ଫର୍ମାଲ୍ ପ୍ୟାଣ୍ଟ ହେଉ କି ଜିନ୍ସ ପ୍ୟାଣ୍ଟ ତା’ସାଙ୍ଗରେ ବେଲ୍ଟ ପିନ୍ଧିବାର ଫ୍ୟାଶନ ବହୁ ପୂର୍ବରୁ ରହିଆସିଛି। ତେବେ କେବଳ ଏହି ଆଉଟ୍ଫିଟ୍ କାହିଁକି ଅନ୍ୟ ଯେକୌଣସି ଆଉଟ୍ଫିଟ୍ରେ ବି ବେଲ୍ଟ ପିନ୍ଧି ଟ୍ରେଣ୍ଡି ଲୁକ୍ ପାଇପାରିବେ। କେମିତି, ଜାଣନ୍ତୁ ସେ ସମ୍ପର୍କରେ…
* ଲଙ୍ଗ୍ ଡ୍ରେସ୍: ଯେ କୌଣସି ଲଙ୍ଗ୍ ଡ୍ରେସ୍ ହେଉ ନା କାହିଁକି ତା’ ଉପରେ ବେଲ୍ଟ ପିନ୍ଧି ଆରାମରେ ଷ୍ଟାଇଲିଶ୍ ଲୁକ୍ ପାଇହେବ। କିନ୍ତୁ ଧ୍ୟାନ ଦେବେ ଡ୍ରେସ୍ ସାଙ୍ଗକୁ ବେଲ୍ଟ ଯେମିତି ପରଫେକ୍ଟ ମ୍ୟାଚ୍ କରୁଥିବ। ତା’ସହିତ ଏହି ବେଲ୍ଟକୁ କେବେ ବି ପେଟ ଉପରେ ବାନ୍ଧିବେ ନାହିଁ ବରଂ ପେଟଠୁ ଟିକେ ଉପରକୁ ବାନ୍ଧିବେ। ଯଦ୍ଦ୍ବାରା ପେଟର ମୋଟାପଣ ଆରାମରେ ଲୁଚିଯିବ, ତା’ସାଙ୍ଗକୁ ଲୁକ୍ ବି ଷ୍ଟାଇଲିଶ୍ ଲାଗିବ।
* ବଡ଼ିକନ୍ ଡ୍ରେସ୍: ଏହି ଟାଇପ୍ର ଡ୍ରେସ୍ ଉପରେ ଷ୍ଟ୍ରେଚେବଲ୍ ବେଲ୍ଟ ପିନ୍ଧିଲେ ଲୁକ୍ ଖୁବ୍ ଆକର୍ଷଣୀୟ ଲାଗିବ। ମାର୍କେଟ୍ରେ ବିଭିନ୍ନ ରଙ୍ଗର ଷ୍ଟ୍ରେଚେବଲ୍ ବେଲ୍ଟ ଆରାମରେ ମିଳିଯିବ। କେବଳ ବଡିକନ୍ ଡ୍ରେସ୍ ନୁହେଁ ଏହି ଟାଇପ୍ର ବେଲ୍ଟକୁ ଓଭର୍ ସାଇଜ୍ ଶାର୍ଟ ସାଙ୍ଗରେ ବି ପେୟାର୍ କଲେ ଟ୍ରେଣ୍ଡି ଲୁକ୍ ମିଳିବ।
* ସାଲଓ୍ବାର ସୁଟ୍: ସାଲଓ୍ବାର୍ ସୁଟ୍ ଉପରେ ବେଲ୍ଟ ବାନ୍ଧିବାର ଟ୍ରେଣ୍ଡ ଏବେ ଖୁବ୍ ଚାଲିଛି। ମୁଖ୍ୟତଃ ସାଲଓ୍ବାର୍ ସୁଟ୍ ସାଙ୍ଗରେ ପଟି ଷ୍ଟାଇଲ୍ର ବେଲ୍ଟ ଭଲ ମାନିଥାଏ। କିନ୍ତୁ ଧ୍ୟାନ ଦେବେ ଏହି ବେଲ୍ଟର ରଙ୍ଗ ଆଉ ଡିଜାଇନ୍ ଯେମିତି ସୁଟ୍ର ରଙ୍ଗ କିମ୍ବା ଏହାର ବଡର୍ର ସହିତ ପରଫେକ୍ଟ ମ୍ୟାଚ୍ କରୁଥିବ।
