ଦୁବାଇ, ୯ା୪ (ପି.ଟି.)-ମାର୍ଚ୍ଚ ମାସ ପାଇଁ ଆଇସିସି ‘ପ୍ଲେୟର ଅଫ୍ ଦି ମନ୍ଥ’ ଦୌଡ଼ରେ ରହିଥିବା କ୍ରିକେଟରମାନଙ୍କ ମଧ୍ୟରେ ଭାରତର ଅଭିଜ୍ଞ ସିମ୍ ବୋଲର ଭୁବନେଶ୍ୱର କୁମାର ଅନ୍ୟତମ। ଇଂଲଣ୍ଡ ବିପକ୍ଷ ସୀମିତ ଓଭର ମ୍ୟାଚଗୁଡ଼ିକରେ ତାଙ୍କ ପ୍ରଦର୍ଶନ ଉଲ୍ଲେଖନୀୟ ରହିଥିଲା। ଅନ୍ତର୍ଜାତୀୟ କ୍ରିକେଟର ସମସ୍ତ ଫର୍ମାଟ୍ରେ ଯେଉଁ ପୁରୁଷ ଓ ମହିଳା କ୍ରିକେଟରମାନେ ଉଚ୍ଚକୋଟୀର ପ୍ରଦର୍ଶନ କରିଛନ୍ତି, ସେମାନଙ୍କର ଏକ ନାମ ତାଲିକା ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ତରଫରୁ ଗୁରୁବାର ଘୋଷଣା କରାଯାଇଛି। ପୁରୁଷ ବିଭାଗରେ ଭୁବନେଶ୍ୱରଙ୍କ ବ୍ୟତୀତ ଅନ୍ୟ ଯେଉଁମାନଙ୍କ ନାମ ରହିଛି, ସେମାନେ ହେଲେ ଆଫଗାନିସ୍ତାନର ଲେଗ୍ ସ୍ପିନର ରସିଦ୍ ଖାଁ ଓ ଜିମ୍ବାଓ୍ବେର ସିନ୍ ଓ୍ବିଲିୟମ୍ସ। ମହିଳା ବିଭାଗରେ ଯେଉଁମାନଙ୍କ ନାମ ସୁପାରିସ ହୋଇଛି, ସେମାନେ ହେଲେ ଭାରତର ରାଜଶ୍ରୀ ଗାଏକ୍ୱାଡ, ଦକ୍ଷିଣ ଆଫ୍ରିକାର ଲିଜେଲି ଲି’ ଓ ଭାରତର ପୁନମ ରାଉତ। ଭୁବନେଶ୍ୱର ଗତ ମାସରେ ଇଂଲଣ୍ଡ ବିପକ୍ଷରେ ୩ ଅନ୍ତର୍ଜାତୀୟ ଦିନିକିଆ ଖେଳିଥିଲେ। ସେ ୪.୬୫ ଇକୋନୋମି ରେଟ୍ରେ ୬ ଉଇକେଟ ଅକ୍ତିଆର କରିଥିଲେ। ସେ ଆହୁରି ମଧ୍ୟ ଏହି ଦଳ ବିପକ୍ଷରେ ୫ ଅନ୍ତର୍ଜାତୀୟ ଟି୨୦ ଖେଳି ୬.୩୮ ଇକୋନୋମି ରେଟ୍ରେ ୪ ଉଇକେଟ ଅକ୍ତିଆର କରିଥିଲେ। ଭାରତ ଓ ଇଂଲଣ୍ଡ ହ୍ବାଇଟ ବଲ୍ ସିରିଜରେ ସେ ଶ୍ରେଷ୍ଠ ବୋଲର ବିବେଚିତ ହୋଇଥିଲେ। ଅନ୍ୟପକ୍ଷରେ ଜିମ୍ବାଓ୍ବେ ବିପକ୍ଷ ଦ୍ୱିତୀୟ ଟେଷ୍ଟରେ ତାଙ୍କ ଟିମ୍ ବିଜୟରେ ରସିଦ ୧୧ ଉଇକେଟ ଅକ୍ତିଆର କରିଥିଲେ। ପରେ ଅନ୍ତର୍ଜାତୀୟ ଟି୨୦ରେ ତାଙ୍କ ଦଳର ୩-୦ ବିଜୟରେ ସେ ୬ ଉଇକେଟ ହାସଲ କରିଥିଲେ। ଜିମ୍ବାଓ୍ବେର ଓ୍ବିଲିୟମ୍ସ ଆଫଗାନିସ୍ଥାନ ବିପକ୍ଷରେ ଦୁଇଟି ଟେଷ୍ଟ ଖେଳିଥିଲେ। ସେ ମୋଟ ୨୬୪ରନ ସଂଗ୍ରହ କରିଥିବାବେଳେ ୨ଟି ଉଇକେଟ ମଧ୍ୟ ଅକ୍ତିଆର କରିଥିଲେ। ସେ ଏହି ଦଳ ବିପକ୍ଷରେ ୩ ଅନ୍ତର୍ଜାତୀୟ ଟି୨୦ ମଧ୍ୟ ଖେଳିଥିଲେ। ୧୨୮.୫୭ ଷ୍ଟ୍ରାଇକ୍ରେଟ୍ରେ ୪୫ ରନ ସ୍କୋର କରିଥିଲେ।
