ପାରାଦୀପ,୨୦।୧୨(ଶରତ ରାଉତ): କେନ୍ଦ୍ର ଓ ରାଜ୍ୟ ସରକାର ଓଡ଼ିଶାର ପାରମ୍ପରିକ ମତ୍ସ୍ୟଜୀବୀଙ୍କ ପାଇଁ ଅନେକ କଲ୍ୟାଣକାରୀ ଯୋଜନା କରିଛନ୍ତି। କିନ୍ତୁ ଉକ୍ତ ଯୋଜନାରେ ପାରମ୍ପରିକ ମତ୍ସ୍ୟଜୀବୀଙ୍କ ବଦଳରେ ଅଣପାରମ୍ପରିକ ମତ୍ସ୍ୟଜୀବୀଙ୍କୁ ଦିଆଯାଉଛି ବୋଲି ଅଭିଯୋଗ ହୋଇଛି। ଜଗତ୍ସିଂହପୁର ଜିଲା କୁଜଙ୍ଗ ମତ୍ସ୍ୟବିଭାଗ କାର୍ଯ୍ୟାଳୟରେ ଏପରି ଘଟଣାକୁ ନେଇ ମତ୍ସ୍ୟଜୀବୀମାନେ ରାଷ୍ଟ୍ରପତିଙ୍କ ଠାରୁ ଆରମ୍ଭ କରି ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ମତ୍ସ୍ୟବିଭାଗ, ଜଗତ୍ସିଂହପୁର ଜିଲା ପ୍ରଶାସନ ନିକଟରେ ଅଭିଯୋଗ କରିଛନ୍ତି।
ବିଶ୍ୱାଳୀ ଗ୍ରାମର ମଥୁରାନନ୍ଦ ତରାଇ, ରଞ୍ଜନ ମାଝୀ, ଯୋଗେନ୍ଦ୍ର ସାମଲଙ୍କ ସମେତ ଶତାଧିକ ମତ୍ସ୍ୟଜୀବୀଙ୍କ ଅଭିଯୋଗ ଅନୁଯାୟୀ, ସରକାରଙ୍କ ପକ୍ଷରୁ ଆସୁଥିବା ସହାୟତା ରାଶିକୁ ପାରମ୍ପରିକ ମତ୍ସ୍ୟଜୀବୀମାନଙ୍କୁ ଦିଆଯିବା ବଦଳରେ ବଙ୍ଗୀୟ ଲୋକଙ୍କୁ ଦିଆଯାଉଛି। ଯେଉଁ ବଙ୍ଗୀୟ ଲୋକଙ୍କୁ ଦିଆଯାଇଛି ସେମାନଙ୍କ ଜାତି ସାଧାରଣ (ଜେନେରାଲ)ବୋଲି ଦର୍ଶାଯାଇଛି। ଏଭଳି ଦୁର୍ନୀତି ସମ୍ପର୍କରେ ତଦନ୍ତ କରି ବିଭାଗୀୟ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାପାଇଁ ସେମାନେ ଦାବି କରିଛନ୍ତି। ଏ ସମ୍ପର୍କରେ ଜନସୂଚନା ଆଇନ ଜରିଆରେ ତଥ୍ୟ ମଗାଯାଇଥିଲା। କୁଜଙ୍ଗ ମତ୍ସ୍ୟବିଭାଗ ଜନସୂଚନା ଅଧିକାରୀ ଜ୍ୟୋତିପ୍ରକାଶ ଆଚାର୍ଯ୍ୟଙ୍କ ଚିଠି (ନଂ. ୩୩୦୫) ଅନୁଯାୟୀ, ମତ୍ସ୍ୟଜୀବୀଙ୍କ ଜୀବିକା ନିର୍ବାହ ନିମନ୍ତେ ୨୦୨୧-୨୨ ଆର୍ଥିକ ବର୍ଷରେ ୫୨ ଲକ୍ଷ ୬୦ହଜାର ଟଙ୍କା ପ୍ରଦାନ କରାଯାଇଛି। ସେଥିରେ ରାଜ୍ୟ ଓ କେନ୍ଦ୍ର ସରକାରଙ୍କ ରିହାତି ଅର୍ଥ ୨୬ ଲକ୍ଷ ୩୦ ହଜାର ଟଙ୍କା ଲେଖାଏଁ ରହିଛି। ସେହିପରି ୨୦୨୨-୨୩ ଆର୍ଥିକ ବର୍ଷରେ ୮୪ ଲକ୍ଷ ୩୨ହଜାର ଟଙ୍କା ମତ୍ସ୍ୟଜୀବୀଙ୍କୁ ଦିଆଯାଇଛି। ଏଥିରେ ୨୦୨୧-୨୨ର ୪୩ ଜଣ ମତ୍ସ୍ୟଜୀବୀଙ୍କ ନାମ ରହିଛି। ସେହି ତାଲିକାରେ ୧୨ ଜଣ ବଙ୍ଗୀୟ ଲୋକଙ୍କ ନାମ ଅଛି। ଅଠରବାଙ୍କୀ ମୂଷାଡିଆ ବସ୍ତିର ଅନିମେଶ ମଣ୍ଡଳଙ୍କ ଜାତି ସାଧାରଣ ହୋଇଥିତ୍ବାବେଳେ ଡଙ୍ଗା ଜାଲ ବାବଦରେ ୫ ଲକ୍ଷ ୪୩ ହଜାର ଟଙ୍କା ଦିଆଯାଇଛି। ସେଥିରେ ସବ୍ସିଡି ବାବଦରେ ୨ ଲକ୍ଷ ୧୭ ହଜାର ୨୦୦ ଟଙ୍କା ଦିଆଯାଇଛି। ଏପରି ୧୭୮ ଅଣପାରମ୍ପରିକ ମତ୍ସ୍ୟଜୀବୀଙ୍କ ନାମ ୨୦୨୧ ରୁ ୨୦୨୪ ବର୍ଷ ମଧ୍ୟରେ ଥିବା ସୂଚନା ଅଧିକାର ତଥ୍ୟରୁ ଜଣାପଡ଼ିଛି। ଏ ସମ୍ପର୍କରେ ସହକାରୀ ମତ୍ସ୍ୟ ଅଧିକାରୀ ତୁଷାରକାନ୍ତ ମହାପାତ୍ରଙ୍କ ସହ ମୋବାଇଲ୍ରେ ଯୋଗାଯୋଗ କରାଯାଇଥିଲେ ମଧ୍ୟ ସେ ଉଠାଇ ନଥିଲେ। ଏ ପ୍ରସଙ୍ଗରେ ଆଲୋଚନା ପାଇଁ ତାଙ୍କ କାର୍ଯ୍ୟାଳୟରେ ପହଞ୍ଚତ୍ ଘଟଣା ସମ୍ପର୍କରେ ପଚାରିବାରୁ ମହାପାତ୍ର ଟିକିଏ ଆସୁଛି ବୋଲି କହି ଏକ ସ୍କୁଟି ଧରି ବଜାରକୁ ପଳାଇଥିଲେ। ୨ ଘଣ୍ଟା ଅପେକ୍ଷା କରିବା ପରେ ମଧ୍ୟ ସେ କାର୍ଯ୍ୟାଳୟକୁ ଆସି ନ ଥିଲେ। ଏ ସମ୍ପର୍କରେ ଜନସୂଚନା ଅଧିକାରୀ ଆଚାର୍ଯ୍ୟଙ୍କୁ ପଚାରିବାରୁ ଯେଉଁମାନେ ଅନଲାଇନରେ ଆବେଦନ କରିଥିଲେ,ସେମାନେ ତାଙ୍କ ଜାତି ଦର୍ଶାଇ ନାହାନ୍ତି। ସେଥିପାଇଁ ଜାତି ସାଧାରଣ ଦର୍ଶାଇ ଋ଼ଣ ଓ ସବ୍ସିଡି ଦିଆଯାଇଛି।