ନବରଙ୍ଗପୁର,୧୮।୧୧(ବି.ପ୍ର.): ନବରଙ୍ଗପୁର ପୌରାଞ୍ଚଳରେ ଧନୀକ ଶ୍ରେଣୀର ଲୋକଙ୍କୁ ମିଳୁଛି ଆବାସ। ଯୋଗ୍ୟ ହିତାଧିକାରୀ ଆବାସ ଯୋଜନା ଟଙ୍କା ପାଇବାବେଳେ ପ୍ରଥମ କିସ୍ତି ଅନ୍ୟ ଆକାଉଣ୍ଟକୁ ଚାଲି ଯାଉଛି। ଦୋଷ କାହାର ସେ ନେଇ ଖୋଜା ଚାଲିଛି। ହିତାଧିକାରୀ ଘର ଖଣ୍ଡେ ପାଇଁ ୧୧ ମାସ ହେବ ଚାତକ ଭଳି ଚାହିଁ ରହିଛନ୍ତି। ଛାତ ଘର ଖଣ୍ଡେ ପାଇଁ ସୁଖରେ ରହିବି ବୋଲି ଆଶା କରିଥିବା ହିତାଧିକାରୀ ବିଶାଳ ଭତରା ଶୀତ କାକରରେ ରାତ୍ରୀ ଯାପନ କରୁଛନ୍ତି। ସରକାରୀ ବ୍ୟବସ୍ଥାରେ ମନ ଦୁର୍ବଳ ହୋଇ ଯାଇଛି। ଏଭଳି ଘଟଣା ନବରଙ୍ଗପୁର ପୌରାଞ୍ଚଳର ଇଚ୍ଛାବତୀଗୁଡା ୧୭ ନମ୍ବର ୱାର୍ଡରେ ଦେଖିବାକୁ ମିଳିଛି।
ନବରଙ୍ଗପୁର ପୌରାଞ୍ଚଳ ୧୭ ନମ୍ବର ୱାର୍ଡ ଇଚ୍ଛାବତୀଗୁଡାର ବିଶାଳ ଭତରା ୨୦୨୨ ଜାନୁୟାରୀ ୭ ତାରିଖରେ ଆବାସ ଯୋଜନାରେ ଘର ନିର୍ମାଣ ପାଇଁ କାର୍ଯ୍ୟାଦେଶ ପାଇଲେ। ରହୁଥିବା ଝୁପୁଡି ଘର ଭାଙ୍ଗି ପିଲାର ପାଇଁ ଗାତ ଖୋଳିଲେ। ଟଙ୍କା ଆସିବାରେ ବିଳମ୍ବ ହେବାରୁ ପୌରସଂସ୍ଥାକୁ ଯାଇ ଏହାର କାରଣ ପଚାରିଥିଲେ। ସେପ୍ଟମ୍ବର ୭ ତାରିଖରେ ବିଶାଳଙ୍କ ବ୍ୟାଙ୍କ ଖାତାକୁ ୪୦ ହଜାର ଟଙ୍କା ଯାଇଛି ବୋଲି ପୌରସଂସ୍ଥା ପକ୍ଷରୁ କୁହାଯାଇଥିଲ। ବିଶାଲ ବ୍ୟାଙ୍କ ଖାତା ଚେକ୍ କରିବାରୁ ସେଥିରେ ଟଙ୍କା ଜମା ହୋଇ ନଥିବା ଦେଖବ ପୁନଃର୍ବାର ପଚାରିବାକୁ ପୌରସଂସ୍ଥା କାର୍ଯ୍ୟାଳୟକୁ ଯାଇଥିଲେ। ନବରଙ୍ଗପୁର ବ୍ଲକ ଆମ୍ବାଦୋଳା ଗାଁର ମାଣିକ ଭତରାଙ୍କ ଆକାଉଣ୍ଟରେ ୪୦ ହଜାର ଟଙ୍କା ଚାଲି ଯାଇଛି ବୋଲି