କଟକ ଅଫିସ, ୫ା୯: ଦେଶର ପ୍ରଥମ ସ୍ମାର୍ଟ ଭିଲେଜ ଭାବେ ପ୍ରସିଦ୍ଧି ଲାଭ କରିଥିବା କଟକ ଜିଲା କଲରାବାଙ୍କଠାରେ ଡ. ଅଚ୍ୟୁତ ସାମନ୍ତଙ୍କ ପ୍ରଚେଷ୍ଟାରେ ପ୍ରତିଷ୍ଠା କରାଯାଇଥିବା କଳିଙ୍ଗ ଇଂଲିଶ ମିଡିୟମ ସ୍କୁଲ ସଫଳତା ହାସଲ କରିଛି। ଇଣ୍ଟରନ୍ୟାଶନାଲ ଏକ୍ସଲେନ୍ସ ଅନୁଷ୍ଠାନ ପକ୍ଷରୁ ବିଶ୍ୱର ଅନେକ ପ୍ରତିଷ୍ଠିତ ବିଦ୍ୟାଳୟର ଭିତ୍ତିଭୂମି ସୁଦୃଢୀକରଣ, ଗୁଣାତ୍ମକ ଶିକ୍ଷା ପ୍ରଦାନ ଓ ପାଠ୍ୟକ୍ରମରେ ନୂତନ ଜ୍ଞାନକୌଶଳ ପ୍ରଣୟନ ଇତ୍ୟାଦି ମାପଦଣ୍ଡକୁ ବିଚାରକୁ ନିଆଯାଇ ଜୁରୀମାନଙ୍କ ଦ୍ୱାରା ବିଭିନ୍ନ ବିଭାଗରେ ଶ୍ରେଷ୍ଠ ବିଦ୍ୟାଳୟକୁ ଚୟନ କରାଯାଇଥିଲା। ଏହି ମର୍ମରେ କଳିଙ୍ଗ ଇଂଲିଶ ମିଡିୟମ ସ୍କୁଲକୁ ବର୍ଷର ଶ୍ରେଷ୍ଠ ପ୍ରଦର୍ଶନକାରୀ ବିଦ୍ୟାଳୟ ହିସାବରେ ସମ୍ମାନିତ କରାଯାଇଛି। ଉପାନ୍ତ ଅଞ୍ଚଳର ପିଲାମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ ଲକ୍ଷ୍ୟ ନେଇ ଏହି ବିଦ୍ୟାଳୟ ପ୍ରତିଷ୍ଠା ହୋଇଥିଲା। ପରବର୍ତ୍ତୀ ସମୟରେ ଏହାର ପରିଚାଳନା ଦାୟିତ୍ୱ ଡ. ଇତି ସାମନ୍ତ ତୁଲାଇ ଆସୁଛନ୍ତି। ଏହି ସମ୍ମାନ ନିଶ୍ଚିତଭାବେ ଆଗାମୀ ଦିନରେ ଆମ୍ଭମାନଙ୍କୁ ଉତ୍ସାହିତ କରିବ ବୋଲି ସ୍କୁଲର ପ୍ରିନ୍ସିପାଲ ଆଶୁତୋଷ ମହାନ୍ତି କହିଛନ୍ତି। ଅନୁଷ୍ଠାନ ପକ୍ଷରୁ କୋରିଆରୁ ପଠାଯାଇଥିବା ଏହି ଆଓ୍ବାର୍ଡକୁ ରବିବାର ଇତି ସାମନ୍ତ ଗ୍ରହଣ କରିଛନ୍ତି ା
