ଭାଇଜାନ୍ ଙ୍କ ପରବର୍ତ୍ତୀ ଚଳଚ୍ଚିତ୍ର ‘ରାଧେ ଇୟୋର ମୋଷ୍ଟ ୱାଣ୍ଟେଡ ଭାଇ’ର ଶୁଟିଂ କାର୍ଯ୍ୟ ଅକ୍ଟୋବର ୨ ରୁ ଆରମ୍ଭ ହେବାକୁ ଯାଉଛି। ଏହି ଚଳଚ୍ଚିତ୍ରର ଅବଶିଷ୍ଟ ଶୁଟିଂ ପାଇଁ ସଲମାନ ମୁମ୍ବାଇରୁ ବାହାରକୁ ଯିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ତାଙ୍କ ଟିମ୍ ପ୍ରସ୍ତୁତି ଆରମ୍ଭ କରିଛନ୍ତି।
ଏହାର ଶୁଟିଂ ମାର୍ଚ୍ଚ ମାସରେ ଶେଷ ହୋଇଥାନ୍ତା। ମାତ୍ର ଲକ୍ଡାଉନ୍ ନେଇ ନିର୍ମାତାଙ୍କ ସମସ୍ତ ଯୋଜନା ବୃଥା ହୋଇଥିଲା। ସେବେଠୁ ସଲମାନ ଖାନ ପାନଭେଲରେ ଥିବା ତାଙ୍କ ଫାର୍ମ ହାଉସରେ ରହି ଚାଷ କରୁଥିଲେ। ପ୍ରାୟ ୬ରୁ ୭ ମାସ ବିଶ୍ରାମ ନେବା ପରେ ସଲମାନ ତାଙ୍କ ଫିଲ୍ମର ଶୁଟିଂ ଆରମ୍ଭ କରିବାକୁ ପ୍ରସ୍ତୁତ ଅଛନ୍ତି। ତେବେ ଲୋକପ୍ରିୟ ରିଆଲିଟି ସୋ ‘ବିଗ ବସ’ର ସିଜନ ୧୪ ପାଇଁ ସେ ଶୁଟିଂ ଆରମ୍ଭ କରିସାରିଛନ୍ତି।
ଅକ୍ଟୋବର ୧ ରୁ ସଲମାନ ‘ବିଗବସ’ ପାଇଁ ସୁଟିଂ ଆରମ୍ଭ କରିବେ। ଏହି ଦିନ ତାଙ୍କୁ ‘ବିଗ ବସ’ର ପ୍ରିମିୟର ପାଇଁ ଶୁଟିଂ କରିବାକୁ ପଡିବ। ଏହାକୁ ଶେଷ କରିବା ପରେ ସେ ପରଦିନ ତାଙ୍କ ଫିଲ୍ମର ଶୁଟିଂ ଆରମ୍ଭ କରିବେ। ଏହି ଚଳଚ୍ଚିତ୍ରର ନିର୍ମାତା ସୋହେଲ ଖାନ ଶୁଟିଂ ପାଇଁ ସରକାର ଦେଇଥିବା ନିର୍ଦ୍ଦେଶାବଳୀକୁ ଦୃଷ୍ଟିରେ ରଖି ସମସ୍ତ ସ୍ବାସ୍ଥ୍ୟ ସୁରକ୍ଷା ବ୍ୟବସ୍ଥାକୁ ଧ୍ୟାନରେ ରଖିଛନ୍ତି। ଶୁଟିଂର ଅଂଶବିଶେଷ ଥିବା ସମସ୍ତ ଲୋକଙ୍କୁ ଥରେ କରୋନା ପରୀକ୍ଷା କରାଯାଇଛି। ଶୁଟିଂ ଆରମ୍ଭ ହେବା ପୂର୍ବରୁ ଆଉଥରେ ପରୀକ୍ଷା ହେବାର ଯୋଜନା ରହିଛି। ଯେଉଁମାନଙ୍କ ରିପୋର୍ଟ ନେଗେଟିଭ୍ ଆସିବ ସେମାନେ ଶୁଟିଂ କରିବେ।