ଏଥର ବିଶାଲଙ୍କୁ କୁହାଯାଇଥିଲା। ଏଣେ ମାଣିକ ଓ ତାଙ୍କ ପରିବାର ଦାଦନ ଖଟିବାକୁ ଅନ୍ୟତ୍ର ଚାଲି ଯାଇଥିବା ଜଣାପଡିଛି। ଘର ଖଣ୍ଡିଏ ନ ଥିବାରୁ ଏବେ ବିଶାଳ, ତାଙ୍କ ସ୍ତ୍ରୀ କମଳା, ପୁଅ କ୍ରିଷ୍ଣା, ମାଆ ପ୍ରତିମା ଓ ବାପା ପଦଲାମ ବାର ଦ୍ୱାର ହୋଇ ସ୍କୁଲ ବାରଣ୍ଡାରେ ରାତ୍ରୀ ଯାପନ କରୁଛନ୍ତି। ବିଶାଳ ଭଙ୍ଗା ଦଦରା ଘରେ ରହୁଥିଲେ। ଆବାସ ଯୋଜନାରେ ଘର ପାଇଁ କାର୍ଯ୍ୟାଦେଶ ମିଳିବା ପରେ ଝୁପୁଡିକୁ ଭାଙ୍ଗି ପିଲାର ପାଇଁ ଗାତ ଖୋଳିଲେ। ଗରୀବ ଲୋକଙ୍କୁ ସରକାର ପକ୍କା ଘର ଆବାସ ଯୋଜନାରେ ଯୋଗାଉଛନ୍ତି। ପୌର କର୍ମଚାରୀଙ୍କ ଅବହେଳା ଲାଗି ହିତାଧିକାରୀଙ୍କୁ ଟଙ୍କା ନ ମିଳି ଅନ୍ୟ ଆକାଉଣ୍ଟକୁ ଚାଲି ଯାଉଛି। ମାସକରୁ ଊର୍ଦ୍ଧ୍ୱ ସମୟ ବିତିଗଲା ପରେ ମଧ୍ୟ କାର୍ଯ୍ୟାନୁଷ୍ଠାନ ହେଉନାହିଁ। ତୁରନ୍ତ ହିତାଧିକାରୀଙ୍କୁ ଟଙ୍କା ନ ମିଳିଲେ ଆନ୍ଦୋଳନ ହେବ ବୋଲି ପୂର୍ବତନ କାଉନ୍ସିଲର ସୁଧୀର ମହାପାତ୍ର କହିଛନ୍ତି। ଏନେଇ ପୌରସଂସ୍ଥା ନିର୍ବାହୀ ଅଧିକାରୀ ପ୍ରାଣନାଥ ସେଠଙ୍କୁ ପଚାରିବାରୁ ଯାହା ଆକାଉଣ୍ଟକୁ ଟଙ୍କା ଚାଲି ଯାଇଛି ତାଙ୍କୁ ଫେରସ୍ତ ପାଇଁ କୁହାଯିବ। ଯଦି ଟଙ୍କା ନ ଫେରାନ୍ତି ତେବେ ପ୍ରଥମ କିସ୍ତି ଟଙ୍କା ବ୍ୟାଙ୍କ ଖାତାରେ ଜମା କରିବା ଦିୟିତ୍ୱରେ ଯିଏ ଥିବେ ସେ ଭରଣା କରିବେ। ହିତାଧିକାରୀ ନିଶ୍ଚିତ ଟଙ୍କା ପାଇବେ। ସମୟ ସୀମା ମଧ୍ୟରେ ଘର କାମ ସମ୍ପୂର୍ଣ୍ଣ କଲେ ତାଙ୍କର ଇନସେନଟିଭ ମଧ୍ୟ ପାଇବେ। ସେଥିରେ କୌଣସି ଅସୁବିଧା ହେବ ନାହିଁ ବୋଲି ସେ କହିଛନ୍ତି।