ଜୟପୁର/ଲକ୍ଷ୍ମୀପୁର,୨୮ା୧ (ନି.ପ୍ର./ସ୍ବ.ପ୍ର.): ଜୟପୁର ନିର୍ବାଚନ ମଣ୍ଡଳୀରେ ଶୁକ୍ରବାର କଂଗ୍ରେସ ଭାରତ ଜୋଡ ପଦଯାତ୍ରା କାର୍ଯ୍ୟକ୍ରମ କରି ନିଜର ଶକ୍ତି ପ୍ରଦର୍ଶନ କରିଛି। ବୋରିଗୁମ୍ମା, ଲକ୍ଷ୍ମୀପୁର ଏବଂ ଜୟପୁରଠାରେ ବହୁ ସଂଖ୍ୟାରେ କଂଗ୍ରେସ କର୍ମୀମାନେ ପଦଯାତ୍ରା ସାମିଲ ହୋଇଥିବା ଦେଖିବାକୁ ମିଳିଥିଲା। ଜିଲା ସଭାନେତ୍ରୀ ମିନାକ୍ଷୀ ବାହିନୀପତିଙ୍କ ନେତୃତ୍ୱରେ ହୋଇଥିବା ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପିସିସି ସଭାପତି ଶରତ ପଟ୍ଟନାୟକ ,କୋରାପୁଟ ଏମ୍ପି ସପ୍ତଗିରି ଉଲାକା, ଜୟପୁର ବିଧାୟକ ତାରା ପ୍ରସାଦ ବାହିନୀପତି ଯୋଗ ଦେଇ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି। ପ୍ରଥମେ ବୋରିଗୁମ୍ମାର ମିଲ ସାହି ଠାରୁ ଏକ ଶୋଭାଯାତ୍ରା ବାହାରି ଥାନା ଛକ ପର୍ଯ୍ୟନ୍ତ ଯାଇଥିଲା। ସେଠାରେ ଏକ ସଭା ହୋଇଥିଲା। ଜୟପୁର ସହରର ଖୀଷ୍ଟିୟାନ ପେଟାଠାରୁ ଏକ ଶୋଭାଯାତ୍ରା ବାହାରି ସହରର ମୁଖ୍ୟ ରାସ୍ତା ଦେଇ ରାଜା ନହରଠାରେ ପହଞ୍ଚତ୍ଥିଲା। ଏଠାରେ ମଧ୍ୟ ଏକ ସଭାରେ ଅତିଥିମାନେ ଉଦବୋଧନ ଦେଇ ରାଜ୍ୟ ଓ କେନ୍ଦ୍ର ସରକାରଙ୍କ ସମାଲୋଚନା କରିଥିଲେ। ରାଜ୍ୟରେ ଦୀର୍ଘ ୨୨ବର୍ଷର ବିଜେଡି ଶାସନରେ ଦୁର୍ନୀତି, ଭ୍ରଷ୍ଟାଚାର ବଢିଛି। ଆଇନ ଶୃଙ୍ଖଳା ବିପର୍ଯ୍ୟସ୍ତ ହେବା ସହ ରାଜ୍ୟରେ ଶିକ୍ଷା ଓ ସ୍ବାାସ୍ଥ୍ୟସେବାରେ ଅନେକ ସମସ୍ୟା ରହିଛି ବୋଲି ଅତିଥିମାନେ ଆରୋପ ଲଗାଇଥିଲେ। ୨୦୨୪ରେ ଲୋକେ କଂଗ୍ରେସକୁ ଭରସା କରୁଛନ୍ତି। କଂଗ୍ରେସ ମଧ୍ୟ ୯ରୁ୯୦ ଆସନ ହାସଲ ପାଇଁ ଭାରତ ଜୋଡ ପଦଯାତ୍ରା କରୁଛି ବୋଲି ପିସିସି ସଭାପତି ପଟ୍ଟନାୟକ କହିଛନ୍ତି। ଅନ୍ୟ ମାନଙ୍କ ମଧ୍ୟରେ ପୌର ଅଧ୍ୟକ୍ଷ ନରେନ୍ଦ୍ର ମହାନ୍ତି, ପୂର୍ବତନ ବିଧାୟକ ରାମ କଡାମ, ବରିଷ୍ଠ କଂଗ୍ରେସ ନେତା ବିନୋଦ ମହାପାତ୍ରଙ୍କ ସହ ଅନ୍ୟମାନେ ସାମିଲ ହୋଇଥିଲେ।
ସେହିପରି ଲକ୍ଷ୍ମୀପୁର ବ୍ଲକର ଲକ୍ଷ୍ମୀପୁରଠାରେ କଂଗ୍ରେସ ପକ୍ଷରୁ ଭାରତ ଯୋଡ଼ ପଦ୍ଯାତ୍ରା ଅନୁଷ୍ଠିତ ହୋଇଛି। ଜିଲା କଂଗ୍ରେସ ସଭାନେତ୍ରୀ ମିନାକ୍ଷୀ ବାହିନୀପତିଙ୍କ ନେତୃତ୍ୱରେ ଲକ୍ଷ୍ମୀପୁର କଲେଜଠାରୁ ପଦଯାତ୍ରା ବାହାରି ବସ ଷ୍ଟାଣ୍ଡଠାରେ ପହଞ୍ଚତ୍ଥିଲା। ସେଠାରେ ଅନୁଷ୍ଠିତ ସଭାରେ ବେକାରୀ ସମସ୍ୟା,ଦରବୃଦ୍ଧି, ଉପରେ ଅତିଥିମାନେ ସରକାରଙ୍କୁ ସମାଲୋଚନା କରିଥିଲେ। ଲକ୍ଷ୍ମୀପୁର ନିର୍ବାଚନ ମଣ୍ଡଳୀର ୪ଟି ବ୍ଲକ ଲକ୍ଷ୍ମୀପୁର, ଦଶମନ୍ତପୁର, ନାରାୟଣପାଟଣା, ବନ୍ଧୁଗାଁ ବ୍ଲକର କଂଗ୍ରେସ କର୍ମୀ ଯୋଗ ଦେଇଥିଲେ। ଏଥିରେ ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟନାୟକ, କୋରାପୁଟ ଏମ୍ପି ସପ୍ତଗିରି ଉଲ୍ଲକା, ଜୟପୁର ବିଧାୟକ ତାରା ପ୍ରସାଦ ବାହିନୀପତି, ଜିଲା ଏବଂ ଉପରୋକ୍ତ ୪ଟି ବ୍ଲକର ସଭାପତି, ଜିଲା ପରିଷଦ ସଭ୍ୟ, ପଞ୍ଚାୟତ ସଭାପତିଙ୍କ ସମେତ ବହୁ କର୍ମୀ ସାମିଲ ହୋଇଥିଲେ।
