ହାଙ୍ଗଝୋ, ୩୦।୯ (ପି.ଟି.): ଚଳିତ ଏସିଆନ ଗେମ୍ସର ଶୁଟିଂ ରେଞ୍ଜରେ ଭାରତୀୟ ଶୁଟରମାନେ ଅତ୍ୟନ୍ତ ପ୍ରଭାବୀ ପ୍ରଦର୍ଶନ କରିଛନ୍ତି। ଫଳରେ ଏଥର ଶୁଟିଂରେ ଭାରତକୁ ଶ୍ରେଷ୍ଠ ସଫଳତା ମିଳିଛି। ଭାରତର ଯୁବ ଶୁଟରମାନେ ପ୍ରତିପକ୍ଷ ପ୍ରତିଦ୍ୱନ୍ଦ୍ୱୀଙ୍କୁ କଡ଼ା ଚ୍ୟାଲେଞ୍ଜ ଦେଇ ଶୁକ୍ରବାର ୨ଟି ସ୍ବର୍ଣ୍ଣ ଓ ୩ ରୌପ୍ୟ ପଦକ ହାସଲ କରିଛନ୍ତି। ଫଳରେ କୌଣସି ଗୋଟିଏ ସଂସ୍କରଣରେ ଏଥର ଶୁଟରମାନେ ସର୍ବାଧିକ ପଦକ ହାସଲରେ ରେକର୍ଡ କରିଛନ୍ତି। ଗତ ୬ ଦିନରେ ଭାରତୀୟ ଶୁଟରମାନେ ୧୮ଟି ପଦକ ହାସଲ କରି ସାରିଛନ୍ତି। ଏହା ମଧ୍ୟରେ ୬ ସ୍ବର୍ଣ୍ଣ ଓ ୭ ରୌପ୍ୟ ପଦକ ସାମିଲ। ଏହା ପୂର୍ବରୁ ୨୦୦୬ ଦୋହା ଏସିଆନ ଗେମ୍ସରେ ଭାରତ ଶୁଟିଂରୁ ସର୍ବାଧିକ ୧୪ ପଦକ ପାଇଥିଲା। ଏଥର ଏହାକୁ ଅତିକ୍ରମ କରିଯାଇଛି। ଶୁକ୍ରବାର ଅନୁଷ୍ଠିତ ମହିଳା ୧୦ ମିଟର ଏୟାର ପିସ୍ତଲ ବ୍ୟକ୍ତିଗତ ଇଭେଣ୍ଟରେ ଭାରତର ପଲକ ଗୁଲିଆ ସ୍ବର୍ଣ୍ଣ ଓ ଇଶା ସିଂ ରୌପ୍ୟ ପଦକ ପାଇଛନ୍ତି। ସେହିପରି ମହିଳା ୧୦ ମିଟର ଏୟାର ପିସ୍ତଲ ଦଳଗତ ଇଭେଣ୍ଟରେ ପଲକ, ଇଶା ଓ ଦିବ୍ୟା ଥାଡିଗୋଲ ରୌପ୍ୟ ପଦକ ହାସଲ କରିଛନ୍ତି। ପୁରୁଷ ୫୦ ମିଟର ରାଇଫଲ ୩ ପୋଜିଶନ୍ସର ଦଳଗତ ବିଭାଗରେ ଐଶ୍ୱର୍ଯ୍ୟ ପ୍ରତାପ ସିଂ ତୋମାର, ସ୍ବପ୍ନିଲ କୁସାଲେ ଓ ଅଖିଲ ଶେଓରନ ସ୍ବର୍ଣ୍ଣ ପଦକ ଜିତି ଦେଶକୁ ଗର୍ବିତ କରିଛନ୍ତି। ୨୨ ବର୍ଷୀୟ ଐଶ୍ୱର୍ଯ୍ୟ ପୁରୁଷ ରାଇଫଲ ୩ ପୋଜିଶନ୍ସ ବ୍ୟକ୍ତିଗତ ଇଭେଣ୍ଟରେ ରୌପ୍ୟ ପଦକ ଅର୍ଜନ କରିଛନ୍ତି। ଶୁଟିଂ, ଟେନିସ, ସ୍କ୍ବାଶ୍ ଓ ଆଥଲେଟିକ୍ସକୁ ମିଶାଇ ୬ଷ୍ଠ ଦିବସରେ ଭାରତକୁ ମୋଟ ୮ଟି ପଦକ ମିଳିଛି।
ଭାରତର ଦୁଇ ଟିନ୍ଏଜ୍ ଶୁଟର ପଲକ ଓ ଇଶା ୧୦ ମିଟର ଏୟାର ପିସ୍ତଲ ଇଭେଣ୍ଟରେ ଓ୍ବାନ୍-ଟୁ ଫିନିଶ୍ କରି ଅନ୍ୟ ପ୍ରତିଦ୍ୱନ୍ଦ୍ୱୀଙ୍କୁ ନିରାଶ କରିଥିଲେ। ଶୀର୍ଷସ୍ଥାନ ପାଇଁ ଦୁଇ ଭାରତୀୟ ପରସ୍ପରକୁ ଚ୍ୟାଲେଞ୍ଜ ଦେଇଥିଲେ। ମାତ୍ର ଶେଷରେ ୧୭ ବର୍ଷୀୟା ପଲକ ବାଜି ମାରିଥିଲେ। ”ସେଠାରେ କାହା ସହିତ ପ୍ରତିଦ୍ୱନ୍ଦ୍ୱିତା ନ ଥିଲା। ମୋର ସବୁଠାରୁ ବଡ଼ ପ୍ରତିଦ୍ୱନ୍ଦ୍ୱୀ ମୁଁ ନିଜେ। ମୁଁ ସବୁବେଳେ ନିଜସହ ଲଢ଼େଇ କରିଥାଏ“ ବୋଲି ସ୍ବର୍ଣ୍ଣ ଜିତିବା ପରେ ପଲକ ପ୍ରକାଶ କରିଥିଲେ। ଏଥିରେ ପାକିସ୍ତାନର ତଲତ କିଶ୍ମାଲା ବ୍ରୋଞ୍ଜ ପଦକ ପାଇଥିଲେ। ସିନିୟର ବିଭାଗରେ ପଲକଙ୍କ ପାଇଁ ଏହାଥିଲା ବଡ଼ ପ୍ରତିଯୋଗିତାରେ ପ୍ରଥମ ଅନ୍ତର୍ଜାତୀୟ ସ୍ବର୍ଣ୍ଣ ପଦକ। ଫାଇନାଲ୍ସରେ ସେ ଗେମ୍ସ ରେକର୍ଡ ସହ ୨୪୨.୧ ପଏଣ୍ଟ ଶୁଟ୍ କରିଥିଲେ। ଇଶା ୨୩୯.୭ ପଏଣ୍ଟ ଶୁଟ୍ କରି ଦ୍ୱିତୀୟ ସ୍ଥାନରେ ସନ୍ତୁଷ୍ଟ ରହିଥିଲେ। ଗତ ବୁଧବାର ଇଶା ୨୫ ମିଟର ପିସ୍ତଲରେ ମଧ୍ୟ ରୌପ୍ୟ ପଦକ ପାଇଥିଲେ। ୫୦ ମିଟର ରାଇଫଲ ଆରେନାରେ ମଧ୍ୟ ଭାରତୀୟ ମାର୍କ୍ସମ୍ୟାନଙ୍କ ଚମକ ଦେଖିବାକୁ ମିଳିଥିଲା। ପୁରୁଷ ୩ ପୋଜିଶନ ଟିମ୍ର ସଦସ୍ୟ ଐଶ୍ୱର୍ଯ୍ୟ ୫୯୧, ସ୍ବପ୍ନିଲ ୫୯୧ ଓ ଶେଓରନ ୫୮୭ ପଏଣ୍ଟ ଶୁଟ୍ କରିଥିଲେ। ଫଳରେ ଭାରତୀୟ ଦଳ ୧୭୬୯ ବିଶ୍ୱରେକର୍ଡ ସ୍କୋର ସହ ସ୍ବର୍ଣ୍ଣ ପଦକ ପାଇଥିଲା। ଚାଇନା ୧୭୬୩ ଓ ଦକ୍ଷିଣ କୋରିଆ ୧୭୪୮ ପଏଣ୍ଟ ସହିତ ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ପାଇଥିଲା। ପୂର୍ବ ବିଶ୍ୱ ରେକର୍ଡ ପଏଣ୍ଟ ଅପେକ୍ଷା ଭାରତୀୟମାନେ ଅଧିକ ୮ ପଏଣ୍ଟ ଶୁଟ୍ କରିଥିଲେ। ପୁରୁଷ ୫୦ ମିଟର ରାଇଫଲ ୩ ପୋଜିଶନ ବ୍ୟକ୍ତିଗତ ଇଭେଣ୍ଟରେ ଐଶ୍ୱର୍ଯ୍ୟ ପ୍ରତାପ ସିଂ ତୋମାର ଅଳ୍ପକେ ସ୍ବର୍ଣ୍ଣ ପଦକ ମିସ୍ କରିଥିଲେ। ସେ ୪୫୯.୭ ପଏଣ୍ଟ ପାଇଥିବାବେଳେ ଚାଇନାର ଡୁ ଲିନ୍ସୁ ୪୬୦.୬ ପଏଣ୍ଟ ସହିତ ସ୍ବର୍ଣ୍ଣ ପଦକ ହାସଲ କରିଥିଲେ। ସେହିପରି ୧୦ ମିଟର ଏୟାର ପିସ୍ତଲ ଟିମ୍ ଇଭେଣ୍ଟରେ ୧୮ ବର୍ଷୀୟା ଇଶା ୫୭୯, ପଲକ ୫୭୭ ଓ ଦିବ୍ୟା ୫୭୫ ଏହିପରି ମୋଟ ୧୭୩୧ ପଏଣ୍ଟ ଶୁଟ୍ କରି ରୌପ୍ୟ ପଦକ ପାଇଥିଲେ। ୧୭୩୬ ପଏଣ୍ଟ ସହିତ ଚାଇନା ସ୍ବର୍ଣ୍ଣ ପଦକ ହାସଲ କରିଥିଲା।