ବନ୍ତ,୧।୧୦(ହରିନାରାୟଣ ମହାନ୍ତି): ରାଜନୈତିକ ଆକ୍ରୋଶ ରଖି ଶାସକ ବିଜେଡି ତାଙ୍କୁ ବଦନାମ କରୁଛି ବୋଲି ଶନିବାର ଭଦ୍ରକ ଜିଲା ବନ୍ତଠାରେ ଖବରଦାତା ସମ୍ମିଳନୀରେ ଭାଜପା ନେତା ଡ. ସୁଧାଂଶୁ ଶେଖର ନାୟକ ଅଭିଯୋଗ ଆଣିଛନ୍ତି। ସେ ତାଙ୍କ ପତ୍ନୀ ତଥା ପୂର୍ବତନ ବ୍ଲକ ଅଧ୍ୟକ୍ଷା ରେବତୀ ନାୟକଙ୍କ ସହ ଗତ ୨୭ରେ ଭାଜପାରେ ଯୋଗଦେବା ପରେ ଶାସକ ଦଳ ତାଙ୍କୁ ଟାର୍ଗେଟ କରିଛି। ୨ ଦିନ ତଳେ ବିଜେଡି ପକ୍ଷରୁ ଏକ ଖବରଦାତା ସମ୍ମିଳନୀ ଜରିଆରେ ତାଙ୍କ ବିରୋଧରେ ବନ୍ତ ଆଞ୍ଚଳିକ ମହାବିଦ୍ୟାଳୟ ଗୃହ ନିର୍ମାଣ କାର୍ଯ୍ୟାଦେଶ ନିଜ ନାମରେ ନେବା, ବ୍ଲକ ଅଧ୍ୟକ୍ଷାଙ୍କ ଚାପ ପକାଇ କାର୍ଯ୍ୟାଦେଶ ପାଇବା, ନିମ୍ନମାନର କାର୍ଯ୍ୟ କରିବା, ଡିଗି ପୋଖରୀକୁ ବିନା ଟେଣ୍ଡରରେ ନିଜ ଲୋକଙ୍କ ନାମରେ ନେବା ଆଦି ବିଭିନ୍ନ ଅଭିଯୋଗ କରାଯାଇଥିଲା। ଶନିବାର ସୁଧାଂଶୁ ଏକ ଖବରଦାତା ସମ୍ମିଳନୀ କରି ତାହାର ଜବାବ ଦେଇଛନ୍ତି।
୨୦୧୮ରେ ମହାବିଦ୍ୟାଳୟ ନାକ୍ ମାନ୍ୟତା ପାଇବା ପାଇଁ ୪୧ ଲକ୍ଷ ଟଙ୍କା ଅନୁଦାନରେ ଗୃହ ନିର୍ମାଣ କରାଯାଇଥିଲା। ସେତେବେଳେ ସେ କଲେଜ କନ୍ଷ୍ଟ୍ରକ୍ସନ କମିଟିର ବରିଷ୍ଠ ସଦସ୍ୟ ଥିବାରୁ ତାଙ୍କ ନାମରେ କାର୍ଯ୍ୟାଦେଶ ଦେବା ପାଇଁ କଲେଜ ଅଧ୍ୟକ୍ଷ ବିଧାୟକ ଓ ଏମ୍ପିଙ୍କୁ ଚିଠି ଲେଖିଥିଲେ। ସେହି ଅନୁଯାୟୀ ତାଙ୍କ ନାମରେ କାର୍ଯ୍ୟାଦେଶ ହୋଇଥିଲା। ସେତେବେଳେ ବ୍ଲକ ଅଧ୍ୟକ୍ଷା ରେବତୀ ନାୟକ ନ ଥିବାବେଳେ କାର୍ଯ୍ୟାଦେଶ ପାଇଁ ଚାପ ପକାଇବା ପ୍ରଶ୍ନ ଉଠୁଛି କେଉଁଠୁ ବୋଲି ସେ କହିଥିଲେ। କୋଟି କୋଟି ଟଙ୍କାର କାର୍ଯ୍ୟ ବିଭାଗୀୟ କର୍ମଚାରୀଙ୍କ ନାମରେ ହେଉଥିବା ବେଳେ ଜଣେ କଲେଜ କର୍ମଚାରୀଙ୍କ ନାମରେ କାର୍ଯ୍ୟାଦେଶ ହେବାରେ ଅସୁବିଧା କେଉଁଠି ବୋଲି ସେ ପ୍ରଶ୍ନ କରିଥିଲେ। ଡିଗି ପୋଖରୀ ନିଲାମ ଲାଗି ୨୦୨୦ ଅକ୍ଟୋବର ୯ରେ ଡିଏଫ୍ଓଙ୍କ ଚିଠି ଅନୁଯାୟୀ ବିଜ୍ଞପ୍ତି ପ୍ରକାଶ ପାଇଥିଲା। ଟେଣ୍ଡର ପ୍ରକ୍ରିୟାରେ ସାମିଲ ହୋଇ ନାୟକଙ୍କ ସମ୍ପର୍କୀୟ ପୋଖରୀ ନିଲାମ ନେଇଥିବା କହିଥିଲେ। ସେଥିରେ ଚଞ୍ଚକତା କେଉଁଠୁ ଆସିଲା ବୋଲି ସୁଧାଂଶୁ କହିଛନ୍ତି। ବରିଷ୍ଠ ନେତା କମଳାକାନ୍ତ ସାହୁ, କେନ୍ଦୁଆପଦା ସରପଞ୍ଚ ଇଂ.ପ୍ରମୋଦ କୁମାର ଜେନା, ସୁଧାକର ଧଳ, ବସନ୍ତ କୁମାର ବିଶ୍ୱାଳ, ଲକ୍ଷ୍ମୀଧର କର, ସୁଧୀର କୁମାର ନାୟକ, ହରେକୃଷ୍ଣ ସେନାପତି, ହରପ୍ରସାଦ ରାଉତ, ତାପସ ଖଣ୍ଡେଇ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।