ସମ୍ବଲପୁର,୨୯।୩(ବ୍ୟୁରୋ): ସମଗ୍ର ବିଶ୍ୱରେ ମାନ୍ଦାବସ୍ଥା ଚାଲିଥିବା ବେଳେ ସମ୍ବଲପୁର ଆଇଆଇଏମ୍କୁ ଚଳିତ ଶିକ୍ଷାବର୍ଷରେ ସଫଳତା ମିଳିଛି। ଛାତ୍ରୀଛାତ୍ରଙ୍କୁ ଜାତୀୟ ଓ ଅନ୍ତର୍ଜାତୀୟ କମ୍ପାନୀରେ ଶତପ୍ରତିଶତ ନିଯୁକ୍ତି ମିଳିଛି। ଦୁଇ ଛାତ୍ରୀ ଆଭା ମାଲହୋତ୍ରାଙ୍କୁ ବାର୍ଷିକ ସର୍ବାଧିକ ୬୪ ଲକ୍ଷ ୧୬ ହଜାର ଓ ରମେୟା ଆର୍ଙ୍କୁ ୬୪ ଲକ୍ଷ ୬୧ ହଜାର ଦରମାରେ କମ୍ପାନୀ ନିଯୁକ୍ତି ଦେଇଛି। ଦେଶର ଅନ୍ୟ ଆଇଆଇଏମ୍ ତୁଳନାରେ ସମ୍ବଲପୁର ଆଇଆଇଏମ୍ ବହୁତ ଭଲ ପ୍ରଦର୍ଶନ କରିଛି ବୋଲି ଆଇଆଇଏମ୍ ପରିସରରେ ଆୟୋଜିତ ଖବରଦାତା ସମ୍ମିଳନୀରେ ନିର୍ଦ୍ଦେଶକ ପ୍ରଫେସର ମହାଦେଓ ଜୟସ୍ବାଲ କହିଛନ୍ତି। ସେ ଆହୁରି କରିଛନ୍ତି, ଚଳିତ ବର୍ଷ ଡିସେମ୍ବର ମାସରୁ କ୍ୟାମ୍ପସରେ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିଲା। ଉକ୍ତ ମାସରେ ୮୦ ପ୍ରତିଶତ ନିଯୁକ୍ତି ମିଳିଯାଇଥିଲା। ଏଥିରେ ଦେଶ ଓ ଦେଶ ବାହାରର ୧୩୦ ନାମୀଦାମୀ କମ୍ପାନୀ ଯୋଗଦେଇଥିଲେ। ସମସ୍ତ ୧୬୭ ଛାତ୍ରୀଛାତ୍ରଙ୍କୁ ନିଯୁକ୍ତି ମିଳିଛି। ଆଇଆଇଏମ୍ରେ ୪୮ ପ୍ରତିଶତ କେବଳ ଛାତ୍ରୀଙ୍କ ପାଠ ପଢିବା ପାଇଁ ସୁଯୋଗ ଦିଆଯାଉଛି। କ୍ୟାମ୍ପସରେ ଅତ୍ୟାଧୁନିକ ଶ୍ରେଣୀଗୃହ ସହିତ ଶିକ୍ଷାଦାନ ପାଇଁ ଅନୁକୂଳ ବାତାବରଣ ରହିଛି। ଆମ ଅନୁଷ୍ଠାନ ସହିତ ବାହାରୁ ଶିକ୍ଷକ ଅଣାଯାଇ ପାଠ ପଢାଯାଉଛି। ଅନେକ ସମୟରେ ଅନ୍ଲାଇନ ମାଧ୍ୟମରେ ଅଧ୍ୟାପକ କ୍ଲାସ କରୁଛନ୍ତି। ହେଲେ ଦୁଇଜଣ ଛାତ୍ର ନିଯୁକ୍ତି ପାଇଥିଲେ ମଧ୍ୟ ଯୋଗଦାନ କରିନାହାନ୍ତି। ସେମାନେ ନିଜ ଉଦ୍ୟୋଗ ଆରମ୍ଭ କରିଛନ୍ତି। ଅନ୍ୟ କେତେଜଣ ଛାତ୍ରୀଛାତ୍ର ଉଦ୍ୟୋଗ କରିବାକୁ ଚାହୁଁଥିଲେ ମଧ୍ୟ ବ୍ୟାଙ୍କରେ ଋଣ ଓ ଅନ୍ୟାନ୍ୟ ସମସ୍ୟା ଯୋଗୁ ଚାକିରିରେ ଯୋଗଦାନ କରିଛନ୍ତି। ଖୁବ୍ଶୀଘ୍ର ସମ୍ବଲପୁର ଉପକଣ୍ଠ ବସନ୍ତପୁରଠାରେ ନିର୍ମାଣ ହେଉଥିବା ଆଇଆଇଏମ୍ର ନୂତନ କ୍ୟାମ୍ପସ ଲୋକାର୍ପଣ କରାଯିବ। ଉକ୍ତ କ୍ୟାମ୍ପସରେ ଆହୁରି ଉନ୍ନତମାନର ଶିକ୍ଷାଦାନ ବ୍ୟବସ୍ଥା କରାଯାଇଛି ବୋଲି ସେ କହିଥିଲେ।
