ମଥୁରାନଗରୀ,୬।୧(ପ୍ରେମାନନ୍ଦ ଖମାରୀ): ବରଗଡ଼ ଜିଲା ଭଟଲିରେ ଗତ ୨୦୧୮ ମସିହାରେ ସଂଘଟିତ ଏକ ହତ୍ୟା ମାମଲାର ରାୟ ସୋମବାର ପ୍ରକାଶ ପାଇଛି। ଏହି ମାମଲାରେ ବର୍ତ୍ତମାନର ଭଟଲି ବିଧାୟକ ଇରାସିସ୍ ଆଚର୍ଯ୍ୟଙ୍କ ସମେତ ଅନ୍ୟ ୩ଜଣ ନିର୍ଦ୍ଦୋଷ ସାବ୍ୟସ୍ତ ହୋଇଛନ୍ତି।
ସୂଚନା ଅନୁଯାୟୀ, ଗତ ୨୦୧୮ ମସିହାରେ ଭଟଲିରେ ଏକ ଗୁଳିକାଣ୍ଡ ହୋଇଥିଲା। ଏଥିରେ ବୁଲୁ ସତନାମୀ ନାମକ ଜଣେ ଯୁବକଙ୍କ ମୃତ୍ୟୁ ହୋଇଥିଲା। ଏଥିରେ ପୋଲିସ ଇରାସିସ୍ଙ୍କ ସମେତ ପ୍ରମୋଦ ପୋଢ଼, ବବଲୁ ନାଗ ଏବଂ ବଣ୍ଟି ଓରଫ୍ ଆୟୁଷ୍ମାନଙ୍କୁ ଗିରଫ କରିଥିଲା। ଏହି ମାମଲାରେ ଇରାସିସ୍ ଦୀର୍ଘମାସ ଧରି ଜେଲରେ ଥିଲେ। ପରେ ସେ ଜାମିନରେ ଆସିଥିଲେ। ତେବେ ଉକ୍ତ ମାମଲାର ବିଚାର କରି ବରଗଡ଼ ଅତିରିକ୍ତ ଜିଲା ଓ ଦୌରାଜଜ ଏହାର ଶୁଣାଣି କରି ସାକ୍ଷ୍ୟ ପ୍ରମାଣ ଅଭାବରୁ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ଇରାସିସ୍, ପ୍ରମୋଦ ପୋଢ଼ଙ୍କ ତରଫରୁ ଆଡ଼ଭୋକେଟ୍ ଶରତ ପ୍ରଧାନ, ସରୋଜ ଜେନା, କିଶୋର ଦଫାଦାର, ବବଲୁଙ୍କ ତରଫରୁ ଆଡ଼ଭୋକେଟ୍ ପ୍ରଦୀପ ମହାପାତ୍ର ଏବଂ ବଣ୍ଟିଙ୍କ ତରଫରୁ ଆଡ଼ଭୋକେଟ୍ ଲିପସିତ୍ ମିଶ୍ର ମାମଲା ପରିଚାଳନା କରୁଥିଲେ। ଏଠାରେ ଉଲ୍ଲେଖଥାଉକି, ହତ୍ୟାଘଟଣା ସମୟରେ ଇରାସିସ୍ ଭଟଲି ବିଧାୟକ ନଥିଲେ।
