ଭୁବନେଶ୍ୱର, ୨।୧୨ (ତପନ ସ୍ବାଇଁ): ଭୁବନେଶ୍ୱର ଆଥ୍ଲେଟିକ ଆସୋସିଏଶନ ଆନୁକୂଲ୍ୟରେ ‘ଗତିକୃଷ୍ଣ ପଣ୍ଡା ମେମୋରିଆଲ’ ଭୁବନେଶ୍ୱର ‘ଏ’ ଡିଭିଜନ ଫୁଟବଲ ଲିଗ୍ ଶୁକ୍ରବାରଠାରୁ ଆରମ୍ଭ ହୋଇଛି। ୟୁନିଟ-୧ସ୍ଥିତ ଭୁବନେଶ୍ୱର ଫୁଟ୍ବଲ ଏକାଡେମୀ ପଡ଼ିଆରେ ଫ୍ଲଡ୍ ଲାଇଟରେ ଅନୁଷ୍ଠିତ ୟୁନିଟ-୬ ଆଥ୍ଲେଟିକ ଆସୋସିଏଶନ ଓ ଏଜି ରିକ୍ରିଏଶନ କ୍ଲବ ଉଦ୍ଘାଟନୀ ମ୍ୟାଚ ୨-୨ ଗୋଲରେ ଡ୍ର ରହିଛି। ମ୍ୟାଚର ୩୯ତମ ମିନିଟରେ ୟୁନିଟ-୬ର ରାହୁଲ ମୁଖୀ ଏକ ଗୋଲ ଦେଇ ଦଳକୁ ଅଗ୍ରଣୀ କରିଥିଲେ। ୪୫ତମ ମିନିଟରେ ଏଜି ରିକ୍ରିଏଶନ କ୍ଲବର ରାଜେନ୍ଦ୍ର ହେମ୍ବ୍ରମ ଗୋଲଟିକୁ ପରିଶୋଧ କରି ଦେଇଥିଲେ। ଦ୍ୱିତୀୟାର୍ଦ୍ଧରେ ଅର୍ଥାତ୍ ମ୍ୟାଚର ୬୦ତମ ମିନିଟରେ ୟୁନିଟ-୬ର ରୁଦ୍ର ପ୍ରଧାନ ଏକ ପେନାଲ୍ଟି କିକ୍କୁ ଗୋଲରେ ପରିଣତ କରି ଦଳକୁ ପୁଣି ଅଗ୍ରଣୀ କରିଥିଲେ। ମାତ୍ର ୭୫ତମ ମିନିଟରେ ଏଜି ଦଳର ଅର୍ପଣ ଲାକ୍ରା ଗୋଲଟିକୁ ପରିଶୋଧ କରି ଦେଇଥିଲେ। ମ୍ୟାଚ ଡ୍ର ରହିବା କାରଣରୁ ଉଭୟ ଦଳ ଗୋଟିଏ ଲେଖାଏ ପଏଣ୍ଟ ପାଇଛନ୍ତି। ୟୁନିଟ-୬ ଦଳର ରାହୁଲ ମୁଖୀ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇ ପୂର୍ବତନ କ୍ରୀଡ଼ା ପ୍ରଶାସକ ଅଶୋକ ମହାନ୍ତିଙ୍କଠାରୁ ପୁରସ୍କାର ଗ୍ରହଣ କରିଥିଲେ। ଗତିକୃଷ୍ଣଙ୍କ ପୁତ୍ର ଶିବ ପ୍ରସାଦ ପଣ୍ଡା ଟୁର୍ନାମେଣ୍ଟକୁ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଭୁବନେଶ୍ୱର ଆଥ୍ଲେଟିକ୍ ଆସୋସିଏଶନ ସମ୍ପାଦକ ସୌର୍ଯ୍ୟରଞ୍ଜନ ପରିଜା, ଫୁଟବଲ ସମ୍ପାଦକ ଦିଲୀପ କୁମାର ଦାସ ଏବଂ ଅନୁଷ୍ଠାନର କାର୍ଯ୍ୟକାରିଣୀ ସମିତି ସଦସ୍ୟମାନେ ଉପସ୍ଥିତ ଥିଲେ। ଶେଖାଓ୍ବତ ଖାଁ ମ୍ୟାଚ ପରିଚାଳନା କରିଥିଲେ। ତାଙ୍କୁ ସହାୟତା କରିଥିଲେ ଆଲୋକ ଦେହୁରୀ ଓ ଏସ୍.ଏଓ୍ ବେଗ୍। ସୁଶାନ୍ତ ମିଶ୍ର ଚତୁର୍ଥ ରେଫରି ଦାୟିତ୍ୱ ନିର୍ବାହ କରିଥିଲେ। ଶନିବାର କିଶୋର କ୍ଲବ ଓ କିସ୍ ଫୁଟବଲ କ୍ଲବ ମଧ୍ୟରେ ମ୍ୟାଚ ଅନୁଷ୍ଠିତ ହେବ। ଏହି ଲିଗ୍ ୧୦ ତାରିଖ ପର୍ଯ୍ୟନ୍ତ ଚାଲିବ।
