବୃଆରୀ ୨୪ ରେ ଆରମ୍ଭ ହୋଇଥିବା ରୁଷୋ-ୟୁକ୍ରେନ ଯୁଦ୍ଧର ସମାପ୍ତି ହେବାର କୌଣସି ଲକ୍ଷଣ ଦେଖାଯାଉ ନାହିଁ। କାରଣ ୟୁକ୍ରେନ ଉପରେ ରୁଷିଆର ଆକ୍ରମଣକୁ ପ୍ରତିହତ କରିବା ପାଇଁ ନାଟୋ ୟୁକ୍ରେନକୁ କୋଟି କୋଟି ଡଲାର ଅସ୍ତ୍ର ଯୋଗାଉଛି ଏବଂ ଆମେରିକାର ରାଷ୍ଟ୍ରପତି ୪୦ ବିଲିୟନ ଡଲାର ଚୁକ୍ତି ଘୋଷଣା କରିଛନ୍ତି। ରୁଷିଆର ପ୍ରତିରକ୍ଷା ବଜେଟ ଅପେକ୍ଷା ସମୁଦାୟ ଆମେରିକୀୟ ସହାୟତା ଅଧିକ ହୋଇଛି।
ୟୁକ୍ରେନକୁ ୪୦ ବିଲିୟନ ଆମେରିକୀୟ ଡଲାରର ସହାୟତା ପାଇଁ ଆମେରିକାର ରାଷ୍ଟ୍ରପତି ଜୋ ବାଇଡେନ ଶନିବାର ସ୍ବାକ୍ଷର କରିଛନ୍ତି। ଏହି ଆମେରିକୀୟ ଚୁକ୍ତିକୁ ଆମେରିକାର ଉଭୟ ରାଜନୈତିକ ଦଳ ସମର୍ଥନ କରିଥିଲେ ଏବଂ ଏହା ସଂସଦରେ ପାରିତ ହୋଇଛି। ଆମେରିକା କହିଛି ଯେ ଏହା ସଂସଦରେ ପାରିତ ହେବା ୟୁକ୍ରେନକୁ ସାହାଯ୍ୟ କରିବାକୁ ଆମେରିକାର ସଂକଳ୍ପବଦ୍ଧତାକୁ ଦର୍ଶାଉଛି।
ୟୁକ୍ରେନରେ ଦୀର୍ଘ ଦିନ ଧରି ଚାଲିଥିବା ବିବାଦ ବିଷୟରେ ଆମେରିକାର ଅଧିକାରୀମାନେ ମଧ୍ୟ ଚେତାବନୀ ଦେଇଛନ୍ତି। ଏହାପୂର୍ବରୁ, ୟୁକ୍ରେନକୁ ଆମେରିକା ୧୩.୬ ବିଲିୟନ ଡଲାର ସହାୟତା ପ୍ରଦାନ କରିସାରିଛି ଏବଂ ଫେବୃଆରୀରେ ୟୁକ୍ରେନ ଆକ୍ରମଣ ପରେ ଏହି ସମସ୍ତ ଆମେରିକୀୟ ସହାୟତା ପ୍ରଦାନ କରାଯାଇଛି। ଆମେରିକା ଏପର୍ଯ୍ୟନ୍ତ ୟୁକ୍ରେନକୁ ସହାୟତା ନାମରେ ୫୩.୬ ବିଲିୟନ ଡଲାର ସହାୟତା ପ୍ରଦାନ କରିଛି।