ବାସ୍ତୁଶାସ୍ତ୍ର ଅନୁଯାୟୀ, ଘରେ ଥିବା ପ୍ରତ୍ୟେକଟି ବସ୍ତୁର ପ୍ରଭାବ ଆମ ଜୀବନ ଉପରେ ପଡ଼ିଥାଏ। ସେମିତି ଏକ ବସ୍ତୁ ହେଉଛି ଘଣ୍ଟା। ସମୟ ଜାଣିବା ପାଇଁ ସାଧାରଣତଃ ଘରେ ଘଣ୍ଟା ଲଗାଯାଇଥାଏ। କିନ୍ତୁ ଏହି ଘଣ୍ଟା ଲଗାଇବା ପାଇଁ ଠିକ୍ ଦିଗ ଚୟନ କରିବା ବି ଅତ୍ୟନ୍ତ ଜରୁରୀ; ନଚେତ୍ ଏହାର ଅନେକ କୁପ୍ରଭାବ ଆମକୁ ଭୋଗିବାକୁ ହୋଇଥାଏ। ଯେମିତିକି:
* ଘଣ୍ଟାକୁ ସର୍ବଦା ଘରର ପୂର୍ବ, ପଶ୍ଚିମ ଅଥବା ଉତ୍ତର ଦିଗର କାନ୍ଥରେ ଲଗାଇବା ଦରକାର। ଯେହେତୁ ଦକ୍ଷିଣ ଦିଗ ହେଉଛି ଯମରାଜାଙ୍କର ତେଣୁ ଉକ୍ତ ଦିଗରେ ଘଣ୍ଟା ନ ଲଗାଇବା ଉଚିତ୍। କାରଣ ଏହାଦ୍ୱାରା ଘର ସଦସ୍ୟଙ୍କ ଉପରେ ନକାରାତ୍ମକ ପ୍ରଭାବ ପଡ଼ିଥାଏ। ଖାସ୍ କରି ଆୟୁ ଓ ସ୍ବାସ୍ଥ୍ୟହାନିର ଏହା କାରଣ ସାଜିଥାଏ।
* କେବେ ବି ଘରର ମୁଖ୍ୟଦ୍ୱାର ବା ମୁଖ୍ୟଦ୍ୱାରର କବାଟ ଉପରେ ଘଣ୍ଟା ଲଗାଇବେ ନାହିଁ; କାରଣ ଏହାଦ୍ୱାରା ଘରେ ଝଗଡ଼ା ଲାଗିଥାଏ ବୋଲି ବିଶ୍ୱାସ ରହିଛି।
* ଘଣ୍ଟା ଉପରେ କେବେ ବି ଧୂଳି ଜମିବାକୁ ଦେବେନାହିଁ। ଏଥିସହିତ ଭାଙ୍ଗିଯାଇଥିବା କିମ୍ବା ଅଚଳ ଘଣ୍ଟାକୁ ବି ଘରେ ଆଦୌ ରଖିବେ ନାହିଁ। କାରଣ ଏହା ଅଶୁଭ ସୂଚନା ଦେଇଥାଏ।
* ଅନ୍ୟପକ୍ଷେ ଘଣ୍ଟାକୁ କେବେ ବି ବିଳମ୍ବରେ ଚାଲିବାକୁ ଦେବେନାହିଁ। ଆବଶ୍ୟକ ହେଲେ ଏହାର ସମୟକୁ ଦୁଇ ତିନି ମିନିଟ୍ ଆଗୁଆ ପଛେ ଚାଲିବାକୁ ଦେବେ ହେଲେ ସାମାନ୍ୟ ବିଳମ୍ବ ହେବାକୁ ଦେବେନାହିଁ। କାରଣ ଏହାଦ୍ବାରା ପରିବାର ଲୋକଙ୍କ ଉପରେ କୁଆଡ଼େ ସମୟାନୁବର୍ତ୍ତିତାର ଓଲଟା ପ୍ରଭାବ ପଡ଼ିଥାଏ।