* ଶାଢି: ଶାଢି ଉପରେ କମରବନ୍ଧ ପିନ୍ଧିବାର ଫ୍ୟାଶନ ହୁଏତ ବହୁତ ପୁରୁଣା ହୋଇପାରେ, କିନ୍ତୁ ଏବେ ଅନେକେ ଶାଢି ଉପରେ ଷ୍ଟାଇଲିଶ୍ ବେଲ୍ଟ ବାନ୍ଧି ବି ନିଜକୁ ଡିଫରେଣ୍ଟ ଲୁକ୍ ଦେଇ ପାରୁଛନ୍ତି। ମୁଖ୍ୟତଃ ଶାଢି ସାଙ୍ଗକୁ ଲେଦର୍ ବେଲ୍ଟ କିମ୍ବା ଷ୍ଟାଇଲିସ୍ ଏମ୍ବେଲିଷ୍ଡ ବେଲ୍ଟ ପିନ୍ଧିଲେ ସୁନ୍ଦର ମାନିଥାଏ।
* ଲେହେଙ୍ଗା: ଯଦି ଆପଣ ଏମ୍ବ୍ରୋଡୋରୀ କାମ ବାଲା ଲେହେଙ୍ଗା ପିନ୍ଧୁଛନ୍ତି, ତା’ହେଲେ ତା’ସାଙ୍ଗକୁ ମ୍ୟାଚିଂ ଏମ୍ବ୍ରୋଡୋରୀ ବାଲା ବେଲ୍ଟ ପିନ୍ଧିବା ଆବଶ୍ୟକ। ଅନ୍ୟପକ୍ଷେ ଯଦି କୌଣସି ପ୍ଲେନ୍ ଷ୍ଟାଇଲ୍ର ଲେହେଙ୍ଗା ପିନ୍ଧୁଛନ୍ତି, ତେବେ ତା’ ସାଙ୍ଗରେ ଲେଦର କିମ୍ବା ମେଟାଲିକ୍ ବକଲ୍ ବାଲା ବେଲ୍ଟ ପିନ୍ଧି ନିଜକୁ ଆକର୍ଷଣୀୟ ଲୁକ୍ ଦେଇପାରିବେ। ତା’ଛଡ଼ା ଧ୍ୟାନ ଦେବେ ଲେହେଙ୍ଗା ସାଙ୍ଗରେ ବେଲ୍ଟ ପିନ୍ଧିଲାବେଳେ ସର୍ବଦା ବେଲ୍ଟକୁ ଠିକ୍ ଅଣ୍ଟା ଉପରେ ହିଁ ପିନ୍ଧିବେ; ଏହା ଲୁକ୍କୁ ଭଲ ମାନିବ।
* ବାଲାନ୍ସଡ୍ ଲୁକ୍: ଯଦି ଆପଣଙ୍କୁ ବାଲାନ୍ସଡ୍ ଲୁକ୍ ପସନ୍ଦ ତା’ହେଲେ ଯେ କୌଣସି ଓ୍ବାନ୍ପିସ୍ ଡ୍ରେସ୍ ସାଙ୍ଗକୁ ଟିକେ କମ୍ ଚଉଡ଼ା ବାଲା ବେଲ୍ଟ ପିନ୍ଧିଲେ ଲୁକ୍ ବେଶ୍ ସୁନ୍ଦର ଦେଖାଯାଇଥାଏ। ଲେଦର୍ ବେଲ୍ଟ ବି ଏହି ଟାଇପ୍ର ଡ୍ରେସ୍ ସାଙ୍ଗକୁ ବହୁତ ଭଲ ମାନିଥାଏ।
* ପ୍ୟାଣ୍ଟ: ଯଦି ଆପଣ ଜିନ୍ସ କିମ୍ବା ଫର୍ମାଲ୍ ପ୍ୟାଣ୍ଟ ସହ ଲଙ୍ଗ୍ ସାର୍ଟ ପିନ୍ଧୁଛନ୍ତି ଆଉ ତାକୁ ଇନ୍ ନ କରି ଖୋଲା ଛାଡୁଛନ୍ତି, ତା’ହେଲେ ଏହି ଖୋଲା ସାର୍ଟ ଉପରେ ହିଁ ବେଲ୍ଟ ବାନ୍ଧିଲେ ଟିକେ ଡିଫରେଣ୍ଟ ଲୁକ୍ ମିଳିଥାଏ। ଅନ୍ୟପକ୍ଷେ ଯଦି ଇନ୍ କଲେ ତା’ହେଲେ ପ୍ୟାଣ୍ଟରେ ବେଲ୍ଟ ବାନ୍ଧି ନିଜକୁ ଟ୍ରେଣ୍ଡି ଲୁକ୍ ଦେଇପାରିବେ।