ଭୁବନେଶ୍ୱର, ୧୪।୪ (କ୍ରୀଡ଼ା ପ୍ରତିନିଧି): ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ଆଉ ୬ ମାସରୁ କମ୍ ସମୟ ଥିବାବେଳେ ଏହା ଭୁବନେଶ୍ୱର, ଗୋଆ ଓ ନଭି ମୁମ୍ବାଇରେ ହେବ ବୋଲି ବୁଧବାର ଫୁଟବଲର ସର୍ବୋଚ୍ଚ ପରିଚାଳନା ସଂସ୍ଥା ପକ୍ଷରୁ ଘୋଷଣା କରାଯାଇଛି। ଜୁନ ୨୪ରେ ଜୁରିଚ୍ଠାରେ ପ୍ରତିଯୋଗିତାର ଡ୍ର’ ଉଠାଣ ହେବ ବୋଲି ଫିଫା ପକ୍ଷରୁ ସ୍ପଷ୍ଟ କରାଯାଇଛି। କୋଭିଡ୍-୧୯ ମହାମାରୀ ଯୋଗୁ ୨୦୨୦ରେ ହେବାକୁଥିବା ସଂସ୍କରଣକୁ ବାତିଲ କରାଯାଇଥିଲା। କ୍ରମାଗତ ରିଭ୍ୟୁ ଓ ପଡ଼ିଆ ନିରୀକ୍ଷଣ ପରେ ଫିଫା, ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫଏଫ) ଓ ସ୍ଥାନୀୟ ଆୟୋଜକ କମିଟି (ଏଲ୍ଓସି) ପକ୍ଷରୁ ଆୟୋଜକ ସହର ନାମ ଘୋଷଣା କରାଯାଇଛି। ଟୁର୍ନାମେଣ୍ଟରେ ଭାଗ ନେବାକୁ ଯାଉଥିବା ଖେଳାଳି ଓ ଅନ୍ୟ ଅଂଶଗ୍ରହଣକାରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଭୁବନେଶ୍ୱରର କଳିଙ୍ଗ ଷ୍ଟାଡିୟମ, ଗୋଆର ପଣ୍ଡିତ ଜବାହରଲାଲ ନେହେରୁ ଷ୍ଟାଡିୟମ ଓ ଭୁବନେଶ୍ୱର, ଗୋଆ, ନଭି ମୁମ୍ବାଇର ଡି.ଓ୍ବାଇ. ପାଟିଲ ଷ୍ଟାଡିୟମକୁ ଭେନ୍ୟୁଭାବେ ଚୟନ କରାଯାଇଛି। ମହିଳା ଫୁଟବଲର ଉଦୀୟମାନ ପ୍ରତିଭା ଏବଂ ଭବିଷ୍ୟତର ତାରକାଙ୍କୁ ଏହି ଟୁର୍ନାମେଣ୍ଟରେ ଦେଖିବାକୁ ମିଳିବ।
”ସମ୍ପ୍ରତି ବିଶ୍ୱରେ କ୍ୱାଲିଫାଇଂ ପ୍ରକ୍ରିୟା ଚାଲିଥିବାବେଳେ ଆମେ ଡ୍ର’ ଉଠାଣର ତାରିଖ ଘୋଷଣା କରିବାକୁ ଖୁବ୍ ଉତ୍ସାହିତ ଥିଲୁ। ଏହା ସହିତ ତିନୋଟି ଆୟୋଜକ ସହର ନାମ ମଧ୍ୟ ସ୍ପଷ୍ଟ ହୋଇଛି“ ବୋଲି ଫିଫାର ମୁଖ୍ୟ ମହିଳା ଫୁଟବଲ ଅଫିସର ସାରାଇ ବେରେମନ ପ୍ରକାଶ କରିଛନ୍ତି। କୋଭିଡ୍-୧୯ ଜନିତ ସ୍ଥିତି ପରେ ଫିଫା ଅଫିସିଆଲଙ୍କ ଭାରତ ପରିଭ୍ରମଣ ଏବଂ ବିଭିନ୍ନ ଭେନ୍ୟୁ ନିରୀକ୍ଷଣ ପରେ ଟୁର୍ନାମେଣ୍ଟ ସମ୍ପର୍କରେ ନୂଆ ରୂପରେଖ ସ୍ପଷ୍ଟ ହୋଇଥିଲା। ଗୋଆ ଓ ନଭି ମୁମ୍ବାଇ ପୂର୍ବରୁ ଅନ୍ତର୍ଜାତୀୟ ଫଟବଲ ଟୁର୍ନାମେଣ୍ଟ ଆୟୋଜନର ଅଭିଜ୍ଞତା ରଖିଥିବାବେଳେ ଭୁବନେଶ୍ୱର କ୍ରମେ ଏକ ସ୍ପୋର୍ଟିଂ ପାଓ୍ବାର ହାଉସ ଭାବେ ଉଭା ହୋଇଛି। ଆୟୋଜକ ଭାରତ, ବ୍ରାଜିଲ, ଚିଲି, ଚାଇନା, କଲମ୍ବିଆ, ଜାପାନ ଓ ନ୍ୟୁଜିଲାଣ୍ଡ ଆଗାମୀ ପ୍ରତିଯୋଗିତାରେ ଭାଗନେବା ସ୍ପଷ୍ଟ ହୋଇଛି। ଜୁନ ୨୪ରେ ଡ୍ର ଘୋଷଣା ପୂର୍ବରୁ ଟୁର୍ନାମେଣ୍ଟରେ ଭାଗ ନେବାକୁ ଯାଉଥିବା ୧୬ ଦଳ ସମ୍ପର୍କରେ ସ୍ପଷ୍ଟ ଚିତ୍ର ମିଳିବ।