ଭଞ୍ଜନଗର, ୨୪।୧(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଜଳଭଣ୍ଡାର ଧୀରେ ଧୀରେ ଶୁଷ୍କ ହେବାରେ ଲାଗିଛି। ମଙ୍ଗଳବାର ସୁଧା ଜଳଭଣ୍ଡାରରେ ମାତ୍ର ୨୫ ପ୍ରତିଶତ ପାଣି ଅଛି। ଗତ ସେପ୍ଟେମ୍ବର ୧୫ରୁ ଭଞ୍ଜନଗର ଅଞ୍ଚଳରେ ଆଶାନୁରୂପକ ବର୍ଷା ହୋଇନାହିଁ। ତେଣୁ ଜଳଭଣ୍ଡାରର ଜଳସ୍ତର କମିବାରେ ଲାଗିଛି। ବର୍ଷା ନ ଥିବା ଯୋଗୁ ସହରତଳି ଲଣ୍ଡେଇସାହିର କୂଅଗୁଡିକର ଜଳସ୍ତର ବହୁତ ତଳକୁ ଚାଲିଯାଇଛି। ତେଣୁ ଆଗାମୀ ଦିନରେ ସହରକୁ ପାଣି ଯୋଗାଣ ବାଧାପ୍ରାପ୍ତ ହେବା ଆଶଙ୍କା ରହିଛି। ବର୍ଷା ନ ହେଲେ ରବି ଋତୁରେ ଜଳଭଣ୍ଡାରରୁ ଚାଷୀଙ୍କୁ ପାଣି ଯୋଗାଣ ସମ୍ଭବପର ହୋଇପାରିବ ନାହିଁ। ଭଞ୍ଜନଗର ଜଳଭଣ୍ଡାରରୁ ସହରକୁ ଦୈନନ୍ଦିନ ୩୫ ଲକ୍ଷ ଲିଟର ପାଣି ଯୋଗାଣ ହେଉଛି। ଅପରପକ୍ଷେ ବର୍ଷା ଅଭାବ ଯୋଗୁ ଚଳିତ ବର୍ଷ ଜଙ୍ଗଲ ପୋଡି ମଧ୍ୟ ବଢିବା ଆଶଙ୍କା ରହିଛି। ତେଣୁ ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ଏବଂ ଦକ୍ଷିଣ ଘୁମୁସର ବନଖଣ୍ଡ ପକ୍ଷରୁ ବର୍ତ୍ତମାନଠାରୁ ଜଙ୍ଗଲ ନିଆଁ ପୋଡ଼ିକୁ କିଭଳି ରୋକାଯିବ ସେନେଇ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି। ଗ୍ରାମାଞ୍ଚଳରେ ବନ ସୁରକ୍ଷା ସମିତି ମାଧ୍ୟମରେ ଲୋକଙ୍କୁ ଜଙ୍ଗଲ ନିଆଁକୁ କିଭଳି ରୋକାଯିବ ସେନେଇ ସଚେତନତା କରାଯାଉଛି। ଏନେଇ ଭଞ୍ଜନଗର ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ନିତ୍ୟାନନ୍ଦ ବେହେରାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ବର୍ଷା ନ ହେଲେ ପାନୀୟଜଳ ସମସ୍ୟା ହୋଇପାରେ। ଆଗାମୀ ପରିସ୍ଥିତିକୁ ଦେଖି ପଦକ୍ଷେପ ନିଆଯିବ। ଏନେଇ ଉତ୍ତର ଘୁମୁସର ବନଖଣ୍ଡ ଅଧିକାରୀ ସୁଦର୍ଶନ ବେହେରା
କହିଛନ୍ତି ଯେ, ଆଗକୁ ବର୍ଷା ନ ହେଲେ ଚଳିତ ବର୍ଷ ଜଙ୍ଗଲ ନିଆଁ ରୋକିବା ବିଭାଗ ପାଇଁ ଏକ ଚ୍ୟାଲେଞ୍ଜ ହେବ। ତଥାପି ବର୍ତ୍ତମାନଠାରୁ ବିଭିନ୍ନ
ପଦକ୍ଷେପ ନିଆଯାଉଛି।