ଭାରତ ରଙ୍ଗ ମହୋତ୍ସବ ଆରମ୍ଭ : ତାଜମହଲ କା ଟେଣ୍ଡର’ରେ ଦୁର୍ନୀତିର କାହାଣୀ
10 ଭୁବନେଶ୍ୱର,୯ା୨(ଶର୍ମିଷ୍ଠା ପାଣିଗ୍ରାହୀ): ସମ୍ରାଟ ଶାହାଜାହାନ ତାଙ୍କ ପତ୍ନୀଙ୍କ ସ୍ମୃତିରେ ତାଜମହଲ ନିର୍ମାଣ କରିଥିଲେ, ଯାହା ପ୍ରେମର ପ୍ରତୀକ ଭାବେ ଜଣାଶୁଣା। ମାତ୍ର ସାମ୍ପ୍ରତିକ ସ୍ଥିତିରେ ତାଜମହଲଟିଏ କରିବାକୁ ଚାହୁଁଥିବା ବ୍ୟକ୍ତିଟିଏ କିଭଳି ସମାଜର ଲୁଣ୍ଠନର ଶିକାର ହେଉଛନ୍ତି, ତାହା ନାଟକ ‘ତାଜମହଲ କା ଟେଣ୍ଡର’ରେ ପ୍ରତିଫଳିତ ହୋଇଛି। ଶାହାଜାହାନ ତାଙ୍କ ପତ୍ନୀଙ୍କ ସ୍ମୃତିରେ ତାଜମହଲ ବନାଇବାକୁ ଇଚ୍ଛା କରିଛନ୍ତି। ସେଥିପାଇଁ ସେ ମୁଖ୍ୟଯନ୍ତ୍ରୀ ଗୁପ୍ତାଜୀଙ୍କୁ ଡକାଇଛନ୍ତି। ମାତ୍ର ଗୁପ୍ତାଜୀ ସମ୍ରାଟଙ୍କ ଇଚ୍ଛା ପୂରଣ କରିବା ତ ଦୂରର କଥା କେବଳ ଟେଣ୍ଡରଟିଏ ପାସ୍ କରାଇବାକୁ ଦୀର୍ଘ ୨୫ବର୍ଷ ବିତିଯାଇଛି।
ଏହାପରେ ବି ଟେଣ୍ଡରଟିଏ ପାସ୍ ହୋଇପାରି ନାହିଁ। ସରକାରୀ ସ୍ତରରେ କାମଟିଏ କରିବାକୁ ଦୁର୍ନୀତି କିପରି ବାଟ ଓଗାଳେ, ସମୟ ପରେ ସମୟ ଗଡ଼ି ଚାଲିଥିଲେ ବି ଜଣେ କିଭଳି ଲୁଣ୍ଠନର ଶିକାର ହୋଇ ଲକ୍ଷ୍ୟ ହାସଲ କରିପାରୁନି ତାହାର ବାସ୍ତବ ଚିତ୍ର ଏହି ନାଟକରୁ ଦେଖିବାକୁ ମିଳିଥିଲା। ବର୍ତ୍ତମାନ ସମୟରେ ଘଟୁଥିବା ଘଟଣାକୁ ଶାହାଜାହାନଙ୍କ ତାଜମହଲ ସହ ଯୋଡ଼ାଯାଇଛି। ଯଦି ଏବେ କୌଣସି ବ୍ୟକ୍ତି ତାଜମହଲ କରିବାକୁ ଚାହିଁବ ତା’ହେଲେ ଖାଲି ଟେଣ୍ଡର ପାସ୍ ପାଇଁ ଦୀର୍ଘ ସମୟ ଲାଗିଯିବ।
ସଂସ୍କୃତି ମନ୍ତ୍ରଣାଳୟ, ନ୍ୟାଶନାଲ୍ ସ୍କୁଲ ଅଫ୍ ଡ୍ରାମା(ଏନଏସ୍ଡି) ଏବଂ ଓଡ଼ିଶା ସଙ୍ଗୀତ ନାଟକ ଏକାଡେମୀ ପକ୍ଷରୁ ଗୁରୁବାର ରବୀନ୍ଦ୍ର ମଣ୍ଡପରେ ଅନ୍ତର୍ଜାତୀୟ ନାଟକ ମହୋତ୍ସବ ‘ଭାରତ ରଙ୍ଗ ମହୋତ୍ସବ’ ଆରମ୍ଭ ହୋଇଛି। ପ୍ରଥମ ସନ୍ଧ୍ୟାରେ ଅଜୟ ଶୁକ୍ଳାଙ୍କ ଲିଖିତ ଓ ଚିତ୍ତରଞ୍ଜନ ତ୍ରିପାଠୀଙ୍କ ନିର୍ଦ୍ଦେଶିତ ହିନ୍ଦୀ ନାଟକ ‘ତାଜମହଲ କା ଟେଣ୍ଡର’ ଉପସ୍ଥିତ ଦର୍ଶକ ଓ ଅତିଥିଙ୍କ ମନ ଜିଣିଛି। ଏନ୍ଏସ୍ଡି ରେପେଟୋରୀ କମ୍ପାନୀ ପକ୍ଷରୁ ଏହି ନାଟକ ପରିବେଷିତ ହୋଇଥିଲା। ଅତିଥି ଭାବେ ଏନ୍ଏସ୍ଡି ଓ ନାଟକର ନିର୍ଦ୍ଦେଶକ ଚିତ୍ତରଞ୍ଜନ ତ୍ରିପାଠୀ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ଦିଲୀପ ରାଉତରାଏ, ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ଅଧ୍ୟକ୍ଷ ତଥା ଅଭିନେତା କୁନା ତ୍ରିପାଠୀ, କାଦମ୍ବିନୀର ସମ୍ପାଦିକା ଇତି ସାମନ୍ତ, କଣ୍ଠଶିଳ୍ପୀ ସୁବାସ ଦାସ, ଓଡ଼ିଶା ସଙ୍ଗୀତ ନାଟକ ଏକାଡେମୀ ସଚିବ ପ୍ରବୋଧ ରଥ ଓ ଅଭିନେତା ସମରେଶ ରାଉତରାୟ ଉପସ୍ଥିତ ଥିଲେ।
ନିର୍ଦ୍ଦେଶକ ତ୍ରିପାଠୀ କହିଛନ୍ତି, ୨୫ବର୍ଷ ତଳେ ଆରମ୍ଭ ହୋଇଥିବା ଏହି ମହୋତ୍ସବ ଯେ ଏତେ ବଡ଼ ସଫଳତା ପାଇବ ତାହା କେହି ଭାବି ନ ଥିଲେ। ନାଟକ ରହିଥିଲା, ରହିଛି ଓ ଆଗକୁ ରହିବ ମଧ୍ୟ। ଏହି ମହୋତ୍ସବକୁ ଦର୍ଶକମାନେ ହିଁ ଆହୁରି ସଫଳ କରାଇପାରିବେ। ଭାରତୀୟ ଅନୁଷ୍ଠାନଗୁଡ଼ିକରେ କିଭଳି ଲୁଣ୍ଠନ, ପକ୍ଷପାତିତା, ଦୁର୍ନୀତି, ନିଷ୍କ୍ରିୟତା, ପଛୁଆ ବର୍ଗ, ଅହଙ୍କାର ସୃଷ୍ଟି ହେଲା ତାହାର ପ୍ରତିଫଳନ ଏହି ନାଟକ ମାଧ୍ୟମରେ କରାଯାଇଛି।