ନୂଆଦିଲ୍ଲୀ,୩୧।୭: ଭାରତ-ଇଂଲଣ୍ଡ ମଧ୍ୟରେ ଖେଳାଯିବାକୁ ଥିବା ଟେଷ୍ଟ ସିରିଜର ଠିକ୍ ପୂର୍ବରୁ ଇଂଲଣ୍ଡ ଟିମ୍କୁ ଲାଗିଛି ବଡ଼ ଝଟ୍କା। ଇଂଲଣ୍ଡ ଟିମ୍ର ଷ୍ଟାର ଅଲରାଉଣ୍ଡର ବେନ ଷ୍ଟୋକ୍ସ କ୍ରିକେଟରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବିରତି ନେଉଥିବା ଘୋଷଣା କରିଛନ୍ତି। ମାନସିକ ସ୍ବାସ୍ଥ୍ୟ ଏବଂ ଆଙ୍ଗୁଠିରେ ଲାଗିଥିବା ଆଘାତରୁ ସମ୍ପୂର୍ଣ୍ଣ ସୁସ୍ଥ ହେବା ପାଇଁ ଷ୍ଟୋକ୍ସ ଏଭଳି ବଡ଼ ପଦକ୍ଷେପ ନେଇଥିବା କୁହାଯାଉଛି।
ଷ୍ଟୋକ୍ସ ଗତ ଏକ ବର୍ଷ ମଧ୍ୟରେ ଦେଶ ବାହାରେ ଅଧିକାଂଶ ସମୟ ବିତାଇଛନ୍ତି। ପ୍ରଥମେ ପିତାଙ୍କ ମୃତ୍ୟୁକୁ ନେଇ ସେ ପାକିସ୍ତାନ ବିପକ୍ଷ ଦୁଇଟି ଟେଷ୍ଟ ମ୍ୟାଚ୍ରେ ଖେଳି ନ ଥିଲେ। ପରେ ଆଇପିଏଲ୍ରେ ସେ ନଜର ଆସିଥିଲେ।
ତେବେ ଷ୍ଟୋକ୍ସଙ୍କ ନିଷ୍ପତ୍ତିଙ୍କୁ ସମର୍ଥନ କରିଛି ଇଂଲଣ୍ଡ କ୍ରିକେଟ ବୋର୍ଡ(ଇସିବି)। ଏଭଳି ସମୟରେ ସେ ଖେଳରୁ ଦୂରରେ ଥିଲେ ହେଁ ତାଙ୍କୁ ଇସିବି ସହାୟତା ଜାରି ରଖିବ। ଷ୍ଟୋକ୍ସ ବେଶ ସାହସର ସହ ମାନସିକ ସ୍ବାସ୍ଥ୍ୟ ଭଳି ପ୍ରସଙ୍ଗରେ ଖୋଲାଖୋଲି ଭାବେ କହିଥିବା ବୋର୍ଡ କହିଛି।