ଡେରାବିଶ, ୨୭ା୧୧ ( ବେବର୍ତ୍ତା ଅଜୟ ଦାସ):କେନ୍ଦ୍ରାପଡ଼ା ଜିଲା ଡେରାବିଶ ଥାନା ଅନ୍ତର୍ଗତ ଲକ୍ଷ୍ମୀନାରାୟଣପୁର ପଞ୍ଚାୟତର ମିଶନ ଶକ୍ତି ଏମ୍ବିକେ କାର୍ଯ୍ୟ କରୁଥିବା ହିମାଂଶୁ ପାତ୍ରଙ୍କ ସ୍ତ୍ରୀ ଦମୟନ୍ତୀ ରାଉତ ୧୮ ତାରିଖ ମଧ୍ୟାହ୍ନରେ କାର୍ଯ୍ୟାଳୟରୁ ଘରକୁ ଏକୁଟିଆ ଫେରୁଥିଲେ। ଜଣେ ବାବାଜି ତାଙ୍କୁ ଅଟକାଇ ତୋ ସ୍ବାମୀ ଅଳ୍ପଦିନରେ ମୃତ୍ୟୁବରଣ କରିବ ବୋଲି କହି ଭୟଭୀତ କରାଇ ଗ୍ରହରିଷ୍ଟ ଖଣ୍ଡନ ପାଇଁ ପୂଜାର୍ଚ୍ଚନା ବାହାନା କରିଥିଲେ। ଏଥିସହ ଦମୟନ୍ତୀଙ୍କ ମୁଣ୍ଡରେ ସିନ୍ଦୂର ଲଗାଇ ଗ୍ରହରିଷ୍ଟ ଖଣ୍ଡନ ପାଇଁ କହି ଅଚେତ କରାଇ ଦେଇଥିଲେ। ଚେତା ଫେରିବା ପରେ ସେ ହାତରେ ପିନ୍ଧିଥିବା ସୁନା ମୁଦି ନ ଥିବା ସହ ବାବା ମଧ୍ୟ ସେଠାରୁ ପଳାଇ ଯାଇଥିଲେ। ଏ ସମ୍ପର୍କରେ ସେ ଯାଇ ଘରେ କହିବା ପରେ ଏହା ଅଞ୍ଚଳରେ ପ୍ରଚାରିତ ହୋଇଥିଲା। ମଙ୍ଗଳବାର ନିକଟସ୍ଥ ବଳଭଦ୍ରପୁର ଗଁାକୁ ଉକ୍ତ ଭଣ୍ଡ ବାବା ଆସି ମହିଳାମାନଙ୍କୁ ସମାନ କଥା କହି ଭୟଭୀତ କରାଇବା ସହ ଠାକୁରଙ୍କ ନାମରେ ସୁନା ଅଳଙ୍କାର ଦାନ କରିବାକୁ କହିଥିଲେ। ତେବେ ପୂର୍ବରୁ ଦମୟନ୍ତୀଙ୍କ ସହ ଘଟିଥିବା ଘଟଣା ସମ୍ପର୍କରେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଥିବା ବେଳେ ବାବାଜିଙ୍କ ପୁନଃ ଆଗମନ ଉପସ୍ଥିତ ମହିଳାମାନଙ୍କ ମଧ୍ୟରେ ସନ୍ଦେହ ଜାତ କରିଥିଲା। କେତେଜଣ ଉକ୍ତ ବାବାଙ୍କ ଫଟୋ ଉଠାଇ ଦମୟନ୍ତୀଙ୍କ ପାଖକୁ ପଠାଇବାରୁ ସେ ସେହି ଭଣ୍ଡ ବାବାଙ୍କୁ ଚିହ୍ନି ଅଟକାଇବା ପାଇଁ କହିଥିଲେ। ତେବେ ଗ୍ରାମବାସୀ ବାବାଙ୍କୁ କାବୁ କରି ପୋଲିସ ଜିମା ଦେଇଥିଲେ। ଏ ନେଇ ଦମୟନ୍ତୀଙ୍କ ପକ୍ଷରୁ ପୁଣି ମଙ୍ଗଳବାର ଥାନରେ ଏକ ଲିଖିତ ଅଭିଯୋଗ କରାଯାଇଥିଲା। ଅଭିଯୋଗକୁ ଭିତ୍ତିକରି ପୋଲିସ ନଂ. ୧୬୨/୨୪ରେ ମାମଲା ରୁଜୁ କରିବା ସହ ଭଣ୍ଡବାବାଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି। ଭଣ୍ଡାବାବାଙ୍କ ଘର ଜଗତ୍ସିଂହପୁର ଜିଲା ଏରସମା ଥାନା ଅଞ୍ଚଳର ବିକ୍ରମ ସ୍ବାଇଁ(୫୫) ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏଥିସହ ଭଣ୍ଡବାବା ବ୍ୟବହାର କରୁଥିବା ବାଇକ୍(ନଂ. ଓଡି ୨୧କେ ୬୧୪୨)କୁ ପୋଲିସ ଜବତ କରିଛି।
