ବ୍ରହ୍ମପୁର ଅଫିସ,୨୭।୬- ଗଞ୍ଜାମ ଜିଲାରେ କରୋନା ସଂକ୍ରମଣ ବନ୍ଦ ହେବାର ନା ନେଉନାହିଁ। ଦିନକୁ ଦିନ ଏହା ବଢ଼ିବାରେ ଲାଗିଛି। ଏହାକୁ ଆଖି ଆଗରେ ରଖି ରାଜ୍ୟ ସରକାର ୧୧ ଟି ଜିଲାରେ ଜୁନ ମାସ ପ୍ରତି ସପ୍ତାହର ଶେଷ ଦୁଇ ଦିନ ଅର୍ଥାତ ଶନିବାର ଓ ରବିବାର ସମ୍ପୂର୍ଣ ଶଟ୍ଡାଉନ ଘୋଷଣା କରିଛନ୍ତି। ଗୋଟିଏ ଦିନରେ ବ୍ରହ୍ମପୁର ପୋଲିସ ଜିଲାର ଜଣେ ସବଇନ୍ସପେକ୍ଟର (ଏସ୍ଆଇ ) ସମେତ ୮ ଜଣ କର୍ମଚାରୀଙ୍କ ନମୁନା ପଜିଟିଭ୍ ଆସିଥିବା ନେଇ ବ୍ରହ୍ମପୁର ଏସ୍ପି ପିନାକ ମିଶ୍ର ଶୁକ୍ରବାର ରାତିରେ ଟୁଇଟ୍ ଯୋଗେ ସୂଚନା ଦେଇଛନ୍ତି । ପୂର୍ବରୁ ୨ ଦିନିଆ ସଟ୍ଡାଉନ ଘୋଷଣା ହୋଇଥିବା ବେଳେ ଗଞ୍ଜାମ ଜିଲାପାଳ ବ୍ରହ୍ମପୁର ମହାନଗର ପାଇଁ ଶନିବାରଠାରୁ ୪ ଦିନିଆ ଶଟ୍ଡାଉନ ଘୋଷଣା କରିଥିଲେ। ଶଟ୍ଡାଉନର ପ୍ରଥମ ଦିନ ମହାନଗରରେ ଏହାର ଜୋରଦାର ପ୍ରଭାବ ଦେଖିବାକୁ ମିଳିଛି। ମେଡିକାଲ କାମ ବ୍ୟତୀତ ଘରୁ କେହି ବାହାରି ନାହାନ୍ତି । ସହରରେ ଥିବା ସମସ୍ତ ଦୋକାନ, ବଜାର, ମାର୍କେଟ କମ୍ପ୍ଲେକ୍ସ ଓ ବ୍ୟବସାୟିକ ପ୍ରତିଷ୍ଠାନ ଗୁଡିକ ବନ୍ଦ ରହିଥିଲା। ଚାରି ଦିନିଆ ଶଟ୍ଡାଉନ ଯୋଗୁ ଶନିବାର ରାସ୍ତାଘାଟ ଶୁନଶାନ ରହିଥିବା ବେଳେ ବିଭିନ୍ନ ଛକରେ ପୋଲିସ ମୁତୟନ ରହିଛନ୍ତି। ଏପରିକି ସହରର ବିଭିନ୍ନ ଗଳିରେ ପୋଲିସ ପେଟ୍ରୋଲିଂ କରିବା ସହ ଲୋକମାନଙ୍କୁ ଘରୁ ଜରୁରୀ କାମ ବିନା ବାହାରକୁ ନ ବାହାରିବାକୁ ସଚେତନ କରିଥିଲା ।ସଟଡାଉନ ବେଳେ ମେଡିକାଲ, କ୍ଲିନିକ , ପେଟ୍ରୋଲ ପମ୍ପ ,ଔଷଧ ଦୋକାନ ଭଳି କିଛି ଜରୁରୀ ସେବା ଖୋଲା ରହିବା ପାଇଁ ଅନୁମତି ରହିଥିଲାନ୍। ସହରର ଅର୍ଣ୍ଣପୁର୍ଣ୍ଣା ମାର୍କେଟ ,ବଡବ୍ଜ଼ାର ହୋଲସେଲ ତେଜରାତି ବଜ଼ାର,ଗିରି ମାର୍କେଟ , ସାନ ବଜ଼ାରର ସମସ୍ତ ଦୋକାନ ବନ୍ଦ ରହିଥିଲା। ସେହିପରି ମର୍ଦ୍ଧରାଜ ଭେଣ୍ଡିଂ ଜୋନ ,ବିଜିପୁର ଓ ଗେଟବଜ଼ାର ପରିବା ମାର୍କେଟ ବନ୍ଦ ରହିଥିଲା। ଏହି ୪ ଦିନିଆ ଶଟ୍ଡାଉନ ଘୋଷଣା ଯୋଗୁଁ ସହରବାସୀ ସମସ୍ତେ ନିୟମ ପାଳନ କରି ସମସ୍ତେ ଘର ଭିତରେ ରହିଛନ୍ତି। ସହରରେ କାଁ ଭାଁ କେଉଁଠି ବାଇକ ଚାଳକଙ୍କୁ ଦେଖିବାକୁ ମିଳିଛି। ତେବେ ରାସ୍ତାରେ ବୁଲୁଥିବା ଲୋକଙ୍କୁ ପୋଲିସ ଅଟକାଇ ପଚରାଉଚରା କରୁଛି। ଆଗାମୀ ଦିନ ମାନଙ୍କରେ ଶଟ୍ଡାଉନ ନିୟମକୁ ଆହୁରି କଡାକଡି ପାଳନ କରାଯିବ ବୋଲି ଅତିରିକ୍ତ ଏସ୍ପି ପ୍ରଶାନ୍ତ କୁମାର ମିଶ୍ର ସୂଚନା ଦେଇଛନ୍ତି ।