ନୂଆଦିଲ୍ଲୀ,୨୬ା୯:ବିଭିନ୍ନ ବିଭାଗ ସମ୍ପର୍କିତ ପାର୍ଲାମେଣ୍ଟର ଷ୍ଟାଣ୍ଡିଂ କମିଟି ଗୁରୁବାର ଗଠନ କରାଯାଇଛି। ଏଥିରେ ପ୍ରାୟ ସବୁ ଦଳକୁ ପ୍ରତିନିଧିତ୍ୱ ମିଳିଛି। ଭାଜପା ଏମ୍ପି ଭର୍ତ୍ତୃହରି ମହତାବଙ୍କୁ ଗୁରୁତ୍ୱପୂର୍ଣ୍ଣ ଅର୍ଥ କମିଟିର ମୁଖ୍ୟ ଭାବେ ନିଯୁକ୍ତ କରାଯାଇଥିବାବେଳେ ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ପ୍ରତିରକ୍ଷା ସମ୍ପର୍କିତ ଷ୍ଟାଣ୍ଡିଂ କମିଟି ସଦସ୍ୟ କରାଯାଇଛି। ସେହିପରି କଂଗ୍ରେସର ଶଶୀ ଥରୁର ବହିର୍ବ୍ୟପାର କମିଟିର ଅଧ୍ୟକ୍ଷତା କରିବେ ବୋଲି ରାଜ୍ୟ ସଭା ସେକ୍ରେଟାରିଏଟ୍ ପକ୍ଷରୁ ଜାରି ଏକ ବିବୃତିରେ କୁହାଯାଇଛି।
ସୂଚନାନୁସାରେ ପ୍ରତିରକ୍ଷା ସମ୍ପର୍କିତ ଷ୍ଟାଣ୍ଡିଂ କମିଟିର ଅଧ୍ୟକ୍ଷତା ପୂର୍ବତନ କେନ୍ଦ୍ରମନ୍ତ୍ରୀ ରାଧାମୋହନ ସିଂ କରିବାକୁ ଥିବାବେଳେ ଭାଜପାର ରାଧାମୋହନ ଦାସ ଅଗ୍ରଓ୍ବାଲ ସ୍ବରାଷ୍ଟ୍ର ବ୍ୟାପାର ପ୍ୟାନେଲର ମୁଖ୍ୟ ଦାୟିତ୍ୱ ତୁଲାଇବେ। ଭାଜପାର ଗୁରୁତ୍ୱପୂର୍ଣ୍ଣ ସହଯୋଗୀ ଟିଡିପି ଏବଂ ଜେଡିୟୁ ସମେତ ବିଧାନସଭା ନିର୍ବାଚନ ମୁହଁା ମହାରାଷ୍ଟ୍ରର ଶିବସେନା ଓ ଏନ୍ସିପିକୁ ଗୋଟିଏ ଲେଖାଏ ଷ୍ଟାଣ୍ଡିଂ କମିଟିରେ ଅଧ୍ୟକ୍ଷତା ସୁଯୋଗ ମିଳିଛି। ଲୋକ ସଭାରେ ଏନ୍ସିପିର ଏକମାତ୍ର ନେତା ସୁନିଲ ଟଟ୍କାରେ ପେଟ୍ରୋଲିୟମ୍ ଓ ପ୍ରାକୃତିକ ବାଷ୍ପ ପ୍ୟାନେଲରେ ଅଧ୍ୟକ୍ଷତା କରିବେ। ଶିବସେନାର ଶ୍ରୀରଙ୍ଗ ଆପ୍ପା ବର୍ଣ୍ଣେ ଶକ୍ତି କମିଟିର ମୁଖ୍ୟ ରହିବେ। ଜେଡିୟୁର ସଞ୍ଜୟ ଝାଙ୍କୁ ପରିବହନ, ପର୍ଯ୍ୟଟନ ଓ ସଂସ୍କୃତି କମିଟିର ଅଧ୍ୟକ୍ଷ ନିଯୁକ୍ତ କରାଯାଇଛି। ସେହିପରି ଟିଡିପି ଏମ୍ପି ମଗୁନ୍ତା ଶ୍ରୀନିବାସଲୁ ରେଡ୍ଡୀ ଗୃହନିର୍ମାଣ ଓ ସହରାଞ୍ଚଳ ବ୍ୟାପାର କମିଟିରେ ଅଧ୍ୟକ୍ଷତା କରିବେ। କଂଗ୍ରେସ ସଦସ୍ୟ ଚରଣଜିତ୍ ସିଂ ଚନ୍ନି ଏବଂ ସପ୍ତଗିରି ଉଲ୍ଲାକାଙ୍କୁ ଯଥାକ୍ରମେ କୃଷି, ପ୍ରାଣୀ ସମ୍ପଦ ଓ ଖାଦ୍ୟ ପ୍ରକ୍ରିୟାକରଣ ଏବଂ ଗ୍ରାମାଞ୍ଚଳ ବିକାଶ ଓ ପଞ୍ଚାୟତିରାଜ ସମ୍ପର୍କିତ ପାର୍ଲାମେଣ୍ଟାରି ଷ୍ଟାଣ୍ଡିଂ କମିଟିର ଅଧ୍ୟକ୍ଷ କରାଯାଇଛି। ଡିଏମ୍କେର ତିରୁଚି ଶିବା ଶିଳ୍ପ ଏବଂ କେ. କାନିମୋଝି ଉପଭୋକ୍ତା ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ସମ୍ପର୍କିତ କମିଟିର ମୁଖ୍ୟ ରହିବେ। ପୂର୍ବତନ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଓ ରାଜୀବ ପ୍ରତାପ ରୁଡ଼ିଙ୍କୁ ଯଥାକ୍ରମେ କୋଇଲା, ଖଣି ଓ ଶିଳ୍ପ; ଏବଂ ଜଳସମ୍ପଦ କମିଟି ମୁଖ୍ୟ କରାଯାଇଛି। ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କୁ ବିଜ୍ଞାନ ଓ ପ୍ରଯୁକ୍ତି, ପରିବେଶ ଓ ଜଳବାୟୁ ପରିବର୍ତ୍ତନ କମିଟିରେ ସାମିଲ କରାଯାଇଛି। ଏଆଇଏମ୍ଆଇଏମ୍ ଅଧ୍ୟକ୍ଷ ଅସାଦୁଦ୍ଦିନ ଓଓ୍ବାଇସିଙ୍କୁ ବହିର୍ବ୍ୟାପାର ସମ୍ପର୍କିତ ଷ୍ଟାଣ୍ଡିଂ କମିଟିରେ ସଦସ୍ୟତା ମିଳିଛି।
କଂଗ୍ରେସ ନେତା ରାହୁଲଙ୍କୁ ପ୍ରତିରକ୍ଷା କମିଟିର ସଦସ୍ୟ ରଖାଯାଇଥିବାବେଳେ ସଂସଦୀୟ ଦଳ ନେତ୍ରୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ କୌଣସି ପ୍ୟାନେଲରେ ସ୍ଥାନ ମିଳି ନାହିଁ। ପ୍ରତ୍ୟେକ ସାଧାରଣ ନିର୍ବାଚନ ପରେ ପୁନଗର୍ଠିତ ହେଉଥିବା ଉକ୍ତ କମିଟି ମିନି ପାର୍ଲାମେଣ୍ଟ ଭାବେ କାର୍ଯ୍ୟ କରିବା ସହ ବିଭିନ୍ନ ମନ୍ତ୍ରଣାଳୟର କାର୍ଯ୍ୟକାରିତା ଉପରେ ନଜର ରଖିଥାଏ।