ଶ୍ରୀନଗର,୩୧।୫: ଜମ୍ମୁ କଶ୍ମୀର ନ୍ୟାଶନାଲ ପାନ୍ଥର୍ସ ପାର୍ଟିର ସୁପ୍ରିମୋ ପ୍ରଫେସର ଭୀମ ସିଂଙ୍କ ଦେହାନ୍ତ ହୋଇଛି। ସେ ମଙ୍ଗଳବାର ସକାଳେ ଜମ୍ମୁର ବକ୍ସି ନାଗର ହସ୍ପିଟାଲରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ଭୀମ ସିଂ ଗତ କିଛି ମାସ ଧରି ଅସୁସ୍ଥ ଥିଲେ। ମୃତ୍ୟୁ ବେଳକୁ ତାଙ୍କୁ ୮୦ ବର୍ଷ ବୟସ ହୋଇଥିଲା।
ଜମ୍ମୁ-କଶ୍ମୀର ରାଜନୀତିରେ ପ୍ରଫେସର ଭୀମ ସିଂ ଜଣେ ପ୍ରମୁଖ ଚେହେରା ଥିଲେ। ରାଜ୍ୟ ସମେତ ଜମ୍ମୁ ଡିଭିଜନର ସ୍ବର ଉତ୍ତୋଳନ କରିବାକୁ ସେ ଅନେକ ସଂଘର୍ଷ କରିଥିଲେ। ତାଙ୍କ ମୃତ୍ୟୁକୁ ନେଇ ବିଭିନ୍ନ ରାଜନୈତିକ ବ୍ୟକ୍ତି ମଧ୍ୟ ସମବେଦନା ଜଣାଇଛନ୍ତି।
ପ୍ରଫେସର ଭୀମ ସିଂ ଅଗଷ୍ଟ ୧୯୪୧ରେ ଜମ୍ମୁର ରାମନଗର ଅଞ୍ଚଳରେ ଜନ୍ମଗ୍ରହଣ କରିଥିଲେ। ସେ ସ୍ତ୍ରୀ ଜୟ ମାଲା ଏବଂ ଅନ୍ୟ ସହଯୋଗୀମାନଙ୍କ ସହିତ ମିଶି ୧୯୮୨, ମାର୍ଚ୍ଚ ୨୩ରେ ପାନ୍ଥର୍ସ ପାର୍ଟି ପ୍ରତିଷ୍ଠା କରିଥିଲେ। ସେ ୨୦୧୨ ଅର୍ଥାତ୍ ପ୍ରାୟ ୩୦ ବର୍ଷ ପର୍ଯ୍ୟନ୍ତ ଦଳର ସଭାପତି ଥିଲେ। ଏହା ପରେ ସେ ତାଙ୍କ ଜ୍ୱାଇଁ ହର୍ଷ ଦେବ ସିଂଙ୍କୁ ଏହି ସ୍ଥାନ ଦେଇଥିଲେ। ଗତ ବର୍ଷ ସେ ପୁଣି ଥରେ ପାନ୍ଥର୍ସ ପାର୍ଟିର ସଭାପତି ହୋଇ ସକ୍ରିୟ ନେତୃତ୍ୱକୁ ଫେରିଥିଲେ।