ଡାବୁଗାଁ, ୧୭।୭ (ପ୍ରଜ୍ଞାରଞ୍ଜନ ପରିଡ଼ା): ନବରଙ୍ଗପୁର ଜିଲା ଡାବୁଗାଁ ବ୍ଳକ ମେଦନା ପଞ୍ଚାୟତ ଅଧୀନ ଚାଟିଗୁଡ଼ା ଗ୍ରାମରେ ବର୍ଷା ପାଇଁ ବେଙ୍ଗବେଙ୍ଗୁଲୀ ବାହାଘର ଶନିବାର ସାରେ ଆରମ୍ଭ ହୋଇଛି। ଏହା ୯ ଦିନ ଧରି ଚାଲିବ।
ସ୍ଥାନୀୟ ଠାକୁରାଣୀ ମନ୍ଦିରରେ ଗ୍ରାମର ଶତାଧିକ ମହିଳା ପୁରୁଷ ଏକାଠି ହୋଇ ସେଠାରେ ପାରମ୍ପରିକ ରୀତିନୀତି ଅନୁସାରେ ପୂଜାପାଠ କରିଥିଲେ। ସେଠାରୁ ଭୀମା ମନ୍ଦିରକୁ ଆସି ସେଠାରେ ଭୀମା ମୂର୍ତ୍ତିଙ୍କୁ ଗୋବରରେ ପୋତିବା ସହ ପୂଜାପାଠ କରାଯାଇଥିଲା। ପରେ ଗ୍ରାମରେ ଥିବା ପୋଖରୀରୁ ବେଙ୍ଗବେଙ୍ଗୁଲୀ ଆଣି ସେମାନଙ୍କୁ ନୂତନ ମାଟିହାଣ୍ଡିରେ ରଖାଯାଇଥିଲା। ସେଠାରେ ପାରମ୍ପରିକ ରୀତିନୀତି ଅନୁସାରେ ବେଙ୍ଗ ଓ ବେଙ୍ଗୁଲୀକୁ ପୂଜା କରାଯାଇଛି। ସୋମବାର ସକାଳୁ ପୁଣି ସ୍ଥାନୀୟ ଲୋକମାନେ ପୂଜାପାଠ କରୁଛନ୍ତି। ଏହି ବେଙ୍ଗ ବେଙ୍ଗୁଲୀ ବାହାଘର ୯ ଦିନ ଧରି ଚାଲିବ। ୯ ଦିନ ପରେ ସେମାନଙ୍କୁ ପୋଖରୀରେ ବିସର୍ଜନ କରାଯିବ ବୋଲି ଗାଉଟିଆ ସୂଚନା ଦେଇଛନ୍ତି। ତେବେ ଗାଉଟିଆ ସାହିରେ କନ୍ୟା ପକ୍ଷ ରହିଥିବା ବେଳେ ପୂଜାରୀ ସାହି କୁ ବରପକ୍ଷ କରାଯାଇଛି। ଚାଟିଗୁଡ଼ା ଗ୍ରାମରେ ପ୍ରଥମ ଥର ବେଙ୍ଗବେଙ୍ଗୁଲୀ ବାହାଘର କରାଯାଉଛି। ଏପରି କଲେ ଭଲ ଫସଲ ହୁଏ ବୋଲି ଲୋକଙ୍କର ବିଶ୍ୱାସ ରହିଛି।
ବ୍ଲକରେ ଚଳିତ ବର୍ଷ ସ୍ବଳ୍ପ ବର୍ଷା ଯୋଗୁ ଚାଷ କାମ ଆଗେଇ ପାରୁନାହିଁ। ଧାନ ଚାଷ ଅଧିକ ପ୍ରଭାବିତ ହେବାର ଆଶଙ୍କା ରହିଛି। ସ୍ଥାନୀୟ ଚାଷୀମାନେ ଅନୁକୂଳ ପାଗ ଦେଖି ଧାନ ତଳି ପକାଇଥିବା ବେଳେ ବର୍ଷା ଅଭାବ ଯୋଗୁ ତଳି ଉପାଡି ହେଉନାହିଁ। ସେହିପରି ଧାନ ଜମିଗୁଡ଼ିକରେ ପାଣି ନ ଥିବା ଯୋଗୁ ଧାନ ରୁଆ କାମ ହୋଇପାରୁନାହିଁ। ଏହାକୁ ନେଇ ଚାଷୀମାନେ ଚିନ୍ତାରେ। ୭ ଦିନ ମଧ୍ୟରେ ଜମିରେ ଧାନ ତଳା ରୋଇଲା ଭଳି ବର୍ଷା ନ ହେଲେ ଚାଷ ନଷ୍ଟହେବା ଆଶଙ୍କା ରହିଛି। ବର୍ଷାଭାବ ଯୋଗୁ ଚାଷୀ ମୁଣ୍ଡରେ ହାତ ଦେଇ ବସିଥିବାବେଳେ ଚାଷକାମରେ ଶ୍ରମିକଭାବେ ନିୟୋଜିତ ଲୋକେ କାମ ପାଇପାରୁନାହାନ୍ତି। ଏଭଳି ସ୍ଥିତିରେ ପରିବାର ପ୍ରତିପୋଷଣ କିଭଳି ହେବ ସେ ନେଇ ଶ୍ରମିକମାନେ ମଧ୍ୟ ଚିନ୍ତାରେ ରହିଛନ୍ତି। ଯଦି ପ୍ରଶାସନ ପକ୍ଷରୁ ଡାବୁଗାଁ ବ୍ଲକରେ ଥିବା ଜମିଗୁଡିକରେ ଜଳସେଚନର ସୁବିଧା କରାଗଲେ ଚାଷୀମାନେ ବର୍ଷାପାଣି ଉପରେ ନିର୍ଭର ନ କରି ବର୍ଷକୁ ୨ଥର ଚାଷ କରିବା ସହ ତାଙ୍କର ଆର୍ଥିକ ମାନଦଣ୍ଡ ସୁଧୁରିପାରନ୍ତା। ତେଣୁ ପ୍ରଶାସନ ତୁରନ୍ତ ଜଳ ସେଚନ ବ୍ୟବସ୍ଥା କରନ୍ତୁ ବୋଲି ଚାଷୀମାନେ ଦାବି କରିଛନ୍ତି।