ନୂଆଦିଲ୍ଲୀ,୮।୧୧: ଆଜିକାଲି ଭାରତୀୟ ଦଳ ଘରୋଇ ମାଟିରେ ଖେଳାଯାଉଥିବା ଦିନିକିଆ ବିଶ୍ୱକପ ୨୦୨୩ରେ ବ୍ୟସ୍ତ ଅଛନ୍ତି। ବିଶ୍ୱକପ ପରେ ତୁରନ୍ତ ଟିମ ଇଣ୍ଡିଆ ଅଷ୍ଟ୍ରେଲିଆ ବିପକ୍ଷରେ ୫ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳିବ। ଦଳର ସମସ୍ତ ବରିଷ୍ଠ ଖେଳାଳିଙ୍କୁ ଏହି ସିରିଜରେ ବିଶ୍ରାମ ଦିଆଯିବ। ଏଥିରେ ଦ୍ରୁତ ବୋଲର ମଧ୍ୟ ସାମିଲ ହେବେ। ମେନ ଇନ ବ୍ଲୁ ପୁଣି ଥରେ ଅଭିଜ୍ଞ ପେସର୍ ଭୁବନେଶ୍ୱର କୁମାରଙ୍କୁ ପ୍ରତ୍ୟାବର୍ତ୍ତନ କରିବାର ସୁଯୋଗ ଦେଇପାରେ।
ବରିଷ୍ଠ ବୋଲରଙ୍କ ଅନୁପସ୍ଥିତିରେ ଭୁଭି ଟିମ ଇଣ୍ଡିଆର ପେସ୍ ଆକ୍ରମଣର ନେତୃତ୍ୱ ନେଇପାରନ୍ତି। ଭୁବନେଶ୍ୱର ଗତ ଏକ ବର୍ଷ ଧରି ଭାରତୀୟ ଦଳରୁ ବାଦ୍ ପଡିଛନ୍ତି। ଏଭଳି ପରିସ୍ଥିତିରେ ଅଷ୍ଟ୍ରେଲିଆ ବିପକ୍ଷ ଟି-୨୦ ସିରିଜ ତାଙ୍କ ପାଇଁ ଏକ ବଡ଼ ଲାଇଫ ଲାଇନ ହୋଇପାରେ।
ବିସିସିଆଇର ଜଣେ ଅଧିକାରୀ କହିଛନ୍ତି, ଚୟନକର୍ତ୍ତାମାନେ ବରିଷ୍ଠ ବୋଲରମାନଙ୍କୁ ବିଶ୍ରାମ ଦେବେ। ଆମକୁ ଭୁବନେଶ୍ୱର କୁମାରଙ୍କ ପରି ଅଭିଜ୍ଞ ଦ୍ରୁତ ବୋଲର ଆବଶ୍ୟକ। ତେଣୁ ତାଙ୍କୁ ଦଳରେ ସାମିଲ କରାଯିବ।
ନିକଟରେ ଖେଳାଯାଇଥିବା ସୟଦ ମୁସ୍ତାକ ଅଲି ଟ୍ରଫିରେ ଭୁବନେଶ୍ୱର କୁମାର ଚମତ୍କାର ପ୍ରଦର୍ଶନ କରିଥିଲେ। ସେ ୭ଟି ମ୍ୟାଚରେ ୯.୩୧ର ହାରରେ ୧୬ଟି ଉଇକେଟ ନେଇଥିଲେ।
