ହାମିଲଟନ,୨୨।୩: ଚଳିତ ଆଇସିସି ମହିଳା ଦିନିକିଆ ବିଶ୍ୱକପ୍ରେ ମଙ୍ଗଳବାର ଖେଳାଯାଇଥିବା ବାଂଲାଦେଶ ବିପକ୍ଷ ମ୍ୟାଚ୍କୁ ୧୧୦ ରନ୍ର ବୃହତ୍ ବ୍ୟବଧାନରେ ଜିତି ନେଇଛି ଭାରତ। ୨୨୯ ରନ୍ କରିଥିବା ଭାରତୀୟ ଦଳ ପ୍ରତିପକ୍ଷ ବାଂଲାଦେଶ ଟିମ୍କୁ ୧୧୯ ରନ୍ରେ ରୋକି ଦେଇଛି। ଚଳିତ ବିଶ୍ୱକପ୍ରେ ଏହା ଟିମ୍ ଇଣ୍ଡିଆର ତୃତୀୟ ବିଜୟ। ଏହି ବିଜୟରୁ ୨ ପଏଣ୍ଟ ମିଳିବାରୁ ଭାରତ ମୋଟ ୬ ପଏଣ୍ଟ ସହ ତୃତୀୟ ସ୍ଥାନରେ ରହି ସେମିଫାଇନାଲ ଆଶା ଉଦ୍ଜୀବିତ ରହିଛି।
ସ୍ଥାନୀୟ ସେଡନ ପାର୍କଠାରେ ଖେଳାଯାଇଥିବା ମ୍ୟାଚ୍ରେ ଭାରତ ୫୦ ଓଭରରେ ୭ ଉଇକେଟ କ୍ଷତିରେ ୨୨୯ ରନ୍ କରିଥିଲା। ୟଶତିକା ବର୍ମା ୫୦, ଶେଫାଳୀ ବର୍ମା ୪୨, ସ୍ମ୍ରିତି ମନ୍ଧାନା ୩୦, ପୂଜା ବସ୍ତ୍ରକାର ୩୦* ରନ୍ର ଯୋଗଦାନ ଦେଇଥିଲେ। ଜବାବରେ ଆରମ୍ଭରୁ ବାଂଲାଦେଶ ବ୍ୟାଟରଙ୍କୁ ବାନ୍ଧି ରଖିଥିଲେ ଭାରତୀୟ ସ୍ପିନର। ସ୍ନେହ ରାଣା ୪ ଉଇକେଟ ଅଧିକାର କରିଥିବା ବେଳେ ବସ୍ତ୍ରକାର ଏବଂ ଝୁଲନ ଗୋସ୍ବାମୀ ୨ ଉଇକେଟ ଲେଖା ନେଇଥିଲେ। ଫଳରେ ବାଂଲାଦେଶ ୪୦.୩ ଓଭରରେ ୧୧୯ ରନ୍ ଅଲଆଉଟ୍ ହୋଇଯାଇଥିଲା।