ନାଗପୁର,୫।୧୦ : ପ୍ରଥମ ଥର ପାଇଁ ଜଣେ ମହିଳା ମୁଖ୍ୟ ଅତିଥି ଆରଏସଏସର ଦଶହରା ଶସ୍ତ୍ର ପୂଜନ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ଏଥର ପଦ୍ମଶ୍ରୀ ସାନ୍ତୋଷ ଯାଦବ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଉପସ୍ଥିତ ଥିଲେ। ସେ ହେଉଛନ୍ତି ଏକମାତ୍ର ମହିଳା ଯିଏକି ମାଉଣ୍ଟ ଏଭରେଷ୍ଟକୁ ଦୁଇଥର ଆରୋହଣ କରିଛନ୍ତି। ଏହି ଅବସରରେ ଆରଏସଏସ ମୁଖ୍ୟ ମୋହନ ଭାଗଓ୍ବତ କହିଛନ୍ତି ଯେ ଶୁଭ କାର୍ଯ୍ୟ ପୂର୍ବରୁ ଶକ୍ତି ଆବଶ୍ୟକ।
ମୋହନ ଭାଗଓ୍ବତ କହିଛନ୍ତି ଯେ ସଂଗଠନର କାର୍ଯ୍ୟକ୍ରମରେ ଅତିଥି ଭାବରେ ସମାଜର ମହିଳାମାନଙ୍କ ଉପସ୍ଥିତି ପରମ୍ପରା ପୁରୁଣା। ବ୍ୟକ୍ତିତ୍ୱ ନିର୍ମାଣର ଶାଖା ବ୍ୟବସ୍ଥା ପୁରୁଷ ଏବଂ ମହିଳା, ସଂଘ ଓ କମିଟି ପାଇଁ ପୃଥକ ଭାବରେ ଚାଲିଥାଏ। ଅନ୍ୟ ସମସ୍ତ କାର୍ଯ୍ୟରେ, ପୁରୁଷ ଏବଂ ମହିଳାମାନେ ଏକତ୍ର କାର୍ଯ୍ୟ କରିଥାନ୍ତି। ସଂଗଠନର ମୁଖ୍ୟ କହିଛନ୍ତି ଯେ ୨୦୧୭ରେ ବିଭିନ୍ନ ସଂଗଠନରେ କାର୍ଯ୍ୟ କରୁଥିବା ମହିଳା କାର୍ଯ୍ୟକର୍ତ୍ତାମାନେ ଭାରତର ମହିଳାମାନଙ୍କ ଉପରେ ଏକ ବ୍ୟାପକ ସର୍ଭେ କରିଥିଲେ, ଏହି ସର୍ଭେରୁ ଜଣାପଡିଛି ଯେ ମାତୃ ଶକ୍ତିର ସଚେତନତା, ସଶକ୍ତିକରଣ ଏବଂ ସମାନ ସହଭାଗିତା ଜରୁରୀ।
ନାଗପୁର ମୁଖ୍ୟାଳୟରେ ଆୟୋଜିତ ଏହି କାର୍ଯ୍ୟକ୍ରମରେ କେନ୍ଦ୍ର ମନ୍ତ୍ରୀ ନୀତିନ ଗଡକରୀ ଏବଂ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ମଧ୍ୟ ଉପସ୍ଥିତ ଥିଲେ।
