ପାରାଦୀପ,୧୩।୩(ଶରତ ରାଉତ)ଭାରତ ସରକାର ସୋମବାର ଦେଶରେ ସିଏଏ (ନାଗରିକତ୍ୱ ସଂଶୋଧନ ଆଇନ) ଲାଗୁ କରିବା ପରେ ଓଡ଼ିଶା ଉପକୂଳରେ ଜବରଦଖଲ କରି ରହିଥିବା ବଙ୍ଗଳାଭାଷୀଙ୍କ ମଧ୍ୟରେ ଉଲ୍ଲାସ ଦେଖାଦେଇଛି। କାରଣ ସେମାନେ ଏବେ ସିଏଏ ଜରିଆରେ ଆବେଦନ କରି ପୂର୍ଣ୍ଣ ସରକାରୀ ବାସିନ୍ଦା ପ୍ରମାଣପତ୍ର ପାଇଯିବେ ବୋଲି ଆଶା କରାଯାଉଛି। ପୂର୍ବରୁ ଯେଉଁଭଳି କେତେଜଣ ବଙ୍ଗଳାଭାଷୀ ରିଫ୍ୟୁଜି ବୋଲି ଶୁଣୁଥିଲେ, ସେଭଳି ଅପବାଦ ଆଉ ନୂଆ ଆଇନ ବଳରେ ହେବେନାହିଁ। ୨୦୧୫ ମାର୍ଚ୍ଚ ୩୦ରେ ରାଜ୍ୟ ସରକାର ବିଧାନସଭା ମଧ୍ୟରେ ଘୋଷଣା କରିଥିବା ବାଂଲାଦେଶୀ ଅନୁପ୍ରବେଶକାରୀ ସଂଖ୍ୟା ଥିଲା ୩୯୯୭। ଏହି ଅନୁପ୍ରବେଶକାରୀମାନେ ଏବେ ସ୍ଥାୟୀ ପ୍ରମାଣପତ୍ର ପାଇପାରିବେ। କାରଣ କେନ୍ଦ୍ର ସରକାର ନୂତନ ଆଇନରେ ଦର୍ଶାଇଛନ୍ତି ୨୦୧୪ ଡିସେମ୍ବର ୩୧ ପୂର୍ବରୁ ଯେଉଁ ବାଂଲାଦେଶୀ, ପାକିସ୍ତାନ, ଆଫଗାନିସ୍ତାନରୁ ଆସି ରହିଥିବେ, ସେମାନଙ୍କୁ ନାଗରିକତ୍ୱ ପ୍ରଦାନ କରାଯିବ। ତେବେ ସେଥିରୁ ମୁସଲ୍ମାନଙ୍କୁ ବାଦ ଦିଆଯିବ। ତେବେ ଯେଉଁ ବାଂଲାଦେଶୀ ଅନୁପ୍ରବେଶକାରୀମାନେ ଓଡ଼ିଶାରେ ଅଛନ୍ତି ସେମାନଙ୍କ ଧର୍ମ ଚିହ୍ନଟ କରିବା ସହଜ ନୁହେଁ ବୋଲି ଆଲୋଚନା ହେଉଛି। ଓଡ଼ିଶାରେ ଯେଉଁ ୩୯୯୭ ଅନୁପ୍ରବେଶକାରୀ ଅଛନ୍ତି, ସେମାନଙ୍କ ମଧ୍ୟରେ କେନ୍ଦ୍ରାପଡା ଜିଲାର ୧୬୪୯, ଜଗତ୍ସିଂହପୁର ୧୧୧୨, ମାଲକାନଗିରି ୬୬୫, ଭଦ୍ରକ ୩୧୩, ବାଲେଶ୍ୱର ୧୫୦, ନବରଙ୍ଗପୁର ୧୦୬ ଓ ବରଗଡ଼ରୁ ୨ଜଣ ରହିଛନ୍ତି। ଜଗତ୍ସିଂହପୁର ଜିଲା ପାରାଦୀପରେ ୨୯୭, ଏରସମା ୪୨୩, କୁଜଙ୍ଗ ୨୧୩, ବାଲିକୁଦା ୧୧୫, ଜଗତ୍ସିଂହପୁର ବ୍ଲକର ୬୪ ଥିଲେ ବୋଲି ସରକାରୀ ତଥ୍ୟରୁ ଜଣାପଡିଛି। ସେଥିରେ ପାରାଦୀପଗଡ଼ ପଞ୍ଚାୟତ ୨୫ ନଂ ୱାର୍ଡର ଚନକଣ ବସ୍ତିରେ ଯେଉଁ ୯୦ ପରିବାର ବସବାସ କରୁଛନ୍ତି। ସେମାନେ ସମସ୍ତେ ବାଂଲାଦେଶୀ ମୁସଲମାନ ବୋଲି ସରପଞ୍ଚ ସଞ୍ଜୟ ବେହେରା କୁହନ୍ତି। ଏପରି ଚାନ୍ଦିନୀ, ଲକ୍ପଡା, ବଙ୍ଗାଳୀପଡା ଆଦି ବସ୍ତିରେ ମୁସଲମାନ ବଙ୍ଗଳାଭାଷୀ ରହୁଥିବା ଜଣାଯାଏ। ଏମାନେ ଏବେ ନାଗରିକତ୍ୱ ପ୍ରମାଣପତ୍ର ପାଇବେ କି ନାହିଁ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ହୁଗୁଳା ଶାସନ, ରାଜନୈତିକ ପ୍ରୋତ୍ସାହନ, ପ୍ରିୟାପ୍ରୀତି ତୋଷଣ ଯୋଗୁ ବଙ୍ଗଳାଭାଷୀ ଜରିଆରେ ବାଂଲାଦେଶୀମାନେ କାୟାବିସ୍ତାର କରିଥିବା ଚର୍ଚ୍ଚା ହେଉଛି। ଆଗକୁ ଏହାର ସ୍ଥିତି କିପରି ରହିବ ତାହା ଦେଖିବାକୁ ରହିଲା।