ବମ୍ବେ: ସ୍କୁଲରେ ପଢ଼ୁଥିବା ବେଳେ ପ୍ରେମରେ ପଡ଼ିଥିଲେ। ପ୍ରେମିକଙ୍କୁ ଜୀବନସାଥୀ କରିବାକୁ ମନସ୍ଥ କରିଥିଲେ। ହେଲେ ପରିବାରଲୋକ ସମ୍ପର୍କକୁ ଗ୍ରହଣ କରିବାକୁ ପ୍ରସ୍ତୁତ ନ ଥିଲା। ଦୀର୍ଘ ଦେଢ଼ ବର୍ଷ ଧରି ପ୍ରେମିକଙ୍କଠାରୁ ଅଲଗା କରି ରଖିଥିଲେ। ଦେଖିବା ତ ଦୂରର କଥା ପଦିଏ କଥା ହେବା ସ୍ବପ୍ନ ଥିଲା। ଏତେ ସବୁ ଝଡ଼ଝଞ୍ଜା ସତ୍ତ୍ୱେ ଘରୁ ପଳାଇଯାଇ ପ୍ରେମିକଙ୍କ ହାତ ଧରିଥିଲେ। ଆମେ କହୁଛି ‘ମେନେ ପ୍ୟାର କିୟା’ର ଲୋକପ୍ରିୟ ଅଭିନେତ୍ରୀ ଭାଗ୍ୟଶ୍ରୀଙ୍କ କଥା।
ଫେବୃୟାରୀ ୨୩ ଅର୍ଥାତ ଆଜି ଭାଗ୍ୟଶ୍ରୀ ନିଜର ୫୩ ଜନ୍ମଦିନ ପାଳନ କରୁଛନ୍ତି। ଅନେକ ଦିନ ଧରି ବଡ଼ ପରଦାରୁ ଦୂରରେ ରହିଥିଲେ ହେଁ ପ୍ରଶଂସକଙ୍କ ମନରେ ସେ ଏବେ ବି ପୂର୍ବବତ ରହିଛନ୍ତି। ଦୁଇ ସନ୍ତାନର ଜନନୀ ପାଲଟିଛନ୍ତି ସେ। ପୁଅ ଅଭିମନ୍ୟୁ ଅଭିନେତା ପାଲଟିଥିବା ବେଳେ ଝିଅ ଅବନ୍ତିକା ଜି୫ର ଏକ ଓ୍ବେବ୍ ସିରିଜ୍ରୁ ଡେବ୍ୟୁ କରିବାକୁ ଯାଉଛନ୍ତି।
ବ୍ୟକ୍ତିଗତ ଜୀବନ ଦେଖିଲେ ଭାଗ୍ୟଶ୍ରୀ ହିମାଳୟ ଦସାନୀଙ୍କ ହାତ ଧରିଛନ୍ତି। ସ୍କୁଲ ବେଳୁ ସେ ତାଙ୍କୁ ପସନ୍ଦ କରୁଥିଲେ। କିଛି ସମୟ ପରେ ହିମାଳୟ ଆମେରିକା ଚାଲିଯାଇଥିଲେ। ଅପରପକ୍ଷେ ଭାଗ୍ୟଶ୍ରୀ ଫିଲ୍ମରେ କାମ କରିବା ଆରମ୍ଭ କରିଥିଲେ। ୧୯୮୯ରେ ଫିଲ୍ମ ‘ମେନେ ପ୍ୟାର କିୟା’ ପରେ ସେ ହିମାଳୟଙ୍କୁ ବିବାହ କରିବାକୁ ନିଷ୍ପତ୍ତି ନେଇଥିଲେ। ମାତ୍ର ଏହା ସେତେଟା ସହଜ ନ ଥିଲା। ଘର ଲୋକ ତାଙ୍କୁ ଭେଟିବାକୁ ଦେଉ ନ ଥିଲେ। ଦିନେ ରାଗିଯାଇ ଭାଗ୍ୟଶ୍ରୀ ହିମାଳୟଙ୍କୁ ବିବାହ କରିବାକୁ ଘର ଛାଡ଼ି ଦେଇଥିଲେ। ମନ୍ଦିରରେ ବିବାହ କରିଥିଲେ ଉଭୟ। ସେଥିରେ ସଲମାନ ଖାନ,ସୁରଜ ବଡଜାତ୍ୟା ଏବଂ ହିମାଳୟଙ୍କ ପରିବାରଲୋକେ ସାମିଲ ଥିଲେ।
