ବେଙ୍ଗାଲୁରୁ,୫।୯: ରବିବାର ରାତିସାରା ପ୍ରବଳ ବର୍ଷା ଫଳରେ ବେଙ୍ଗାଲୁରୁର ଅନେକ ଅଞ୍ଚଳ ଜଳବନ୍ଦୀ ହୋଇ ରହିଛି। ରାସ୍ତା ଜଳମଗ୍ନ ହୋଇ ସହରର ଗୁରୁତ୍ୱପୂର୍ଣ୍ଣ ସ୍ଥାନରେ ଟ୍ରାଫିକ ସମସ୍ୟା ଦେଖାଦେଇଛି। ସପ୍ତାହରେ ଏହା କର୍ନାଟକରେ ଦ୍ୱିତୀୟ ଥର ଭୟଙ୍କର ବନ୍ୟା ପରିସ୍ଥିତି ଦେଖାଦେଇଛି।
ରବିବାର ରାତିରେ ବର୍ଷା ପରେ ବିଭିନ୍ନ ଆପାର୍ଟମେଣ୍ଟର ତଳ ମହଲା ବୁଡ଼ି ରହିଥିବା ବେଳେ ଅନେକ ରାସ୍ତା ଜଳମଗ୍ନ ହୋଇ ଯିବାରୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। ଏନେଇ ଜରୁରୀ ନ ପଡ଼ିଲେ ଘରୁ ବାହାରକୁ ନ ଯିବାକୁ ଏବଂ ପିଲାମାନଙ୍କୁ ସ୍କୁଲକୁ ନ ପଠାଇବାକୁ ଅନୁରୋଧ କରାଯାଇଛି।
ଇକୋସ୍ପେସ, ବେଲାଣ୍ଡୁର, କେୟାର ମାର୍କେଟ, ରେଶମ ବୋର୍ଡ ଜଙ୍କସନ ଏବଂ ଭର୍ଥୁର ନିକଟରେ ଥିବା ରିଙ୍ଗ ରୋଡ ଆଦି ଅଞ୍ଚଳ ପ୍ରଭାବିତ ହୋଇଛି। ପୁରୁଣା ବିମାନବନ୍ଦର ରୋଡରେ ବନ୍ୟା ଜଳ ଯୋଗୁ ଏକ ବସ ଅଟକି ରହିଛି। ଗତ ସପ୍ତାହ ବର୍ଷାରେ ମଧ୍ୟ ରାସ୍ତା ଜଳମଗ୍ନ ହୋଇଯାଇଥିଲା। ମୁଖ୍ୟମନ୍ତ୍ରୀ ବାସବରାଜ ବମ୍ମାଇ ମଧ୍ୟ ବିଭିନ୍ନ ଅଞ୍ଚଳ ପରିଦର୍ଶନ କରିଥିଲେ। ଇତିମଧ୍ୟରେ ଉଦ୍ଧାରକାରୀ ଦଳ ଡଙ୍ଗା ସାହାଯ୍ୟରେ ଲୋକଙ୍କୁ ଉଦ୍ଧାର କରି ଅନ୍ୟତ୍ର ସ୍ଥାନାନ୍ତର କରୁଛନ୍ତି। ମହାଦେବପୁରରେ ୩୦ରୁ ଅଧିକ ଆପାର୍ଟମେଣ୍ଟର ତଳ ମହଲାରେ ପାଣି ଜମି ରହିଛି। ଏପରିକି ସହରର ବିଭିନ୍ନ ମୁଖ୍ୟ ରାସ୍ତାରେ ପାଣି ଭର୍ତ୍ତି ରହିଥିବାରୁ ଯାତାୟାତ ପ୍ରଭାବିତ ହୋଇଛି।
ଅନ୍ୟପକ୍ଷେ ବନ୍ୟା ଦ୍ୱାରା ବହୁ କୋଟି ଟଙ୍କାର କ୍ଷତି ଘଟିଛି ବୋଲି ଆଇଟି ଏବଂ ବିଭିନ୍ନ ବ୍ୟାଙ୍କିଙ୍ଗ୍ ସଂସ୍ଥା ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଚିଠି କରାଯାଇଛି। ଏନେଇ ମୁଖ୍ୟମନ୍ତ୍ରୀ ବମ୍ମାଇ ସରକାରଙ୍କ ପକ୍ଷରୁ ଆଇଟି କମ୍ପାନୀଗୁଡିକୁ ଡାକି ସମସ୍ୟାର ସମାଧାନ କରାଯିବ ବୋଲି କହିଛନ୍ତି।