ମୁମ୍ବାଇ,୩।୧୨: ଡ୍ରଗ୍ସ୍ ମାମଲାରେ ବଲିଉଡ୍ର ହାସ୍ୟ ଅଭିନେତ୍ରୀ ଭାରତୀ ସିଂ ଏବଂ ତାଙ୍କ ସ୍ବାମୀ ହର୍ଷ ଲିମ୍ବାଚିୟାଙ୍କୁ ସହଯୋଗ କରିଥିବା ଅଭିଯୋଗରେ ୨ ଜଣ ନାର୍କୋଟିକ୍ କଣ୍ଟ୍ରୋଲ ବ୍ୟୁରୋ(ଏନ୍ସିବି) ଅଫିସରଙ୍କୁ ନିଲମ୍ବିତ କରାଯାଇଛି। ଏହି ତଦନ୍ତକାରୀ ଅଫିସରମାନେ ଭାରତୀ, ହର୍ଷ ଏବଂ ଅଭିନେତ୍ରୀ ଦୀପିକା ପାଦୁକୋନ୍ଙ୍କ ମ୍ୟାନେଜର କରିସ୍ମା ପ୍ରକାଶଙ୍କୁ ସହାୟତା କରିଥିବା କୁହାଯାଉଛି। ଭାରତୀ ଏବଂ ହର୍ଷଙ୍କ ଜାମିନ ପାଇଁ ଅଭିଯୁକ୍ତ ଅଫିସରମାନେ ସହଯୋଗ କରିଥିଲେ। ଜାମିନ ଶୁଣାଣି ସମୟରେ କୋର୍ଟରେ କୌଣସି ଏନ୍ସିବି ଅଧିକାରୀ ଉପସ୍ଥିତ ନ ଥିଲେ। ଫଳରେ ଏନ୍ସିବି ପକ୍ଷରୁ ଯୁକ୍ତି ଉପସ୍ଥାପନ କରାଯାଇ ପାରି ନ ଥିଲା। ଫଳରେ ସହଜରେ ଭାରତୀ ଏବଂ ହର୍ଷଙ୍କୁ ଜାମିନ୍ ମିଳିଯାଇଥିଲା। ନାର୍କୋଟିକ୍ସ୍ ଡ୍ରଗ୍ସ୍ ଏବଂ ସାଇକୋଟ୍ରୋପିକ୍ ସବଷ୍ଟାନ୍ସ୍(ଏନ୍ଡିପିଏସ୍) ସ୍ପେଶାଲ କୋର୍ଟରେ ଭାରତୀ ଓ ହର୍ଷଙ୍କ ଜାମିନ ମଞ୍ଜୁର ନେଇ ଚ୍ୟାଲେଞ୍ଜ୍ କରାଯାଇଛି।
