ଭୁବନେଶ୍ୱର,୧୬।୧୨(ଶର୍ମିଷ୍ଠା ପାଣିଗ୍ରାହୀ): କଳିଙ୍ଗାୟନ ତୌର୍ଯ୍ୟତ୍ରିକମ୍ ଅନୁଷ୍ଠାନ ପକ୍ଷରୁ ଉତ୍କଳ ରଙ୍ଗମଞ୍ଚଠାରେ ଚାଲିଥିବା ଭରତ ମୁନି ମହୋତ୍ସବ ଶୁକ୍ରବାର ଉଦ୍ଯାପିତ ହୋଇଯାଇଛି। ଉଦ୍ଯାପନୀ ସାରେ କୁଚିପୁଡ଼ି ଓ ଭାରତନାଟ୍ୟମ୍ ବିଦୂଷୀ ପଦ୍ମଭୂଷଣ ସ୍ବପ୍ନା ସୁନ୍ଦରୀଙ୍କୁ ଭରତ ମୁନି ସମ୍ମାନରେ ସମ୍ମାନିତ କରାଯାଇଥିଲା। ସାରେ ଅତିଥି ଭାବେ ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକ, କୂଟନୀତିଜ୍ଞ ଜିତେନ୍ଦ୍ର ନାଥ ମିଶ୍ର, କଥାକାର ଡ. ଗୌରହରି ଦାସ ଉପସ୍ଥିତ ଥିଲେ। ସାଂସ୍କୃତିକ କାର୍ଯ୍ୟକ୍ରମର ପ୍ରଥମ ପ୍ରସ୍ତୁତିରେ କେରଳର ମୋହିନୀୟାଟ୍ଟମ ଶାସ୍ତ୍ରୀୟ ନୃତ୍ୟରେ ଗଣପତି ସ୍ତୁତି ଉପସ୍ଥାପିତ ହୋଇଥିଲା। ଏହା ପରେ ଗୌତମ ବୁଦ୍ଧଙ୍କ ପତ୍ନୀ ଯଶୋଧାରାଙ୍କ ଅଭିମାନ ଆଧାରରେ ପ୍ରସ୍ତୁତ ନୃତ୍ୟ ରଚନାକୁ ନିଖୁଣ ଭାବେ ବାଢ଼ି ଦେଇଥିଲେ ନୃତ୍ୟାଙ୍ଗନା ମାଧବୀ ଚନ୍ଦ୍ରନ। ରାଗ ସିନ୍ଧୁ ଭୈରବୀ ଆଧାରିତ କାଳୀ ଉପାସନାର ଚିତ୍ରକୁ ଉପସ୍ଥାପନା କରିଥିଲେ ଶିଳ୍ପୀ ମାଧବୀ। ମୋହିନୀୟାଟ୍ଟମର ଅନ୍ତିମ ପରିବେଷଣରେ ଶ୍ରୀଜୟଦେବ କୃତ ଗୀତଗୋବିନ୍ଦର ଅଷ୍ଟପଦୀ ମାଧବ ସ ବିରହେ ତବ ଦୀନା ମଞ୍ଚସ୍ଥ ହୋଇଥିଲା। ଦ୍ୱିତୀୟ ଚରଣରେ କଥକ ଶିଳ୍ପୀ ଡ. ଆରତୀ ସିଂ ଓ କମଳା ସଙ୍ଗୀତ ମହାବିଦ୍ୟାଳୟ, ରାୟପୁରର ନୃତ୍ୟାଙ୍ଗନା ଶାସ୍ତସ୍ତ୍ରୀୟ କଥକନୃତ୍ୟରେ ‘ଶିବ ପଞ୍ଚାକ୍ଷର’ ପରଷି ଦେଇଥିଲେ। ପରେ ଶୁଦ୍ଧନୃତ୍ୟ ଧମାର ଓ ମୋଗଲ ଶାସନ ପୃଷ୍ଠପୋଷକତାରେ ପ୍ରସ୍ତୁତ ‘ଠୁମ୍ରୀ’ର ନୃତ୍ୟାୟନ ଦର୍ଶକଙ୍କୁ ମୁଗ୍ଧ କରିଥିଲା। କଥକର ଅନ୍ତିମ ପ୍ରସ୍ତୁତିରେ ରହିଥିଲା ‘ତରାନା’। ଡ. ମୃତ୍ୟୁଞ୍ଜୟ ରଥ କାର୍ଯ୍ୟକ୍ରମ ସଞ୍ଚାଳନ କରିଥିବା ବେଳେ ପୁଷ୍ପିତା ମିଶ୍ର ଧନ୍ୟବାଦ ଜଣାଇଥିଲେ। ଟ୍ରଷ୍ଟି ଅଂଶୁମାନ ମିଶ୍ର, ମୃତ୍ୟୁଞ୍ଜୟ ଷଡ଼ଙ୍ଗୀ, ଆଦ୍ୟାଶା ମିଶ୍ର, ସମୀକ୍ଷା ବେହେରା କାର୍ଯ୍ୟକ୍ରମ ପରିଚାଳନା କରିଥିଲେ।
