ନୂଆଦିଲ୍ଲୀ,୧୮ା୧୨: ଭାରତରେ ଚାଲିଛି ପାକିସ୍ତାନୀ ବେଟିଂ ଆପ୍ ମାଲିକଙ୍କ ରାଜୁତି। ଟଙ୍କା ଦେଇ ଭାରତୀୟ ସେଲିବ୍ରେଟିଙ୍କୁ ବନାଇଛନ୍ତି ମୋହରା। ସାମାଜିକ ଗଣାମଧ୍ୟରେ ଚାଲିଛି ଜୋରଦାର ପ୍ରଚାର। ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଦ୍ୱାରା କରାଯାଇଥିବା ଏକ ତଦନ୍ତରୁ ଏହି ଖୁଲାସା ହୋଇଛି।
ସୂତ୍ରରୁ ପ୍ରକାଶ ଯେ ଇଡି ଦ୍ୱାରା ଅନୁସନ୍ଧାନ କରାଯାଉଥିବା ଏକ ବେଟିଂ ଆପ୍ ର୍ୟାକେଟ୍ ପାକିସ୍ତାନୀ ନାଗରିକଙ୍କର ଅଟେ। ମ୍ୟାଜିକ୍ୱିନ୍ ବେଟିଂ ଆପ୍ ମାମଲାରେ ଇଡି ପ୍ରଥମ ଥର ପାଇଁ ପାକିସ୍ତାନୀ ଲିଙ୍କ ଆବିଷ୍କାର କରିଛି। ସୂତ୍ରରୁ ପ୍ରକାଶ ଯେ ଦୁବାଇ ଦେଇ ଭାରତରୁ ପାକିସ୍ତାନକୁ ଟଙ୍କା ପଠାଯାଇଥିଲା। ଉଭୟ ବଡ଼ ଏବଂ ଛୋଟ ପରଦାରୁ ଅଭିନେତା ଏବଂ ସେଲିବ୍ରିଟିମାନେ ସୋସିଆଲ ମିଡିଆରେ ମ୍ୟାଜିକୱିନକୁ ପ୍ରୋତ୍ସାହିତ କରିଥିଲେ।
ଇଡି ଅଭିନେତା ମଲ୍ଲିକା ଶେରାୱତ ଏବଂ ପୂଜା ବାନାର୍ଜୀଙ୍କୁ ପ୍ରଶ୍ନ କରିସାରିଛି। ଏହି ସପ୍ତାହ ଶେଷରେ ଅନ୍ୟ ଦୁଇଜଣ ସେଲିବ୍ରିଟିଙ୍କୁ ଇଡି ଡକାଇଥିବା ବେଳେ ଆସନ୍ତା ସପ୍ତାହରେ ଅତି କମରେ ସାତଜଣ ସେଲିବ୍ରିଟିଙ୍କୁ ଡକାଯିବ।
ତଦନ୍ତ ବେଳେ ଇଡି ଅଧିକାରୀମାନେ ଜାଣିବାକୁ ପାଇଛନ୍ତି ଯେ ମ୍ୟାଜିକୱିନ୍ ହେଉଛି ଏକ ବେଟିଂ ୱେବସାଇଟ୍ ଯାହା ଏକ ଗେମ୍ ୱେବସାଇଟ୍ ଭାବରେ ଦର୍ଶାଯାଇଛି। ଏହା ଦୁବାଇରେ ରହୁଥିବା ଭାରତୀୟ ନାଗରିକଙ୍କ ଦ୍ୱାରା ପରିଚାଳିତ ହେଉଛି।
ଗତ ୬ ମାସ ମଧ୍ୟରେ ଇଡି ଏହି ମାମଲାରେ ୬୭ ଟି ସ୍ଥାନରେ ଚଢ଼ାଉ କରିଛି। ଗତ ସପ୍ତାହରେ ଦିଲ୍ଲୀ, ମୁମ୍ବାଇ ଏବଂ ପୁଣେରେ ମ୍ୟାଜିକୱିନ୍ ମାମଲା ସହ ଜଡିତ ଥିବା ୨୧ ଟି ସ୍ଥାନ ଉପରେ ଇଡି ଚଢ଼ାଉ କରି ପ୍ରାୟ ୩.୫୫ କୋଟି ଟଙ୍କା ଜବତ କରିଥିଲା।
