ବେଙ୍ଗାଲୁରୁ,୬।୧: ବେଙ୍ଗାଲୁରୁର ଏକ ମନ୍ଦିରରେ ଜଣେ ମହିଳାଙ୍କୁ ବାଡ଼ିିରେ ପିଟିବା ସହ ଗୋଇଠା ମାରିବା ଏବଂ ଘୋଷାଡ଼ିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ହେମବତୀ ନାମ୍ନୀ ଉକ୍ତ ମହିଳା ଅମୃଥାହାଲି ଥାନାରେ ଏନେଇ ଏତଲା ଦେଇଛନ୍ତି। ଅଭିଯୋଗ ଅନୁଯାୟୀ ଗତ ମାସ ୨୧ ତାରିଖରେ ସେ ସ୍ଥାନୀୟ ଲକ୍ଷ୍ମୀନରସିଂହ ସ୍ବାମୀ ମନ୍ଦିରକୁ ଯାଇଥିବା ବେଳେ ମନ୍ଦିରର ଧର୍ମଦର୍ଶୀ ମୁନିକ୍ରିଷ୍ଣା ତାଙ୍କୁ ଆକ୍ରମଣ କରିଥିଲେ। ମହିଳାଙ୍କୁ ଅଭିଯୁକ୍ତ ବାରମ୍ବାର ମାଡ଼ ମାରିବା ସହ ଚୁଟି ଧରି ଘୋଷଡ଼ୁଥିବା ଉକ୍ତ ଭିଡିଓରୁ ଦେଖିବାକୁ ମିଳିଛି। ମୁନିକ୍ରିଷ୍ଣାଙ୍କ ବିରୋଧରେ ଆଇପିସିର ଧାରା ୩୫୪ରେ ମାମଲା ରୁଜୁ ହୋଇଛି। ତେବେ ଅଭିଯୁକ୍ତଙ୍କ କହିବା ଅନୁଯାୟୀ ମହିଳା ଜଣକ ଭଗବାନ ଭେଙ୍କଟେଶ୍ୱରଙ୍କୁ ତାଙ୍କ ସ୍ବାମୀ କହିବା ସହ ମନ୍ଦିରରେ ଥିବା ମୂର୍ତ୍ତି ପାଖରେ ବସିବାକୁ ଚାହିଁଥିଲେ। ମୁନିକ୍ରିଷ୍ଣା ମନା କରିବାରୁ ସେ ତାଙ୍କ ଉପରକୁ ଛେପ ପକାଇଥିଲେ। ସେ ମହିଳାଙ୍କୁ ବାହାରିଯିବା ଲାଗି କହିବା ସତ୍ତ୍ୱେ ସେ ନ ଶୁଣିବାରୁ ମୁନିକ୍ରିଷ୍ଣା ତାଙ୍କୁ ମାଡ଼ମାରି ବାହାର କରିଦେଇଥିଲେ ବୋଲି କହିଛନ୍ତି।
