ଲଣ୍ଡନ,୨୦।୭: ଇଂଲଣ୍ଡର ଅଲରାଉଣ୍ଡର ବେନ ଷ୍ଟୋକ୍ସ ମଙ୍ଗଳବାର ତାଙ୍କ କ୍ୟାରିୟରର ଶେଷ ଦିନିକିଆ ଖେଳିବାକୁ ପଡିଆକୁ ଓହ୍ଲାଇଥିଲେ। ଷ୍ଟାଡିୟମରେ ତାଙ୍କର ବହୁ ସଂଖ୍ୟକ ପ୍ରଶଂସକ ଉପସ୍ଥିତ ଥିଲେ। ଡରହମ ଚେଷ୍ଟର ଲି ଷ୍ଟ୍ରିଟରେ ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ମଧ୍ୟରେ ସିରିଜର ପ୍ରଥମ ଦିନିକିଆ ଷ୍ଟୋକ୍ସଙ୍କ କ୍ୟାରିୟରର ଶେଷ ଦିନିକିଆ ଥିଲା।
୩୧ ବର୍ଷିୟ ବେନ ଷ୍ଟୋକ୍ସ ପଡିଆକୁ ଆସିବା ମାତ୍ରେ, ସେ ଅତ୍ୟନ୍ତ ଭାବପ୍ରବଣ ହୋଇପଡିଥିଲେ। ତାଙ୍କ ଆଖିରୁ ଲୁହ ଝରିବାକୁ ଲାଗିଲା। ସାଥୀମାନେ ମଧ୍ୟ ତାଙ୍କୁ ଆଲିଙ୍ଗନ କରିଥିଲେ।
ଇଂଲଣ୍ଡ କ୍ରିକେଟ ଷ୍ଟୋକ୍ସ ସହ ଜଡିତ ଏକ ଭିଡିଓ ଶେୟାର କରିଛି। ଏହି ୩୬ ସେକେଣ୍ଡର ଭିଡିଓ ଟୁଇଟରରେ ୧.୫ ଲକ୍ଷରୁ ଅଧିକ ଥର ଦେଖାଯାଇଛି। ଷ୍ଟାଡିୟମରେ ବସିଥିବା ଦର୍ଶକମାନେ ଷ୍ଟୋକ୍ସଙ୍କ ସମ୍ମାନାର୍ଥେ କରତାଳି ଦେଇଥିବାର ନଜର ଆସିଥିଲେ।
ଷ୍ଟୋକ୍ସ ୧୦୪ଟି ଦିନିକିଆର ୮୯ ଇନିଂସରେ ୨୯୧୯ ରନ ସଂଗ୍ରହ କରିଛନ୍ତି। ତାଙ୍କର ହାରାହାରି ୩୯.୪୫ ରହିଛି। ଦିନିକିଆରେ ତାଙ୍କର ସର୍ବାଧିକ ସ୍କୋର ହେଉଛି ୧୦୨ ରନ୍। ସେ ଏହି ଫର୍ମାଟରେ ତିନି ଶତକ ଏବଂ ୨୧ ଅର୍ଦ୍ଧଶତକ ହାସଲ କରିଛନ୍ତି। ଏଥିସହିତ ବୋଲିଂରେ ସେ ୮୭ ଇନିଂସରେ ୭୪ ଉଇକେଟ ନେଇଛନ୍ତି।