ସାତମାଇଲ, ୧୧।୧୦(ଡି.ଏନ୍.ଏ.): ହିନ୍ଦୋଳ ବ୍ଲକ ବାଲିମୀସ୍ଥିତ କ୍ୟାପିଟାଲ ଟ୍ରଷ୍ଟ ଫାଇନାନ୍ସ କମ୍ପାନୀରେ କାର୍ଯ୍ୟରତ ଏଜେଣ୍ଟ ତଥା ଖୋର୍ଦ୍ଧା ଜିଲା ମୁକ୍ତାପୁର ଅଞ୍ଚଳର ଅଜିତ ମହାପାତ୍ର (୨୪)ଙ୍କ ସନ୍ଦେହଜନକ ମୃତ୍ୟୁ ଉପରୁ ରହସ୍ୟ ଖୋଲୁନାହିଁ। ପୁଅର ଏଭଳି ମୃତ୍ୟୁକୁ ସହଜରେ ଗ୍ରହଣ କରିପାରୁ ନ ଥିବା ପରିବାର ଲୋକେ ନ୍ୟାୟ ଦାବିରେ ସୋମବାର ଅପରାହ୍ନ ୨ଟାରୁ ରାତି ୭ଟା ଯାଏ ଥାନା ଘେରିଥିଲେ। ଥାନାଧିକାରୀଙ୍କ ପକ୍ଷରୁ ନିରପେକ୍ଷ ତଦନ୍ତର ପ୍ରତିଶ୍ରୁତି ମିଳିବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ସୂଚନାଯୋଗ୍ୟ, ଅଜିତ୍ ୩ ବର୍ଷ ହେଲା ସମ୍ପୃକ୍ତ କମ୍ପାନୀରେ କାର୍ଯ୍ୟ କରୁଥିଲେ। ଗତମାସ ୨୦ ତାରିଖରେ ସେ ଆତ୍ମହତ୍ୟା କରିଥିବା ନେଇ ତାଙ୍କ ସହକର୍ମୀମାନେ ସୂଚନା ଦେଇଥିଲେ। ଘର ଲୋକେ ପହଞ୍ଚତ୍ ବାଲିମୀ ଥାନାରେ ଲିଖିତ ଅଭିଯୋଗ କରିଥିଲେ। ଏହାପରେ ପୋଲିସ ମୃତଦେହ ବ୍ୟବଚ୍ଛେଦ କରାଇ ହସ୍ତାନ୍ତର କରିଥିଲା। ତେବେ ଅଜିତ୍ଙ୍କ ମୃତ୍ୟୁକୁ ନେଇ ପ୍ରଶ୍ନ ଉଠାଇଛନ୍ତି ବାପା ରାମଚନ୍ଦ୍ର ମହାପାତ୍ର। ତାଙ୍କ କହିବା କଥା, ଯଦି ପୁଅ ଗାମୁଚ୍ଛା ଲଗାଇ ଆତ୍ମହତ୍ୟା କରିଥିଲେ; ତେବେ ତାଙ୍କ ମୃତଦେହକୁ ଡାକ୍ତରଖାନା ନେବା ବଦଳରେ କାହିଁକି ବାରଣ୍ଡାରେ ଶୁଆଇ ଦିଆଯାଇଥିଲା। ତେଣୁ ଏଥିରେ ନିଶ୍ଚୟ କିଛି ରହସ୍ୟ ରହିଛି। ପୋଲିସ ନିରପେକ୍ଷ ତଦନ୍ତ କଲେ ଏହାର ସତ୍ୟାସତ୍ୟ ପଦାକୁ ଆସିବ ବୋଲି ରାମଚନ୍ଦ୍ର କହିଛନ୍ତି। ଅପରପକ୍ଷେ ପୋଲିସ ମୃତ ଯୁବକଙ୍କ ପରିବାରକୁ ବ୍ୟବଚ୍ଛେଦ ରିପୋର୍ଟ ପ୍ରଦାନ କରିବା ସତ୍ତ୍ୱେ ଏଥିରେ ସନ୍ତୁଷ୍ଟ ହୋଇ ନ ଥିଲେ ପରିବାର ସଦସ୍ୟ। ସେମାନେ ଏହାକୁ ସନ୍ଦେହ କରିବା ସହ ଥାନା ସମ୍ମୁଖରେ ଧାରଣାରେ ବସିଥିଲେ। ଏଥିସହ ଫାଇନାନ୍ସ କମ୍ପାନୀର କର୍ମଚାରୀଙ୍କ ଲାଇ ଡିଟେକ୍ଟ ଟେଷ୍ଟ କରିବା, ଉପଯୁକ୍ତ ଅନୁସନ୍ଧାନ କରି କମ୍ପାନୀଠାରୁ କ୍ଷତିପୂରଣ ପ୍ରଦାନ ଦିଗରେ ସହାୟତା କରିବାକୁ ସେମାନେ ଦାବି କରିଛନ୍ତି। ପୋଲିସ ଦାବିପତ୍ର ଗ୍ରହଣ କରି ନିର୍ଭର ପ୍ରତିଶ୍ରୁତି ଦେବାପରେ ପରିବାର ଲୋକ ଧାରଣାରୁ ଓହରିଥିଲେ।