ଭବାନୀପାଟଣା,୧୭।୫(ସ୍ବ.ପ୍ର.): କଳାହାଣ୍ଡି ଜିଲା ଧର୍ମଗଡ ସହରରେ ଆଇପିଏଲ୍ ମ୍ୟାଚକୁ ନେଇ ଖେଳା ହେଉଥିବା ସଟ୍ଟାଆଡ୍ଡା ଉପରେ ପୋଲିସ ଚଢ଼ାଉ କରି ଜଣେ ଯୁବକଙ୍କୁ ଗିରଫ କରିଛି। ସେ ହେଲେ ରାକେଶ ରଞ୍ଜନ ଚୌଧୁରୀ। ମଙ୍ଗଳବାର ରାକେଶଙ୍କୁ କୋର୍ଟ ଚାଲାଣ କରାଯିବ ବୋଲି ଧର୍ମଗଡ ଥାନା ଅଧିକାରୀ ଦୀପାଞ୍ଜଳି ପ୍ରଧାନ ସୂଚନା ଦେଇଛନ୍ତି।
ସହରର କେନ୍ଦୁମୁଣ୍ଡିପଡ଼ାରେ ଆଇପିଏଲ ସଟ୍ଟା ଖେଳ ଚାଲୁଥିବା ଖବର ପାଇ ଧର୍ମଗଡ ପୋଲିସ ଚଢାଉ କରିଥିଲା। ଏଥିରେ ସମ୍ପୃକ୍ତ ରାକେଶଙ୍କୁ ପୋଲିସ ଗିରଫ କରିଥିଲା। ରାକେଶଙ୍କଠାରୁ ନଗଦ ୭୦ ହଜାର ଟଙ୍କା, ୭ଟି ମୋବାଇଲ ଫୋନ୍, ଲାପଟପ୍, ଟଙ୍କାଗଣା ମେଶିନ, କାର ସହ ଏହି ସମ୍ପର୍କିତ ବହୁତ କାଗଜପତ୍ର ପୋଲିସ ଜବତ କରିଛି। ଏ ନେଇ ଧର୍ମଗଡ ଥାନାରେ ଏକ ମାମଲା (ନଂ.୧୧୬/୨୨) ରୁଜୁ ହୋଇଛି। ଧର୍ମଗଡ଼ ଡିଏସ୍ପି ଧିରଜ କୁମାର ଚୋପଦାରଙ୍କ ନେତୃତ୍ୱରେ ହୋଇଥିବା ଚଢ଼ାଉରେ ଆଇଆଇସି ଦୀପାଞ୍ଜଳିଙ୍କ ସମେତ ପୋଲିସ ଟିମ୍ ସାମିଲ ଥିଲେ।