ବ୍ରହ୍ମପୁର ଅଫିସ,୮।୨: ଆରମ୍ଭ ହୋଇଛି ପ୍ରେମ ସପ୍ତାହ। ପଶ୍ଚାତ୍ୟ ସଂସ୍କୃତି ହୋଇଥିଲେ ସୁଦ୍ଧା ବର୍ତ୍ତମାନ ସାରା ପୃଥିବୀରେ ଏହା ପ୍ରେମୀ ଯୁଗଳଙ୍କ ମଧ୍ୟରେ ବେଶ ଆଦୃତ ହେଉଛି। ଏହି ସପ୍ତାହ ସାରା ବିଶ୍ୱରେ ଫେବୃୟାରୀ ୭ ରୁ ୧୪ ପର୍ଯ୍ୟନ୍ତ ପାଳିତ ହେଉଛି। ପ୍ରଥମ ଦିନ ଗୋଲାପ ଦିବସ ବା ରୋଜ ଡ଼େପ୍ରୋପୋଜ ଡ଼େ, ଚକୋଲେଟ ଡ଼େ, ଟେଡ଼ି ଡ଼େ, ପ୍ରମିଜ ଡ଼େ, ହଗ୍ ଡ଼େ, କିସ ଡ଼େ ଏବଂ ଶେଷରେ ସେଣ୍ଟ ଭାଲେଣ୍ଟାଇନଙ୍କ ଦିବସ ପାଳିତ ହୋଇଥାଏ।
ସପ୍ତାହର ପ୍ରଥମ ଦିନ ମଙ୍ଗଳବାର ରୋଜଡ଼େ’ ବା ଗୋଲାପ ଦିବସ ପାଳିତ ହୋଇଛି। ଏହି ଦିନ ପ୍ରେମୀମାନେ ନିଜ ପ୍ରେମିକାକୁ ପ୍ରେମର ପ୍ରତୀକ ସ୍ବରୁପ ଲାଲ ଗୋଲାପ ଦେଇ ନିଜ ପ୍ରେମ ବ୍ୟକ୍ତ କରିଥାନ୍ତିି। ଏହି ପରମ୍ପରା ବର୍ତ୍ତମାନ ରେଶମ ସହରରେ ମଧ୍ୟ ଦେଖିବାକୁ ମଳିଛି। ସେହିପରି ସହରରେ ପୁରୁଣା ବସ୍ଷ୍ଟାଣ୍ଡ, ବଡ଼ବଜାର, ଗୋଇଲୁଣ୍ଡି, ସୁବାରାଓ ଛକ ଗୁଡିକରେ ଥିବା ଫୁଲ ଦୋକାନରେ ପ୍ରବଳ ଭିଡ଼ ଦେଖିବାକୁ ମିଳୁଛି। କଲେଜ ପଢ଼ୁଆ ଛାତ୍ରୀଛାତ୍ର, ଯୁବତୀ ଯୁବକ ଓ ନବ ବିବାହିତ ସର୍ବାଧିକ ଗୋଲାପ ଫୁଲ କ୍ରୟ କରିଥିବା ବ୍ୟବସାୟୀଙ୍କଠାରୁ ପ୍ରକାଶ। ଗୋଲାପ ଦିବସ ଅବସରରେ ସାଧାରଣ ଦିନରେ ୧୦ରୁ ୧୫ ଟଙ୍କାରେ ବିକ୍ରି ହେଉଥିବା ଫୁଲ ଦର ମଙ୍ଗଳବାର ୨୦ରୁ ୩୦ଟଙ୍କା ବୃଦ୍ଧି ପାଇଛି। ସେହିପରି ଗ୍ରାହକଙ୍କ ମଧ୍ୟରେ ବେଙ୍ଗାଲୁରୁ ଗୋଲାପ ଚାହିଦା ଅଧିକ ରହିଛି। ଲାଲ ଗୋଲାପ ସମେତ ହଳଦିଆ, ଧଳା ଓ ପିଙ୍କ୍ ଭଳି ବିଭିନ୍ନ ରଙ୍ଗର ଗୋଲାପ ଓ ଅନ୍ୟାନ୍ୟ ଫୁଲ ମଧ୍ୟ ବିକ୍ରି ହେଉଛି।