ଗଞ୍ଜାମ,୨୬ା୬(ବିଦ୍ୟାଧର ସାହୁ): ଗଞ୍ଜାମ ସହର ବଡ ବଜାରଠାରେ ବହୁ ପୁରାତନ ଭାରତୀ ବିଦ୍ୟାପୀଠ ଅବସ୍ଥିତ। ଏହି ସ୍କୁଲକୁ ୬୭ ପୂରି ୬୮ବର୍ଷ ଚାଲିଛି। ବର୍ତ୍ତମାନ ଏହି ପୁରାତନ ସ୍କୁଲଟି ବିଭିନ୍ନ ସମସ୍ୟା ଦେଇ ଗତି କରୁଛି। ମିଳିଛି ସ୍ମାର୍ଟ ସ୍କୁଲ ମାନ୍ୟତା। ସରକାର ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଉନ୍ନତମାନର ଶ୍ରେଣୀଗୃହ ସାଙ୍ଗକୁ ଅତ୍ୟାଧୁନିକ ଶୌଚାଳୟ ନିର୍ମାଣ କରାଯାଇଛି। କିନ୍ତୁ ଏହି ପୁରାତନ ସ୍କୁଲରେ ଦୀର୍ଘ କୋଡିଏ ବର୍ଷରୁ ଊର୍ଦ୍ଧ୍ୱ ପ୍ରଧାନ ଶିକ୍ଷକ ନାହାନ୍ତି। ୨୦୧୩ରେ ୮ ଦିନ ପାଇଁ ଜଣେ ପ୍ରଧାନଶିକ୍ଷକ ନିଯୁକ୍ତ ହୋଇଥିଲେ। ସେ ଅବସର ନେବା ପରେ ପୁଣି ଉକ୍ତ ପଦବୀ ଆଜି ଯାଏ ଖାଲି ରହିଛି ବୋଲି ସ୍କୁଲ ବରିଷ୍ଠ କ୍ଲର୍କ ହରିହର ବାରିକ ସୂଚନା ଦେଇଛନ୍ତି। ଜଣେ ଶିକ୍ଷୟିତ୍ରୀ ଭାରପ୍ରାପ୍ତ ପ୍ରଧାନ ଶିକ୍ଷକ ଦାୟିତ୍ୱ ତୁଲାଉଛନ୍ତି। ଚଳିତ ବର୍ଷ ଏହି ଜିଲାରୁ ୧୮୦ ଜଣ ଶିକ୍ଷକ ପ୍ରଧାନଶିକ୍ଷକ ଭାବେ ପଦୋନ୍ନତି ହୋଇଥିଲେ ମଧ୍ୟ ଭାରତୀ ବିଦ୍ୟାପୀଠକୁ ମିଳିଲାନି ବୋଲି ସେ କହିଛନ୍ତି। ଛତ୍ରପୁର ଅନସଲୋ ହାଇସ୍କୁଲ ଓ ବାଳିକା ବିଦ୍ୟାଳୟରେ ପ୍ରଧାନ ଶିକ୍ଷକ ନିଯୁକ୍ତ ହେଲେ,କିନ୍ତୁ ଏଠାକୁ ମିଳିଲାନି ବୋଲି କ୍ଷୋଭ ପ୍ରକାଶ କରିଛନ୍ତି କ୍ଲର୍କ ବାରିକ। ଏଠାରେ ସ୍ଥାୟୀ ପ୍ରଧାନଶିକ୍ଷକ ନିଯୁକ୍ତି ପାଇଁ ଅଞ୍ଚଳବାସୀ ଏବଂ ବିଭିନ୍ନ ସଂଗଠନ ପକ୍ଷରୁ ଜିଲା ପ୍ରଶାସନଠାରେ ବାରମ୍ବାର ଦାବି ହୋଇ ଆସୁଥିଲେ ମଧ୍ୟ ଏଯାବତ କୌଣସି ସୁଫଳ ମିଳିନାହିଁ। ରାଜନୈତିକ ଇଚ୍ଛାଶକ୍ତିର ଅଭାବ ଥିବା ପରିଲକ୍ଷିତ ହେଉଥିବା ପୂର୍ବତନ ସରପଞ୍ଚ ଡି. ଗୋବିନ୍ଦ ରେଡ଼ି କହିଛନ୍ତି। ଏଥିସହ ମାର୍ଚ୍ଚ, ଏପ୍ରିଲ, ମେ’ ଓ ଜୁନ ଚାରି ମାସ ହେଲା ଶିକ୍ଷକମାନଙ୍କ ଦରମା ମିଳି ନ ଥିବା ଶିକ୍ଷକ ସୂର୍ଯ୍ୟନାରାୟଣ ଦାସ କହିଛନ୍ତି। ସୂଚନାଯୋଗ୍ୟ, ପୂର୍ବରୁ ଏହି ସ୍କୁଲରେ ଅଷ୍ଟମ, ନବମ ଓ ଦଶମ ଶ୍ରେଣୀରେ ପିଲା ପଢୁଥିଲେ। ବର୍ତ୍ତମାନ ଅଷ୍ଟମ ଶ୍ରେଣୀ ଏଠାରୁ ଉଠାଇ ଦିଆଯାଇଛି। ଏହି ସ୍କୁଲରେ ଜଣେ ମହିଳା ପିଅନ, ଜଣେ ରାତ୍ର ଜଗୁଆଳିଙ୍କୁ ମିଶାଇ ମୋଟ ୧୪ ଜଣ ଶିକ୍ଷୟିତ୍ରୀ/ଶିକ୍ଷକ ଅଛନ୍ତି। ସରକାର ହିନ୍ଦୀ ଭାଷାକୁ ରାଷ୍ଟ୍ରୀୟ ଭାଷାର ମାନ୍ୟତା ଦେଇଥିଲେ ମଧ୍ୟ ଦୀର୍ଘ ୨୫ ବର୍ଷରୁ ଊର୍ଦ୍ଧ୍ୱ ଏଠାରେ କେହି ହିନ୍ଦୀ ଶିକ୍ଷକ ନାହାନ୍ତି। ଜଣେ ହିନ୍ଦୀ ଶିକ୍ଷକ ମାସକୁ ଦୁଇଦିନ ଆସି ଶିକ୍ଷାଦାନ କରୁଛନ୍ତି। ଏଣୁ ଉପରୋକ୍ତ ସମସ୍ୟା ପ୍ରତି ଜିଲା ଶିକ୍ଷା ବିଭାଗ ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।