ନୂଆଦିଲ୍ଲୀ,୨୮।୧୨ : ଦେଶର ସର୍ବ ପୁରାତନ ପାର୍ଟି କଂଗ୍ରେସ ବୁଧବାର ଏହାର ୧୩୮ ତମ ପ୍ରତିଷ୍ଠା ଦିବସ ପାଳନ କରୁଛି। ଦିଲ୍ଲୀର ଅଲ ଇଣ୍ଡିଆ କଂଗ୍ରେସର ମୁଖ୍ୟାଳୟ ଆକର୍ଷଣୀୟ ଭାବରେ ସଜାଯାଇଛି। କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଏଆଇସିସି ମୁଖ୍ୟାଳୟରେ ପହଞ୍ଚି ପତାକା ଉତ୍ତୋଳନ କରିଥିଲେ। ଏହି ଅବସରରେ କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ, କଂଗ୍ରେସ ଏମ୍ପି ରାହୁଲ ଗାନ୍ଧୀ ଏବଂ ବହୁ ବରିଷ୍ଠ କଂଗ୍ରେସ ନେତା ଉପସ୍ଥିତ ଥିଲେ। ଖାର୍ଗେ କହିଛନ୍ତି ଯେ କଂଗ୍ରେସ ଦଳକୁ ଏକଜୁଟ କରିବା ପାଇଁ ଆମକୁ ଯୁବକ, ମହିଳା, ବଞ୍ଚିତ ବର୍ଗ ଏବଂ ବୁଦ୍ଧିଜୀବୀଙ୍କୁ ଆମ ସହ ଜଡିତ କରିବାକୁ ପଡିବ। ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରା ସାରା ଦେଶରେ କୋଟି କୋଟି କଂଗ୍ରେସକର୍ମୀଙ୍କୁ ସଞ୍ଜିବନୀ ଦେଇଛି।
ଖାର୍ଗେ କହିଛନ୍ତି ଯେ ଆଜି ଭାରତ ଅଗ୍ରଗତି କରିଛି କାରଣ କଂଗ୍ରେସ ଦଳିତ ଏବଂ ଗରିବଙ୍କ ଶିକୁଳି ଭାଙ୍ଗିବାକୁ ସାହସ କରିଛି। ଗଣତନ୍ତ୍ରକୁ ଦୃଢ଼ କରିବା ପାଇଁ ପଣ୍ଡିତ ଜବାହରଲାଲ ନେହେରୁ ତାଙ୍କ କ୍ୟାବିନେଟରେ ୫ ଜଣ ଅଣ କଂଗ୍ରେସ ମନ୍ତ୍ରୀ ନିଯୁକ୍ତ କରିଥିଲେ। ଏହା ସମସ୍ତଙ୍କୁ ସାଙ୍ଗରେ ନେବା ନୀତିକୁ ପ୍ରତିଫଳିତ କରିଥାଏ।
ଭାରତର ମୌଳିକ ନୀତି ଏବଂ ସିଦ୍ଧାନ୍ତଗୁଡିକ ଉପରେ କ୍ରମାଗତ ଆକ୍ରମଣ ହେଉଛି। ଘୃଣାର ଭାବନା ଏବେ ସାରା ଦେଶରେ ପ୍ରସାର କରାଯାଉଛି। ମୁଦ୍ରାସ୍ଫୀତି, ବେକାରୀ କାରଣରୁ ଜନସାଧାରଣ ଅସୁବିଧାରେ ପଡ଼ିଛନ୍ତି କିନ୍ତୁ ସରକାର ଏଥିପ୍ରତି ଦୃଷ୍ଟି ଦେଉ ନାହାଁନ୍ତି।