ନୂଆଦିଲ୍ଲୀ,୯।୭: ସମ୍ବିଧାନ ପ୍ରଣେତା ଡଃ ବି. ଆର୍. ଅମ୍ବେଦକରଙ୍କ ମହାରାଷ୍ଟ୍ରର ଦାଦରସ୍ଥିତ ବାସଭବନ ‘ରାଜ୍ଗୃହ’ରେ କେତେକ ଦୁର୍ବୃତ୍ତ ମଙ୍ଗଳବାର ସନ୍ଧ୍ୟାରେ ପଶି ଭଙ୍ଗାରୁଜା କରିଛନ୍ତି। ସେଠାରେ ଥିବା କେତେକ ଫୁଲକୁଣ୍ଡ ଫିଙ୍ଗିଦେବା ସହ ସିସିଟିଭି କ୍ୟାମେରାକୁ ଭାଙ୍ଗିଦେଇଛନ୍ତି। ଏନେଇ ଗୃହମନ୍ତ୍ରୀ ଅନିଲ ଦେଶ୍ମୁଖ୍ ଏହାର ତଦନ୍ତ ନିର୍ଦ୍ଦେଶ ଦେଇଛନ୍ତି। ପୋଲିସ ଘଟଣାସ୍ଥଳରେ ଛାନ୍ଭିନ୍ ସହ ଅଭିଯୁକ୍ତଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି କହିଛି। ମିଳିଥିବା ତଥ୍ୟ ଅନୁଯାୟୀ ଅଭିଯୁକ୍ତମାନେ ସନ୍ଧ୍ୟା ୬ରେ ୩ ମହଲା ବିଲ୍ଡିଂକୁ ଯାଇଥିଲେ। ପରିସରରେ କେତେକ ଭଙ୍ଗାରୁଜା କରିଥିଲେ ହେଁ କେୟାର ଟେକର ପୋଲିସରେ ଅଭିଯୋଗ କରି ନ ଥିଲେ। କରୋନା ଲାଗି ଏହି ମ୍ୟୁଜିୟମ୍ଟି ବନ୍ଦ ରହିଥିଲା। ଏଭଳି ଭଙ୍ଗାରୁଜା ଘଟଣା ସାମ୍ନାକୁ ଆସିବା ପରେ ଆମ୍ବେଦକରଙ୍କ ପରିବାରବର୍ଗ ଶାନ୍ତିରକ୍ଷା ଲାଗି ଅନୁରୋଧ କରିଛନ୍ତି। ବଞ୍ଚିତ ବହୁଜନ ଅଘାଡ଼ି(ଭିବିଏ) ନେତା ତଥା ଡଃ ଆମ୍ବେଦକରଙ୍କ ନାତି ପ୍ରକାଶ ଆlମ୍ବେଦକର ସୋସିଆଲ ମିଡିଆ ମାଧ୍ୟମରେ ଶାନ୍ତି ଲାଗି ଅପିଲ କରିଛନ୍ତି।
