ପୁରୀ ଅଫିସ, ୨୭ା୩: ରାଶନ କାର୍ଡ ହିତାଧିକାରୀଙ୍କୁ ସୁଲଭ ମୂଲ୍ୟରେ ଚାଉଳ ଯୋଗାଇ ଦିଆଯାଉଛି। ତେବେ କେତେକ ସ୍ଥାନରେ ଯୋଗାଣ ବିଭାଗ ପକ୍ଷରୁ ଯୋଗାଇ ଦିଆଯାଉଥିବା ଚାଉଳରେ ପ୍ଲାଷ୍ଟିକ୍ ଚାଉଳ ମିଶିଥିବା ଅଭିଯୋଗ ହେଉଛି। ପୁରୀ ପୌରସଂସ୍ଥା ଅନ୍ତର୍ଗତ ବଳିଆପଣ୍ଡା ଅଞ୍ଚଳର ହିତାଧିକାରୀ ବିକାଶ ସାହୁ ଏଭଳି ଅଭିଯୋଗ ଆଣି ତଦନ୍ତ ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ବିକାଶଙ୍କ ସ୍ତ୍ରୀ ମାନସୀ ସାହୁ କହିଛନ୍ତି, ପ୍ରତ୍ୟେକ ଥର ଭଳି ଗତ ମାସରେ କଣ୍ଟ୍ରୋଲ ଦୋକାନୀଙ୍କ ଠାରୁ ତାଙ୍କ ସ୍ବାମୀ ଚାଉଳ ଆଣିଥିଲେ। ତେବେ ସେ ରବିବାର ରୋଷେଇ କରିବା ପାଇଁ ଉକ୍ତ ଚାଉଳକୁ ଆଣିବାବେଳେ ସେଥିରେ କିଛି ପୋକ ହୋଇଯାଇଥିବା ଦେଖିବାକୁ ପାଇଥିଲେ। ସେହି ଚାଉଳକୁ ଖରାରେ ଶୁଖାଇଥିଲେ। ତେବେ ସେଥିରେ ଦୁଇ ପ୍ରକାରର ଚାଉଳ ରହିଥିବା ଦେଖିବାକୁ ପାଇଥିଲେ। ସେ ସେହି ଦୁଇ ପ୍ରକାର ଚାଉଳକୁ ଅଲଗା କରିଥିଲେ। ତନ୍ମଧ୍ୟରେ ଗୋଟିଏ ପ୍ରକାର ଚାଉଳର ଆକାର ଛୋଟ ରହିଥିବା ବେଳେ ଅନ୍ୟ ଚାଉଳ ବଡ଼ ଓ ମୋଟା ରହିଥିଲା। ସନ୍ଦେହ ହେବାକୁ ଚାଉଳକୁ ପାଣିରେ ପକାଇ ପରୀକ୍ଷା କରିଥିଲେ। ଆକାରରେ ବଡ଼ ଥିବା ଚାଉଳ ଫୁଲି ଭାତ ଭଳି ହୋଇଯିବା ସହ ହାତକୁ ନାଳୁଆ ଲାଗିଥିଲା। ଏପରିକି ଚାଉଳ ହାତକୁ ଅଠା ଅଠା ଲାଗିଥିଲା। ମାତ୍ର ଛୋଟ ଆକାର ଥିବା ଚାଉଳ ଠିକ ରହିଥିଲା। ତେଣୁ ମୋଟା ତଥା ବଡ଼ ଆକାରର ଚାଉଳ ଉପରେ ତାଙ୍କର ସନ୍ଦେହ ଅଧିକ ହେବାରୁ ସେ ତାହାକୁ ନେଇ ଚାଉଳ ବିକ୍ରୟ କରୁଥିବା ଜଣେ ବୟସ୍କ ବ୍ୟକ୍ତିଙ୍କୁ ଦେଖାଇଥିଲେ। ସେ ଏପରି ଚାଉଳ ଆଗରୁ ଦେଖି ନ ଥିବା କହିଥିଲେ। ତେଣୁ ତାହା ପ୍ଲାଷ୍ଟିକ୍ ଚାଉଳ ବୋଲି ମାନସୀ ସନ୍ଦେହ ପ୍ରକାଶ କରିଛନ୍ତି। ଯଦି ତାହା ପ୍ଲାଷ୍ଟିକ୍ ଚାଉଳ ହୋଇଥାଏ, ତାହେଲେ ଉକ୍ତ ଚାଉଳର ଭାତ ଖାଇଲେ ଦେହ ଖରାପ ହେବାର ସମ୍ଭାବନା ରହିଛି। ଉକ୍ତ ଚାଉଳ ପ୍ଲାଷ୍ଟି୍କ୍ କି ନୁହେଁ ସେ ସମ୍ପର୍କରେ ପ୍ରଶାସନ ପକ୍ଷରୁ ତଦନ୍ତ କରାଯାଇ ପଦକ୍ଷେପ ନିଆଯାଉ ବୋଲି ମାନସୀ କହିଛନ୍ତି। ଅନ୍ୟପକ୍ଷରେ ଏ ନେଇ ଜିଲା ଯୋଗାଣ ବିଭାଗ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ।