କୋଲକତା,୨୫।୧: ପଶ୍ଚିମବଙ୍ଗରେ ପୁଣି ଥରେ ବାକ୍ଯୁଦ୍ଧ ତୀବ୍ର ହୋଇଛି। ରାଜ୍ୟପାଳ ଜଗଦୀପ ଧନଖର ମଙ୍ଗଳବାର ପୁଣି ଥରେ ବିଧାନସଭା ବାଚସ୍ପତି ବିମନ ବାନାର୍ଜୀ ଏବଂ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରିଛନ୍ତି। ସେ ବାଚସ୍ପତିଙ୍କ ନାଁରେ ସାମ୍ବିଧାନିକ ନିୟମ ଉଲ୍ଲଂଘନ ଏବଂ ତାଙ୍କ ଦ୍ୱାରା ଖୋଜା ଯାଇଥିବା ସୂଚନା ପ୍ରଦାନ କରୁନାହାଁନ୍ତି ବୋଲି ଅଭିଯୋଗ ଆଣିଛନ୍ତି। ଗଣତନ୍ତ୍ର ଦିବସ ପୂର୍ବରୁ ବିଧାନସଭା କମ୍ପ୍ଲେକ୍ସରେ ବି.ଆର୍ ଆମ୍ବେଦକରଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିବା ପରେ ଧନଖର ଗଣମାଧ୍ୟମକୁ କହିଛନ୍ତି, ବାଚସ୍ପତିଙ୍କ ପାଖରେ ରାଜ୍ୟପାଳଙ୍କ ବିଷୟରେ କିଛି କହିବାର ଲାଇସେନ୍ସ ବୋଧେ ଅଛି। ସେ ଯାହା କହୁଛନ୍ତି, ନିଜେ ନିୟମକୁ ଅବମାନନା କରୁଛନ୍ତି ବୋଲି ରାଜ୍ୟପାଳ କହିଛନ୍ତି।
ଧନଖର ଦାବି କରିଛନ୍ତି, ଅନେକ ଥର ବାଚସ୍ପତି ବିଏସଏଫର କାର୍ଯ୍ୟ କ୍ଷେତ୍ରର ସମ୍ପ୍ରସାରଣ ଉପରେ ବିଧାନସଭାର ସଂକଳ୍ପର ବିବରଣୀ ମାଗିଥିଲେ ସୁଦ୍ଧ ଏନେଇ ସୂଚନା ଦିଆଯାଇନାହିଁ। ବିଧାନସଭାରେ ତାଙ୍କ ଭାଷଣ ସମୟରେ ଦୁଇଥର ବ୍ଲାକ୍ଆଉଟ୍ କରାଯାଇଛି। ବାଚସ୍ପତି ଧାରା ୧୬୮ ଜାଣନ୍ତି ନାହିଁ କି? ମୁଁ ଏପରି ଅଜ୍ଞାତ, ଅସାମ୍ବିଧାନିକ କାର୍ଯ୍ୟର ସାମ୍ନା କରିପାରିବି ନାହିଁ ବୋଲି ସେ କହିଛନ୍ତି।