ଦୁବାଇ, ୪ା୧୦ (ପି.ଟି.)-ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳିବା ଲାଗି ବିଶ୍ୱର ଟପ୍ ଅଲରାଉଣ୍ଡର ବେନ୍ ଷ୍ଟୋକ୍ସ ରବିବାର ୟୁଏଇରେ ପହଞ୍ଚତ୍ବେ। ସେ ତାଙ୍କ ଦଳ ରାଜସ୍ଥାନ ରୟାଲ୍ସରେ ଯୋଗଦେବା ପୂର୍ବରୁ ୬ ଦିନ କ୍ୱାରାଣ୍ଟାଇନ୍ରେ ରହିବେ। ଷ୍ଟୋକ୍ସ ତାଙ୍କ ଅସୁସ୍ଥ ପିତା ଜେଡ୍ଙ୍କୁ ଦେଖିବା ଲାଗି ନ୍ୟୁଜିଲାଣ୍ଡ ଯାଇଥିଲେ। ତେଣୁ ଟୁର୍ନାମେଣ୍ଟ ଆରମ୍ଭରେ ସେ କିଛି ମ୍ୟାଚ୍ ମିସ୍ କରିଛନ୍ତି। ରାଜସ୍ଥାନ ରୟାଲ୍ସ ଷ୍ଟୋକ୍ସଙ୍କୁ ୧୨.୫ କୋଟି ଟଙ୍କାରେ କ୍ରୟ କରିଛି। ତାଙ୍କର ୬୭ ଟେଷ୍ଟ, ୯୫ ଅନ୍ତର୍ଜାତୀୟ ଦିନିକିଆ ଏବଂ ୨୬ ଅନ୍ତର୍ଜାତୀୟ ଟି୨୦ ମ୍ୟାଚର ଅଭିଜ୍ଞତା ରହିଛି। ଇଂଲଣ୍ଡର ବିଶ୍ୱକପ୍ ସଫଳତା ପଛରେ ତାଙ୍କର ବିଶେଷ ଭୂମିକା ରହିଥିଲା। ୨୦୧୯ରେ ଏକ ଆସେସ ଟେଷ୍ଟରେ ସେ ମ୍ୟାଚ ବିଜୟୀ ଶତକ ହାସଲ କରିଥିଲେ। ତାଙ୍କ ଅନୁପସ୍ଥିତିରେ ରୟାଲ୍ସ ୩ଟି ମ୍ୟାଚରୁ ଦୁଇଟିରେ ବିଜୟ ହାସଲ କରିଛି। ସୂଚନାଯୋଗ୍ୟ, ପିତା ବ୍ରେନ୍ କ୍ୟାନ୍ସରରେ ପୀଡ଼ିତ ଥିବା ଖବର ପାଇ ୨୯ ବର୍ଷୀୟ ଷ୍ଟୋକ୍ସ ଅଗଷ୍ଟରେ ପାକିସ୍ତାନ ବିପକ୍ଷ ଟେଷ୍ଟ ସିରିଜ ମଝିରୁ ଖ୍ରିଷ୍ଟଚର୍ଚ୍ଚ ଯାତ୍ରା କରିଥିଲେ।
