ବର୍ତ୍ତମାନ ତ୍ୱଚାର ଯତ୍ନ ପାଇଁ ଅନେକେ ବ୍ୟୁଟି ପାର୍ଲର ଯିବାଠାରୁ ଆରମ୍ଭ କରି ମାର୍କେଟ୍ରେ ମିଳୁଥିବା ବିଭିନ୍ନ ପ୍ରକାରର ଫେସ୍ପ୍ୟାକ୍ ମଧ୍ୟ ବ୍ୟବହାର କରୁଛନ୍ତି। ହେଲେ ଅନେକ ସମୟରେ ଏହା ତ୍ୱଚା ଉପରେ ନକାରାତ୍ମକ ପ୍ରଭାବ ପକାଉଥିବାର ନଜିର ରହିଛି। ତେଣୁ ଆପଣ ଚାହିଁଲେ ଉଜ୍ଜ୍ୱଳ, ବ୍ରଣ ଦାଗ ମୁକ୍ତ ତ୍ୱଚା ପାଇବା ଲାଗି ଘରେ ମଧ୍ୟ ବେସନ ବ୍ୟବହାର କରି ପ୍ରାକୃତିକ ଭାବେ ଫେସପ୍ୟାକ୍ ପ୍ରସ୍ତୁତ କରିପାରିବେ…
ବେସନରେ ଗୋଟିଏ ଚାମଚ ମୁଲତାନୀ ମାଟି ମିଶାନ୍ତୁ। ଏହି ପ୍ୟାକ୍କୁ ନିଜ ମୁହଁରେ ଲଗାନ୍ତୁ। ୨୦ ମିନିଟ୍ ପରେ ଏହାକୁ ଧୋଇ ଦିଅନ୍ତୁ। ଏହା ଆପଣଙ୍କ ତ୍ୱଚାକୁ ନରମ ଓ ସତେଜ ରଖିବ।
୨ଟି କମଳା ନିଅନ୍ତୁ। ସେଥିରୁ ଚୋପା ଛଡ଼ାଇ ରସ ବାହାର କରନ୍ତୁ। ସେଥିରେ ଏକ ଚାମଚ କ୍ଷୀର ଏବଂ ଚିମୁଟାଏ ହଳଦୀ ଏବଂ ଗୋଟେ ଚାମଚ ଲେଖାଏ ବେସନ, ମହୁ ମିଶେଇ ପ୍ୟାକ୍ ପ୍ରସ୍ତୁତ କରନ୍ତୁ। ଏହାକୁ ନିଜ ମୁହଁ ଏବଂ ବେକରେ ଭଲଭାବେ ଲଗାଇ ଧୀରେ ଧୀରେ ମସାଜ କରନ୍ତୁ ଏବଂ ୨୦ମିନିଟ୍ ପର୍ଯ୍ୟନ୍ତ ଛାଡ଼ିଦିଅନ୍ତୁ। ଏହା ପରେ ପାଣିରେ ଭଲ ଭାବେ ଧୋଇ ଦିଅନ୍ତୁ। ସପ୍ତାହରେ ଥରେ କିମ୍ବା ଦୁଇ ଥର ଏହି ପ୍ୟାକ୍ ଲଗାଇଲେ ଆପଣଙ୍କ ମୁହଁ ଉଜ୍ଜ୍ୱଳ ଏବଂ ଗୋରା ଦିଶିବ।
ଯଦି ଆପଣ ବ୍ଳାକ୍ହେଡସ୍ ଯୋଗୁ ଚିନ୍ତିତ ତେବେ ୨ଚାମଚ ବେସନରେ ଗୋଟେ ଚାମଚ ଲେମ୍ବୁର ରସ ମିଶାଇ ମୁହଁରେ ଲଗାନ୍ତୁ। ଏହି ସ୍କ୍ରବ ପ୍ୟାକ୍କୁ ସପ୍ତାହରେ ଦୁଇ ଥର ବ୍ୟବହାର କଲେ ବ୍ଲାକ୍ହେଡ୍ସ ଲିଭେଇବାରେ ସାହାଯ୍ୟ କରିବ।
ପ୍ରାକୃତିକ ବାଦାମ ଏବଂ ବେସନ ଫେସ୍ପ୍ୟାକ୍ ଆପଣଙ୍କ ମୁହଁର ଗ୍ଲୋ ବଢାଇ ଆକର୍ଷଣୀୟ ଦେଖାଯିବାରେ ସାହାଯ୍ୟ କରେ। ଏଥିପାଇଁ ୩ ଚାମଚ ବେସନ, ୨ ଚାମଚ ବାଦାମ ପେଷ୍ଟ ଏବଂ କିଛି ବୁନ୍ଦା ଲେମ୍ବୁ ରସ ମିଶାଇ ପ୍ୟାକ୍ ପ୍ରସ୍ତୁତ କରନ୍ତୁ। ଏହାକୁ ମୁହଁରେ ଲଗାଇବା ପରେ କିଛି ସମୟ ରଖି ଧୋଇଦିଅନ୍ତୁ।